Lənkəran şəhər İcra hakimiyyətinin başçısı Taleh Qaraşov: “28 May-Müstəqillik Günü tariximizin şanlı səhifələrdəndir”

Azərbaycan xalqının tarixində elə günlər var ki, onlar nəinki bir dövrün siyasi hadisəsi, həm də bir millətin kimliyini, azadlıq əzmini və gələcəyə olan ümidini əks etdirir. 28 May – Müstəqillik Günü məhz belə tarixi hadisələrdən biridir. Bu günün tarixi və mənəvi əhəmiyyəti, Azərbaycanın müasir dövlətçilik yolunda tutduğu mövqe və xalqımızın milli dəyərlərə sədaqətini nümayiş etdirməsi baxımından xüsusi yer tutur. Lənkəran şəhər İcra Hakimiyyətinin başçısı Taleh Qaraşov da bu tarixi günün mahiyyətinə yüksək qiymət verərək bildirib: "28 May Müstəqillik Günü tariximizin şanlı səhifələrindəndir".

1918-ci ilin 28 mayında Azərbaycan Xalq Cümhuriyyətinin elan olunması ilə xalqımız ilk dəfə olaraq öz taleyini müstəqil şəkildə müəyyən etmək hüququnu reallaşdırdı. Bu, təkcə dövlətin qurulması deyil, həm də milli iradənin təntənəsi idi. Azərbaycan Xalq Cümhuriyyəti Şərqdə ilk demokratik respublika kimi yaranmaqla bütün müsəlman dünyasında bir nümunə yaratdı. O dövrdə qəbul edilən qərarlar – vətəndaş bərabərliyi, azad seçkilər, qadınlara səsvermə hüququ, mətbuat və söz azadlığı, milli ordu quruculuğu – müasir dövlətçilik tariximizin təməl prinsiplərini formalaşdırdı.

Taleh Qaraşovun sözlərinə görə, Azərbaycan Xalq Cümhuriyyətinin cəmi 23 ay yaşamasına baxmayaraq, onun qoyduğu ideoloji, hüquqi və institusional baza bu gün də müasir Azərbaycanın dövlət idarəçiliyində öz əksini tapır. “Cümhuriyyət qısa ömrü ərzində böyük işlər gördü. Onun mirası bu gün müstəqil Azərbaycan Respublikasında yaşayır və inkişaf edir. Prezident İlham Əliyevin rəhbərliyi ilə Azərbaycan bu idealları yaşadan və reallaşdıran müasir, qüdrətli bir dövlətə çevrilib,” – deyə Taleh Qaraşov vurğulayıb.

Lənkəran şəhəri də bu dövlətçilik yolunun fəal iştirakçısı, onun tərəqqisinə töhfə verən bölgələrdən biridir. Taleh Qaraşovun rəhbərliyi ilə son illər Lənkəranda aparılan sosial-iqtisadi islahatlar, infrastrukturun yenilənməsi, vətəndaş rifahının yüksəldilməsi sahəsində görülən işlər də bu ümumi inkişaf kursunun bölgə səviyyəsində əyani nümunəsidir. O bildirir ki, müstəqillik yalnız siyasi anlam daşımır, həm də insanların rifahını, regionların inkişafını, mədəni və mənəvi dəyərlərin qorunmasını təmin edən əsas faktordur: “Bugünkü Lənkəran bu müstəqilliyin bəhrələrini yaşayır. Biz 28 May tarixini qeyd etməklə təkcə keçmişi xatırlamırıq, həm də gələcəyə olan inamımızı bir daha nümayiş etdiririk.”

Azərbaycanın bugünkü inkişaf mərhələsi, Cümhuriyyətin əsasını qoyduğu prinsiplərin davamlı şəkildə reallaşdırılması ilə səciyyələnir. Taleh Qaraşovun sözlərinə görə, bu gün respublikamız regionda və dünyada söz sahibi olan bir dövlətə çevrilib. Azərbaycan Ordusunun gücü, iqtisadiyyatın dayanıqlığı, xalq-iqtidar birliyi və milli maraqlara əsaslanan xarici siyasət bunun bariz göstəricisidir. “44 günlük Vətən müharibəsində əldə edilən tarixi Zəfər bir daha sübut etdi ki, biz həm müstəqilliyimizi qorumağa, həm də onu əbədi yaşatmağa qadir bir xalqıq. Cümhuriyyətin ideyaları bu Qələbədə öz real təcəssümünü tapdı,” – deyə o qeyd edib.

