Üzeyir bəyin hələ də yaşadığına əmin olan müəllimlərimiz varmış...
Bu günlərin ən çox müzakirə olunan mövzularından biri musiqi məktəbləri müəllimlərinin attestasiyasıdır. Niyə bu müəllimləri 30 il ərzində ilk dəfə olaraq attestasiya edirlər? Camaatın çörəyinə niyə bais olurlar? 30 ilin müəllimini də attestasiya edərlər? - Bunlar sosial mediada ən çox səsləndirilən suallardandır.
Əslində isə nə baş verir?
Mədəniyyət Nazirliyi ötən il bəyan etdi ki, müəllimlərin qiymətləndirməsini edəcək. Özü də söz verdi ki, hər şey şəffaf olacaq. Beləliklə, söz verdiyi vaxtda, fevralda attestasiyanı başladı. 1700 müəllim 14 gün ərzində attestasiya olundu.
1183 nəfər müəllim uğurla attestasiya olundu, o cümlədən bunlardan 650 nəfəri ən yüksək nəticə ilə prosesi yekunlaşdırdı.
Nəticələr belədir:
3 lehinə - 309 nəfər
4 lehinə - 224 nəfər
5 lehinə - 650 nəfər
Eyni zamanda 490 nəfər attestasiyanı keçə bilmədi, o cümlədən
0 lehinə - 107 nəfər
1 lehinə - 273
2 lehinə – 112
Yuxarıda qeyd olunan nəticələr həm də bizim musiqi məktəblərinin keyfiyyət göstəriciləridir, yaxşısı ilə, yaxşı olmayanı ilə. Məsələn, bizim Mərdəkan və ya Lökbatan kimi musiqi məktəblərimizdə elə müəllimlər var ki, heç onlardan Bakının mərkəz məktəblərində tapmazsan.
“Qafqazinfo”nun Modern.az-a istinadən məlumatına görə, attestasiya zamanı aydın oldu ki, bizim heç demə elə müəllimlərimiz var ki, onlar İohan Sebastyan Baxın ağdamlı olduğunu biliblər və ya böyük Üzeyir Hacıbəylinin hələ də yaşadığına əmindilər.
Hətta bizim elə müəllimləri attestasiya üzə çıxarıb ki, həmin müəllim tək barmaqla pianino ifa edirmiş. Bütün bunlar müəllimlərin attestasiyasının ayrı-ayrı nəticələridir.
Fortepiano müəlliminin 40 illik əmək fəaliyyəti dövründə təxminən 100-120, nəzəriyyə müəlliminin isə 480-500 məzunu ola bilər. Müəyyən sayda attestasiyada uğur qazana bilməyən müəllimlərin əmək müqaviləsinə xitam vermək həqiqəti ilə üz-üzə qalınacaq. Həmin təhsilverənlərlə bağlı yanaşma ondan ibarətdir ki, bu addım daha kiçik sayda qrupun sosial problemi deməkdir, nəinki qrupun gələcəkdə yarada biləcəyi fəsadların böyüklüyü. Nəzərə almaq lazımdır ki, bir fortepiano müəllimi öz fəaliyyəti dövründə təxminən 100-120 aralığında şagirdə dərs keçir. Ona görə də peşəkarlıq səviyyəsi yerində olmayan şəxs məktəbdə olduğu dövrdə təxminən 100 dəfə özündən daha çox problem yaradır. Bunun qarşısını nə qədər tez alınırsa, musiqi mədəniyyətimizə o qədər çox töhvə vermiş olarıq.
Təəssüflər olsun ki, musiqi və incəsənət məktəblərində 90-cı illərdə mövcud olmuş və qeyri-qanuni fəaliyyət göstərən “orta ixtisas və ali təhsil” müəssisələrinin məzunu olmuş yüzlərlə saxta diplomlu müəllim fəaliyyət göstərir. Attestasiyadan da göründüyü kimi, onların böyük əksəriyyətinin bilik və bacarıq göstəricilər bitirdikləri təhsil müəssisələrinin səviyyəsinə uyğun olub.
Attestasiya zamanı bir acı həqiqət də üzə çıxdı ki, uyğun nəticə göstərə bilməyən müəllimlərin 86 faizi orta ixtisas müəssisələrinin məzunlarıdır. Bu müəllimlərin təkcə 300 nəfəri iki kollecin payına düşür: 135 nəfəri vaxtilə Asəf Zeynallı adına adlandırılan Bakı Musiqi kolleci və 165 nəfəri isə Sumqayıt Musiqi kollecinin məzunlarıdır.
