Payız gəldi, həbsə getdi onlar...

Dövlət Təhlükəsizliyi Xidməti (DTX) yenidən silsilə əməliyyatlara start verib. Son aylarda ardıcıl bir neçə məmur həbs edilib.

“Qafqazinfo”nun məlumatına görə, Qaxdan başlayan əməliyyatlar bu gün Balakənə çatıb. Rayon İcra Hakimiyyətinin başçısı İslam Rzayev artıq qandallanıb.

İslam Rzayev də Vilyam Hacıyev kimi korrupsioner kolleqasından təsirlənib. İndi də isti kreslosundan götürülüb qanun qarşısında cavab vermək üçün Bakıya gətirilir. 

Son hadisələrdən ən diqqətçəkəni isə sözsüz ki, Prezident Administrasiyasının keçmiş rəhbəri, özünü “boz kardinal” hesab edən Ramiz Mehdiyev və Adnan Əhmədzadənin cinayət məsuliyyətinə cəlb olunmasıdır.

Adnanın həbsinin “40”ı çıxmamış Ramiz Mehdiyevin ifşa edilməsi illərlə formalaşmış gizli sistemin sonunu gətirə bilər. Artıq DTX bu istiqamətdə geniş araşdırmalara başlayıb. Mehdiyevin adamları bir-bir istintaq nəzarətinə alınır.

Hətta bu gün saxlanılan “Hürriyyət TV”nin rəhbəri Vüqar Məmmədovun da həmin sistemin nümayəndələrindən biri olduğu deyilir. Yəqin ki, bu barədə yaxın günlərdə daha geniş məlumat yayılacaq.

İndi isə “payız dalğası”nın apardıqlarını yada salaq:

• Adnan Əhmədzadə - iqtisadi təhlükəsizliyə qarşı təxribat, korrupsiya;

• Ramiz Mehdiyev - dövlətə xəyanət, hakimiyyəti zorla ələ keçirməyə yönələn hərəkətlər, cinayət yolu ilə qazanılmış pulları leqallaşdırma;

• İslam Rzayev - korrupsiya;

Bu yerdə payıza az qalmış həbsə gedən Qaxın icra başçısı Musa Şəkiliyevi və sinəsinə rus imperiyasının rəmzi olan “Georgi lenti”ni taxıb öyünən “ağsaqqal” Saleh Səmədovu da unutmaq olmaz. Özü ilə birgə övladlarının da karyerasını məhv edən Saleh Səmədov indi hərəkətlərinə görə vicdanı qarşısında özü-özünə, dövlət vəsaitini taladığı üçün istintaqa hesabat verir.

Bütün bu olanlar isə bir daha təsdiq edir ki, dövlətin qanunla qorunan mənafelərinə zərbə vuran istənilən şəxs-istər sabiq, istərsə də indiki məmur olsun gec-tez DTX-nin təcridxanasının havasını udacaq.

Sail Ağasəlim