Müstəqillik Günü eyni zamanda vətəndaş məsuliyyətini də aşılayan bir gündür. Taleh Qaraşov qeyd edir ki, hər bir azərbaycanlı öz sahəsində vicdanla çalışaraq bu dövlətin daha da güclənməsinə töhfə verməlidir: “Dövlətin inkişafı təkcə mərkəzi hakimiyyətin deyil, bölgələrdə çalışan hər bir məmurun, sahibkarın, ziyalının, gəncin və sadə vətəndaşın da məsuliyyətidir. Müstəqilliyi qorumaq onu əldə etməkdən daha çətindir. Bu səbəbdən biz daim ayıq olmalı, milli maraqları daim üstün tutmalıyıq.”

Lənkəran şəhərində 28 May – Müstəqillik Günü ilə bağlı keçirilən tədbirlər, maarifləndirici görüşlər, məktəblilər və gənclərlə keçirilən vətənpərvərlik aksiyaları bu günün mənəvi və ideoloji mahiyyətini daha da gücləndirir. Taleh Qaraşovun təşəbbüsü ilə regionun təhsil, mədəniyyət və sosial müəssisələrində Respublika Gününün əhəmiyyətinə dair silsilə tədbirlər təşkil olunur. Bu, gənc nəsildə milli kimlik şüurunun formalaşdırılmasına, tarixi yaddaşın qorunmasına xidmət edir.

Azərbaycan tarixinin ən şərəfli günlərindən olan 28 May yalnız bir bayram deyil, həm də milli ideologiyanın canlı yaşadılmasıdır. Taleh Qaraşov bildirir ki, dövlətin gücü yalnız onun iqtisadi və hərbi imkanları ilə deyil, eyni zamanda xalqın vətənpərvərliyi, milli dəyərlərə sədaqəti və tarixi köklərə bağlılığı ilə ölçülür. “Bu mənada 28 May bizi birləşdirən, gələcəyə doğru ruhlandıran və hər zaman xatırlanmalı olan bir gündür,” – deyə o vurğulayır.

Bu gün Azərbaycan müstəqil, güclü və sabit bir dövlətdir. Bütün sahələrdə əldə olunan nailiyyətlər, beynəlxalq müstəvidə artan nüfuz, ərazi bütövlüyümüzün bərpası ilə nəticələnən müzəffər siyasət, Prezident İlham Əliyevin rəhbərliyi ilə həyata keçirilən ardıcıl və uzaqgörən dövlət strategiyasının nəticəsidir. Taleh Qaraşov qeyd edir ki, Lənkəran sakinləri bu müstəqillik yolunun davamlı olması üçün hər zaman Prezidentin ətrafında sıx birləşmişdir və ölkəmizin gələcəyinə böyük inamla baxırlar.

Taleh Qaraşov vurğulayır ki, 28 May bizim milli iradəmizin, mədəni özünüdərkimizin və azadlıq arzularımızın simvoludur. Bu günün mahiyyətini dərk etmək, onu yaşatmaq və gələcək nəsillərə ötürmək hər bir azərbaycanlının borcudur. Bu günün dəyərini artıran əsas faktor isə onun xalqın iradəsindən doğması və bu iradənin bu gün də dəyişməz olaraq qalmasıdır.

Beləliklə, 28 May – Müstəqillik Günü xalqımızın şərəfli tarixinin ən parlaq səhifələrindən biridir və bu gün Azərbaycan cəmiyyəti bu tarixi yaddaşla fəxr edir, ona sahib çıxır və gələcək nəsillərə ötürmək üçün yorulmadan çalışır.

Hazırladı:

Fərid Faiqoğıu

"Xezertv.info"nun rəhbəri,

AJB-nin üzvü