“Böyük Qayıdış” Gənclər Təşkilatı tərəfindən Müstəqillik Günü qeyd olunub

“Böyük Qayıdış” Gənclər Təşkilatı 28 May - Müstəqillik Günü ilə əlaqədar bir sıra tədbirlər keçirib.

Tədbirlər gənclərdə vətənpərvərlik ruhunun yüksəldilməsi, onların Azərbaycanın dövlətçilik ənənələri, milli şüurun formalaşması və müstəqillik tarixi haqqında məlumatlandırılması məqsədilə təşkil olunub.Təşkilatın idarə heyəti üzvlərinin, Vətən müharibəsi qazilərinin, Qayıdış Könüllülərinin və üzv gənclərin iştirakı ilə Fəxri xiyabanda ulu öndər Heydər Əliyevin məzarı ziyarət edilib. Daha sonra gənclər Azərbaycan Xalq Cümhuriyyətinin şərəfinə ucaldılmış “İstiqlal abidəsi”ni ziyarət ediblər.Tədbirlər çərçivəsində Azərbaycan İstiqlal Muzeyinə ekskursiya təşkil olunub. Ekskursiya zamanı gənclər tarixin müxtəlif mərhələlərində Azərbaycan xalqının müstəqillik uğrunda apardığı mübarizəsini, müstəqillik tarixini özündə əks etdirən eksponatlarla, nadir arxiv sənədləri ilə, fotoşəkillər və numizmatik kolleksiyalarla yaxından tanış olublar.Ekskursiya gənclər üçün yalnız tarixi biliklər baxımından deyil, həm də emosional və mənəvi baxımdan yaddaqalan olub. Onlar muzeydəki tarixi faktlarla tanış olduqca, Azərbaycanın azadlıq və suverenlik yolunda keçdiyi mübarizəni daha dərindən dərk ediblər və bu dəyərləri qorumağın nə qədər vacib olduğunu bir daha anlayıblar.Tədbirlər zamanı xüsusi qeyd olunub ki, ulu öndər Heydər Əliyevin siyasi kursunun layiqli davamçısı, Azərbaycan Respublikasının Prezidenti, Müzəffər Ali Baş Komandan İlham Əliyevin həyata keçirdiyi qətiyyətli siyasət nəticəsində Azərbaycan xalqı ərazi bütövlüyü, suverenliyi təmin olunmuş ölkənin nümayəndələri kimi Müstəqillik Gününü əsl bayram əhvali-ruhiyyəsi ilə qeyd edir. Regionda baş verən bütün siyasi, iqtisadi proseslər də göstərir ki, qalib, qüdrətli dövlət olan Azərbaycanın müstəqilliyi əbədidir, dönməzdir, sarsılmazdır.