Gəncədə “Xoşbəxtliyin Qiyməti” – Qələbənin 5-ci ildönümünə həsr olunmuş təsirli teatr gecəsi

Noyabrın 5-də Gəncə Dövlət Filarmoniyasında Vətən Müharibəsində Qələbənin 5-ci ildönümünə həsr olunmuş möhtəşəm teatr gecəsi keçirilib. Tədbirdə Azərbaycan Dövlət Akademik Rus Dram Teatrının aktyorları yazıçı Sahibin əsəri əsasında səhnələşdirilən “Xoşbəxtliyin qiyməti” tamaşasını təqdim ediblər. Tamaşa Böyük Vətən Müharibəsində Qələbə Gününün ruhuna ithaf olunaraq, azadlıq, vətənpərvərlik və insan ruhunun sarsılmaz gücünü səhnə dili ilə ifadə edib.

Pyesin rejissoru Raulya Türkkan tamaşada dərin psixoloji məzmunla səmimi vətənpərvərlik duyğularını birləşdirərək, həm sənətkarlıq baxımından, həm də mənəvi təsiri ilə yadda qalan bir səhnə əsəri ortaya qoyub. Rejissorun quruluşu sülhün və xoşbəxtliyin əsl qiymətini tamaşaçıya düşündürərək çatdırır. Səhnə əsərinin emosional gücü caz müğənnisi Ülviyyə Rəhimovanın ifasında və Anar Yusifovun aranjimanında səslənən “Sarı Gəlin” xalq mahnısı ilə daha da dərinləşib. Musiqinin melodik axarı və aktyorların ifa tərzi tamaşaçılarda həm nostalji, həm də qürur dolu hisslər yaradıb.

Tədbirin açılışında Azərbaycanın Əməkdar Artisti Firdovsi Atakişiyev çıxış edərək tamaşanın müəllifinin yaradıcılıq yolundan, əsərin müxtəlif beynəlxalq teatr festivallarında uğurla təqdim olunmasından və bir sıra nüfuzlu mükafatlara layiq görülməsindən danışıb. O, bildirib ki, “Xoşbəxtliyin qiyməti” əsəri özündə həm milli duyğuları, həm də ümumbəşəri dəyərləri daşıyır və hər dəfə səhnəyə qoyulduqda tamaşaçılara fərqli emosiyalar bəxş edir.

Gecənin xüsusi anlarından biri teatr artisti Rüfət Əliyevin Heydər Əliyev Fondunun vitse-prezidenti, IDEA İctimai Birliyinin təsisçisi və direktoru Leyla Əliyevanın Qələbə Gününə həsr etdiyi şeiri səsləndirməsi olub. Aktyorun səmimi ifası auditoriyada dərin emosional təsir yaradıb və tamaşaya xüsusi ruh verib.

Tədbir Azərbaycan Respublikasının Dövlət Himninin səsləndirilməsi ilə başlayıb. Himnin ardından zalda ciddi bir səssizlik hökm sürüb və tamaşaçılar səhnədə canlandırılan hadisələrin dərin mənasına tam şəkildə qərq olublar. İlk dəqiqələrdən tamaşanın dinamikası, aktyorların ustalıqla təqdim etdiyi emosiyalar tamaşaçılarda böyük maraq doğurub.

Səhnədəki hər bir obraz, hər bir dialoq tamaşaçını düşündürüb, onları həm Vətən uğrunda fədakarlığın, həm də sülhün əsl mənasının üzərində düşünməyə vadar edib. Tamaşa insan həyatının mənəvi dəyərləri, müharibənin ağrıları və xoşbəxtliyin həqiqi mahiyyəti barədə dərin fəlsəfi suallar doğurub.

Final səhnəsi isə xüsusilə təsirli alınıb. Tamaşa başa çatdıqdan sonra zal gurultulu və uzun sürən alqış səsləri ilə dolub. Tamaşaçılar ayağa qalxaraq aktyorları və yaradıcı heyəti alqışlayıblar. Bir çox tamaşaçının gözlərində yaş, üzlərində isə həm qürur, həm də minnətdarlıq hissi hiss olunub.

Yaradıcı kollektivin təqdim etdiyi “Xoşbəxtliyin qiyməti” tamaşası bir daha göstərdi ki, Azərbaycan mədəniyyəti və teatr sənəti xalqın tarixini, ağrısını və qələbəsini bədii dildə ifadə etmək gücünə malikdir.

Tamaşanın növbəti nümayişi 8 Noyabr – Zəfər Günü münasibətilə Azərbaycan Dövlət Akademik Rus Dram Teatrının səhnəsində keçiriləcək. Bu dəfə də tamaşanın vətənpərvərlik və sülh çağırışı motivləri ilə minlərlə tamaşaçının qəlbində dərin iz buraxacağı gözlənilir.

Fərid Faiqoğlu

AJB-nin üzvü