Uyğun nəticə göstərməyən müəllimlərin 37 nəfər müəllim 3 stavka 36 saatlıq dərs saatına malik olub. Ümumiyyətlə, attestasiyada uğurlu nəticə göstərməyən müəllimlərin 27 faizdən çoxu məktəblərdə minimum 2 stavka dərs deyiblər. Eləcə də, ən azı yarısı 18-24 saat, başqa sözlə desək stavka yarım dərs deyiblər.
Təəssüflər olsun ki, həm Bakı, həm Sumqayıt, həm də Abşeronda fəaliyyət göstərən elə məktəblər var ki, burada çalışan və attestasiyada iştirak edən müəllimlərin təxminən 50 faizi uyğun olmayıb.
Təbii ki, attestasiya hələ yolun başlanğıcıdır. Bizim musiqi məktəblərində hələ də 1963-ci ilin dərsliklərlərindən istifadə olunur. Bu islahatlar davamlı olmasa yəqin ki mədəniyyətimizin sabahı ilə bağlı da çox aydın düşünə bilməyəcəyik.
Sonda Bakı və Sumqayıtın attetasiyada uğurlu və uğursuz nəticələri olan məktəblərinin siyahısını təqdim edirik. Nəticələri müqayisə etməyi isə oxuyucuya buraxırıq.
Attestasiyada uğurlu olan məktəblər:
1. Bakı şəhər 27 nömrəli Uşaq Musiqi Məktəbi - 1 nəfər
2. Bakı şəhər Əfrasiyab Bədəlbəyli adına 23 nömrəli Onbirillik Musiqi Məktəbi - 1 nəfər
3. Bakı şəhər Şövkət Ələkbərov adına 20 nömrəli Onbirillik Musiqi Məktəbi - 1 nəfər
4. Bakı şəhər Tofiq Quliyev adına 12 nömrəli Onbirillik Musiqi Məktəbi - 1 nəfər
5. Bakı şəhər Fikrət Əmirov adına 6 nömrəli 11 illik İncəsənət Məktəbi - 1 nəfər
6. Bakı şəhər Georgi Şaroyev adına 35 nömrəli Onbirillik Musiqi Məktəbi - 1 nəfər
7. Bakı şəhər Cabbar Qaryağdıoğlu adına 9 nömrəli Uşaq Musiqi Məktəbi - 2 nəfər
8. Bakı şəhər Rəşid Behbudov adına 2 nömrəli Onbirillik Musiqi Məktəbi - 2 nəfər
9. Bakı şəhər 5 nömrəli Uşaq İncəsənət Məktəbi - 2 nəfər
10. Bakı şəhər Qara Qarayev adına Mərkəzi İncəsənət Məktəbi - 3 nəfər
Attestasiyada daha çox uyğun olmayan nəticələri ilə “fərqlənən” məktəblər:
1.Abşeron rayon Saray qəsəbə Uşaq İncəsənət Məktəbi - 22 nəfər
2. Abşeron rayon Xırdalan şəhər Onbirillik Musiqi Məktəbi - 28 nəfər
3. Bakı şəhər 30 nömrəli Uşaq Musiqi Məktəbi - 22 nəfər
4. Bakı şəhər 33 nömrəli Uşaq Musiqi Məktəbi - 14 nəfər
5. Bakı şəhər 36 nömrəli Uşaq Musiqi Məktəbi - 18 nəfər
6. Bakı şəhər Arif Məlikov adına 11 nömrəli Onbirillik Musiqi Məktəbi - 17 nəfər
7.Bakı şəhər Gülarə Əliyeva adına 3 nömrəli Uşaq İncəsənət Məktəbi - 16 nəfər
8. Bakı şəhər Hüseynqulu Sarabski adına 7 nömrəli Uşaq Musiqi Məktəbi - 15 nəfər
9. Bakı şəhər Kövkəb Səfərəliyeva adına 16 nömrəli Uşaq Musiqi Məktəbi - 18 nəfər
10. Bakı şəhər Rafiq Babayev adına 25 nömrəli Onbirillik Musiqi Məktəbi - 17 nəfər
11.Bakı şəhər Rauf Hacıyev adına 15 nömrəli Onbirillik Musiqi Məktəbi - 10 nəfər
12.Sumqayıt şəhər Bülbül adına 2 nömrəli Uşaq İncəsənət Məktəbi - 30 nəfər
13.Sumqayıt şəhər Fikrət Əmirov adına 5 nömrəli Uşaq Musiqi Məktəbi - 20 nəfər
14.Sumqayıt şəhər Hacı Zeynalabdin qəsəbə Əhməd Bakıxanov adına 1 nömrəli Uşaq İncəsənət Məktəbi - 14 nəfər
15.Sumqayıt şəhər Qara Qarayev adına 1 nömrəli Uşaq Musiqi Məktəbi - 26 nəfər
16.Sumqayıt şəhər Səid Rüstəmov adına 3 nömrəli Uşaq İncəsənət Məktəbi - 55 nəfər.
