Dövlətçilik tariximizdə yeni mərhələ başlayıb

Məşhur Məmmədov,
Millət vəkili

Prezident İlham Əliyevin 18 sentyabr 2024-cü il tarixli Sərəncamı ilə təsis edilən 20 Sentyabr – Xankəndi, Xocalı, Xocavənd və Ağdərə şəhərləri günü Azərbaycan dövlətçiliyinin ən şanlı səhifələrindən birinin rəsmi qeydidir. Bu gün təkcə təqvimdə bir tarix deyil, həm də 30 ildən artıq davam edən işğala son qoyulmasının, xalqımızın milli iradəsinin və dövlətimizin gücünün təntənəsidir.

Xatırladaq ki, 2023-cü ilin sentyabrında keçirilən antiterror tədbirləri nəticəsində Azərbaycanın suverenliyi tam bərpa olundu, işğal və separatizmə birdəfəlik son qoyuldu. 20 sentyabr 2023-cü ildə Azərbaycan Bayrağının Xankəndi, Xocalı, Xocavənd və Ağdərə üzərində ucaldılması xalqımızın tarixi qürur anı oldu. Məhz bu məqam Prezident İlham Əliyevin qətiyyətli siyasətinin, Ali Baş Komandan kimi sarsılmaz iradəsinin parlaq təzahürü idi. Ardınca isə 8 noyabr 2023-cü ildə keçirilən Zəfər paradı Qarabağda və Şərqi Zəngəzurda Azərbaycanın ərazi bütövlüyünün bərpasının rəsmi təntənəsi kimi tarixə düşdü.

Dövlət başçısının ardıcıl səfərləri bu günlərin təkcə hərbi-siyasi yox, həm də sosial-iqtisadi baxımdan tarixi dönüş nöqtəsi olduğunu təsdiqləyir. 2024-cü ilin mayında Prezident İlham Əliyev və Birinci vitse-prezident Mehriban Əliyeva Xankəndi şəhərində Qarabağ Universitetinin təməlini qoydular. Bu hadisə Qarabağın gələcəyi üçün strateji əhəmiyyət daşıyır: Universitet həm təhsil, həm elm, həm də cəmiyyət üçün güclü intellektual mərkəzə çevriləcək.

Prezident İlham Əliyevin tapşırığı ilə əsası qoyulan Qarabağ Universiteti təkcə təhsil müəssisəsi deyil, həm də Azərbaycanın azad olunmuş ərazilərində yenidənqurma və intellektual inkişafın rəmzinə çevrilir. Bu universitetin açılması, əslində, Qarabağın elm və bilik paytaxtı kimi formalaşmasının başlanğıcıdır.

Qarabağ Universitetinin yaradılması bölgənin sosial-iqtisadi həyatına yeni nəfəs gətirəcək, minlərlə gəncə öz doğma torpaqlarında təhsil almaq imkanı verəcək, xaricdən və ölkənin digər bölgələrindən gələcək tələbələrin hesabına Qarabağın mədəni-mənəvi cazibəsini artıracaq.

Universitet yalnız auditoriya və laboratoriyalarla məhdudlaşmayacaq. Burada elmi-tədqiqat mərkəzləri, startap inkubatorları, texnoparklar fəaliyyət göstərəcək. Yəni Qarabağ Universiteti gələcəyin elm-texnologiya hub-ı olacaq.

Beynəlxalq əməkdaşlığa tövhə verəcək bu təhsil ocağı dünyanın nüfuzlu universitetləri ilə birgə proqramlar, tələbə-müəllim mübadiləsi həyata keçiriləcək.

Universitetin fəaliyyəti sayəsində bölgədə xidmət sektoru, yaşayış, ictimai nəqliyyat və infrastruktur sürətlə inkişaf edəcək, yerli sahibkarlarla əməkdaşlıq əsasında innovativ layihələr hazırlanacaq.

Qarabağ Universiteti həm də qayıdışın, dirçəlişin və gələcəyə inamın rəmzidir. İşğal dövründə dağıdılmış şəhərlərin yerində indi müasir elm və bilik ocağı yüksəlir. Bu, Azərbaycan dövlətinin “Böyük Qayıdış” siyasətinin ən parlaq nümunələrindən biridir.

Azərbaycan dövlətinin güclü idarəçilik siyasətinin daha bir bariz nümunəsi Ağdərə rayonunun yaradılması oldu. 2024-cü ilin noyabrında Prezidentin müvafiq Sərəncamı ilə tarixi ədalət bərpa edildi, Ağdərə rayonu inzibati xəritəmizə yenidən daxil edildi. Bu qərar həm dövlətçilik ənənələrimizin, həm də milli tarixi yaddaşımızın qorunmasının göstəricisidir.

Prezident İlham Əliyevin Xankəndi, Xocavənd, Xocalı və Ağdərə şəhərlərinə ardıcıl səfərləri bu bölgələrin bərpa və inkişafının dövlətin prioriteti olduğunu bir daha nümayiş etdirdi. Bu səfərlərdə təqdim olunan sosial infrastruktur layihələri, yol, məktəb, mədəniyyət və səhiyyə obyektlərinin tikintisi bölgənin yeni həyatına start verdi. Xüsusən də Xocalıya ilk köçün başlanması tarixi ədalətin bərpasının ən parlaq göstəricilərindəndir.

Prezident İlham Əliyevin Xocalıya səfəri və burada ilk köç prosesi ilə bağlı açıqlamaları Qarabağın Azərbaycan həyatına sürətli reinteqrasiyasının göstəricisidir. Ən faciəli səhifələrdən biri olan Xocalının bu gün yenidən dirçəlməsi dövlətimizin gücünü, xalqımızın dözümünü və gələcəyə olan inamını nümayiş etdirir.

Eyni zamanda Ağdərəyə səfər və burada aparılan işlər də bölgənin bərpasına dövlətin xüsusi diqqətinin sübutudur. Bu addımlar göstərir ki, Azərbaycan yalnız hərbi-siyasi qələbə ilə kifayətlənmir, həm də işğaldan azad olunmuş torpaqları qısa zamanda abad və firavan məkanlara çevirir.

20 Sentyabrın rəsmi olaraq qeyd edilməsi bir daha sübut edir ki, Azərbaycan dövlətinin hər bir qərarı milli maraqlara xidmət edir, xalqımızın tarixi yaddaşını möhkəmləndirir. Prezident İlham Əliyevin rəhbərliyi ilə həyata keçirilən siyasət nəticəsində suverenlik bərpa olunub, ədalət təmin edilib, tarixi qürurumuz geri qaytarılıb.

Hər birimiz bu siyasətin tam dəstəkçiləriyik. Çünki hər bir qərarın arxasında dövlətimizin güclənməsi, xalqımızın rifahı və sabit gələcəyimiz dayanır. 20 Sentyabr – Xankəndi, Xocalı, Xocavənd və Ağdərə günü tariximizin qəhrəmanlıq səhifəsidir və biz bu günün qürurunu gələcək nəsillərə ötürəcəyik.