“Həyatını şəfa verməyə həsr etmiş Adil Cəbiyev 75 yaşını qeyd edir”

Bu gün Adil Cəbiyev ömrünüzün 75-ci baharını qeyd edir. Ömrün bu zirvəsi həm bir insanın şəxsi həyat yolunun, həm də onun cəmiyyət və dövlət üçün göstərdiyi xidmətlərin rəmzidir. Əslən Azərbaycanın dilbər güşələrindən olan Masallı rayonunun Ərkivan qəsəbəsində dünyaya göz açaraq ömrünüzü xalqımıza, onun sağlamlığına və rifahına həsr etməyiniz böyük fədakarlıq nümunəsidir. Uşaqlıq illərindən zəhmətsevər, işgüzar və insanlara fayda vermək arzusu ilə böyümüsünüz. Bu yol Sizə həkim peşəsini seçmək kimi müqəddəs bir vəzifə bəxş edib.

Həkim olmaq sadəcə bir ixtisas deyil, bu, insan həyatının xilaskarı olmaq, hər gün insanlara ümid, şəfa, yaşamaq sevinci bəxş etməkdir. Siz də uzun illər boyu səhiyyə sahəsində yorulmadan çalışaraq yüzlərlə, minlərlə insana sağlamlıq bəxş etmisiniz. Əmək fəaliyyətiniz boyu qazandığınız hörmət, insanların Sizə göstərdiyi etimad bunun bariz sübutudur. Adil müəllim deyəndə hər kəsin yadına işinə məsuliyyətlə yanaşan, xəstələrinə həssaslıqla, mərhəmətlə yanaşan, peşəsini vicdanla yerinə yetirən bir həkim obrazı gəlir.

Sizin həyat yolunuzun bir başqa qürurverici səhifəsi də Azərbaycanın tibb elminə və səhiyyə sahəsinə böyük töhfələr vermiş görkəmli alim, Masallı rayonunun ilk tibb elmləri doktoru, professor Əvəz Cəbiyevin qardaşı oğlu olmağınızdır. Əminizin adını daşıyan Masallı Rayon Mərkəzi Xəstəxanası bu gün də yüzlərlə insana xidmət göstərir və bu, Sizin ailənin elmə və səhiyyəyə verdiyi töhfələrin daimi yadigarıdır. Siz öz əməyinizlə həmin şərəfli yolun davamçısı olmusunuz.

Bu gün 75 illik ömrünüzə nəzər salanda fəxrlə deyə bilərsiniz ki, həyatınızı mənalı yaşamısınız. Siz yalnız peşəkar həkim kimi deyil, həm də ailəsinə, dostlarına, həmkarlarına sadiq bir insan kimi tanınırsınız. Doğmalarınız Sizi ailə dəyərlərinə bağlı, mərhəmətli və qayğıkeş bir insan kimi tanıyır. Dostlarınız və həmkarlarınız isə hər zaman Sizin dürüstlüyünüzü, sadəliyinizi, mehribanlığınızı yüksək qiymətləndiriblər.

Bu əlamətdar gündə Sizi ürəkdən təbrik edir, uzun ömür, möhkəm cansağlığı, ailə səadəti və yeni-yeni uğurlar arzulayırıq. İllər Sizə yalnız müdriklik, zəngin həyat təcrübəsi və böyük hörmət qazandırıb. Sizin simanızda gənc nəsil üçün örnək olan bir ziyalı, vətəninə xidmət edən bir insan görürük.

Arzumuz budur ki, qarşıdakı illəriniz də sağlamlıqla, xoşbəxtliklə, doğmalarınızın məhəbbəti və dostlarınızın hörməti ilə keçsin. Sizin həyat yolunuz, zəhmətkeşliyiniz və peşənizə sədaqətiniz hər zaman gənclərə nümunə olsun.

Ad gününüz mübarək, əziz Adil müəllim! 75 illik yubileyiniz yeni uğurların, sağlamlığın və sevinclərin başlanğıcı olsun!

Təbrik edirik!

Fərid Faiqoğlu

“Xezertv.info”nun baş redaktoru

AJB-nin üzvü