Akademik Rus Dram Teatrının direktoru Ədalət Hacıyev: “18 oktyabr – Azərbaycan Respublikasının Müstəqilliyinin Bərpası Günü hər bir azərbaycanlı üçün qürur və iftixar günüdür”

Azərbaycan xalqının tarixində elə günlər var ki, onlar sadəcə bir tarixi hadisə deyil, milli yaddaşın, milli ruhun və dövlətçilik iradəsinin rəmzinə çevrilib. Belə günlərdən biri də şübhəsiz ki, 18 oktyabr – Azərbaycan Respublikasının Müstəqilliyinin Bərpası Günüdür. Həmin gün 1991-ci ildə Azərbaycan Ali Sovetinin qəbul etdiyi “Azərbaycan Respublikasının Dövlət Müstəqilliyi haqqında Konstitusiya Aktı” ilə ölkəmiz rəsmi şəkildə müstəqil dövlət statusunu bərpa etdi. Bu qərar ilə xalqımız əsrlərlə arzuladığı azadlığına qovuşdu.

Mədəniyyət xadimi, Akademik Rus Dram Teatrının direktoru Ədalət Hacıyev bu tarixi gün barədə danışarkən dərin duyğularla qeyd edir:“18 oktyabr – Azərbaycan Respublikasının Müstəqilliyinin Bərpası Günü hər bir azərbaycanlı üçün qürur və iftixar günüdür. Bu, xalqımızın azadlıq ruhunun, milli birliyinin və dövlətçilik iradəsinin təntənəsidir.”

Azərbaycan xalqı yüz illər boyu müstəqillik, azadlıq və milli kimliyini qorumaq uğrunda mübarizə aparmışdır. 1918-ci ildə yaradılan Azərbaycan Xalq Cümhuriyyəti bu mübarizənin ilk bəhrəsi olsa da, cəmi 23 ay yaşaya bildi. Lakin həmin dövrdə qoyulan dövlətçilik ənənələri, milli ordu və milli dəyərlər sonrakı nəsillərin yaddaşında əbədi iz qoydu.

Sovet imperiyasının tərkibində olmasına baxmayaraq, Azərbaycan xalqı azadlıq arzusunu heç vaxt itirmədi. 1991-ci ilin oktyabrında isə bu arzu reallığa çevrildi. O gün Azərbaycan xalqı öz taleyinin sahibi oldu, milli iradəsini təsdiq etdi. Ədalət Hacıyev bu barədə belə deyir:“Hər bir xalqın tarixində elə anlar olur ki, onlar millətin varlığına, onun ruhuna yeni nəfəs verir. 18 oktyabr da məhz belə bir gündür. Bu tarix millətimizin dirçəlişini, müstəqil düşüncəsinin bərpasını simvolizə edir.”

Müstəqilliyin bərpası nə qədər mühüm idisə, onu qoruyub saxlamaq bir o qədər çətin idi. XX əsrin 90-cı illərinin əvvəllərində ölkəmiz böyük sınaqlarla üzləşmişdi – siyasi böhran, iqtisadi çətinliklər, separatizm meyilləri və xarici təhdidlər müstəqilliyimizi təhlükə altına salmışdı.

Lakin Ulu Öndər Heydər Əliyevin siyasi iradəsi, uzaqgörənliyi və müdrikliyi sayəsində Azərbaycan bu çətinliklərdən üzüağ çıxmağı bacardı. O, dövlətçiliyi möhkəmləndirdi, xalqı bir amal – müstəqil və güclü Azərbaycan ideyası ətrafında birləşdirdi.

Ədalət Hacıyev Ulu Öndərin xidmətlərini dərin minnətdarlıqla qeyd edir:“Əgər bu gün biz sabit və qüdrətli bir dövlətdə yaşayırıqsa, bu, Ulu Öndər Heydər Əliyevin yaratdığı möhkəm siyasi təməlin nəticəsidir. O, müstəqilliyimizi qorudu, onu əbədi və dönməz etdi.”

Bu gün Azərbaycan Prezidenti İlham Əliyevin rəhbərliyi altında müstəqilliyimiz daha da güclənib, ölkəmiz regionun lider dövlətinə çevrilib. Müstəqillik artıq təkcə siyasi deyil, həm də iqtisadi və mədəni güc anlamını daşıyır.

Ədalət Hacıyev qeyd edir ki, “Prezident İlham Əliyevin müdrik siyasəti nəticəsində Azərbaycan həm iqtisadi, həm də mənəvi cəhətdən tam müstəqil dövlətə çevrilib. 44 günlük Vətən müharibəsində əldə etdiyimiz tarixi Qələbə bunun ən parlaq sübutudur. O Qələbə müstəqilliyimizin, dövlətçiliyimizin və milli birliyimizin təntənəsidir.”

Müstəqilliyin ən böyük nailiyyətlərindən biri də milli mədəniyyətimizin və incəsənətimizin inkişafı, öz azad yaradıcılıq ruhunu qazanmasıdır. Akademik Rus Dram Teatrı da bu dövrdə yeni inkişaf mərhələsinə qədəm qoyub.

Ədalət Hacıyevin rəhbərliyi altında teatrda müasir tamaşalar səhnələşdirilir, gənc istedadlara dəstək verilir, milli-mənəvi dəyərlər təbliğ olunur. O, hesab edir ki, mədəniyyət bir millətin ruhudur, müstəqilliyin isə ən gözəl ifadəsi azad yaradıcılıq mühitidir.

“Müstəqillik bizə yalnız siyasi azadlıq gətirmədi, həm də düşüncə və yaradıcılıq azadlığını qazandırdı. Azərbaycan teatrı, musiqisi, ədəbiyyatı bu gün məhz bu azadlığın bəhrəsini yaşayır.” – deyə Ədalət Hacıyev vurğulayır.

18 oktyabr təkcə bir tarix deyil, həm də hər bir azərbaycanlının qəlbində yaşayan qürur və iftixar günüdür. O, xalqın azadlıq iradəsini, dövlətimizin gücünü və vətəndaş həmrəyliyini simvolizə edir.

Akademik Rus Dram Teatrının direktoru Ədalət Hacıyev sonda bildirir:“Müstəqillik bizim milli kimliyimizin əsas dayağıdır. Onu qorumaq, yaşatmaq və daha da gücləndirmək hər bir azərbaycanlının borcudur. Biz birlikdə olduqca, dövlətimiz möhkəm, müstəqilliyimiz isə əbədi olacaq.”

Bu sözlər bir mədəniyyət xadiminin, bir vətəndaşın və bir azərbaycanlının ürək səsidir.
Yaşasın müstəqil Azərbaycan! Yaşasın 18 oktyabr – milli qürur və azadlıq günümüz.

Fərid Faiqoğlu

Xezertv.info-nun rəhbəri

AJB-nin üzvü