“Məhəllə-məhəllə gəzib, təmiz analiz nəticələrimi paylaşacağam” - İrem Derici

İstanbul Respublika Prokurorluğunun narkotik maddələrin istifadəsinə dair istintaqı çərçivəsində dindirilən məşhur müğənni İrem Derici mətbuat qarşısına çıxaraq açıqlama verib.

“Qafqazinfo”nun məlumatına görə, Məhkəmə-Tibbi Ekspertiza Mərkəzində qan, sidik və saç nümunələri verən İrem Derici jurnalistlərə bildirib ki, lazım gəlsə, məhəllə-məhəllə gəzib, təmiz və qüsursuz analiz nəticələrini hər kəslə paylaşacaq.

Sevgilisi Melih Kunukçu ilə üzük taxaraq kameralar qarşısına çıxan müğənni nəticələrin hər kəs tərəfindən düzgün və şəffaf şəkildə işıqlandırılmasını istəyib:

“Mən də xahiş edirəm, bu gün hər yerdə yayılan bu xəbərlə yanaşı, mənim qüsursuz nəticələrimi da paylaşasınız”.

İstanbul Respublika Prokurorluğunun Qaçaqmalçılıq, Narkotik və İqtisadi Cinayətlər üzrə İstintaq Bürosu tərəfindən aparılan istintaq çərçivəsində bir sıra tanınmışlardan qan, sidik və saç nümunələri götürülüb.

Məsələ ilə bağlı yeni açıqlamalar gələn günlərdə gözlənilir.