"Bu addım tezliklə sülh müqaviləsinin imzalanacağını göstərir" - Politoloq

 

Bunu Qaynarinfo-ya açıqlamasında politoloq Zərdüşt Əlizadə tezliklə Ankara ilə İrəvan arasında münasibətlərdə müsbət nəticənin olacağı barədə Ermənistan baş naziri Nikol Paşinyanın fikirlərini şərh edərkən deyib.

Zərdüşt Əlizadə bildirib ki, Azərbaycanla Türkiyənin mövqeləri bəllidir. Onlar öz siyasətlərini uyğunlaşdırır:

"Bu özünü xüsusən də Ermənistan istiqamətində göstərir. Hansısa bir tərəf Türkiyə ilə Ermənistan arasında münasibətlərin yaxın zamanlarda tənzimlənəcəyini deyirsə, deməli ondan əvvəl Bakı ilə İrəvan arasındakı münasibətlər tənzimlənəcək. Ona görə sözügedən açıqlamanı da tezliklə Azərbaycanla Ermənistan arasında sülh müqaviləsinin imzalanacağı kimi dəyərləndirmək olar. Belə ki, Türkiyə tərəfi Ermənistanın Azərbaycanla sülh müqaviləsi imzalamadığı dövr ərzində İrəvanla diplomatik münasibətlər qurmayacağını dəfələrlə bəyan edib. Görünən odur ki, Ankara bu vədinə də hər zaman əməl edir".

Politoloq bildirib ki, Ermənistan Bakı ilə sülh razılığına gəlmədən Türkiyə ilə əlaqələrdə müsbət irəliləyiş olmayacağını anlayır:

"Türkiyə ilə əlaqələrin qurulması Ermənistan üçün Qərbə çıxış baxımından olduqca vacib qapıdır. Bu mənada Türkiyə ilə ölkəsi arasında əlaqələrdə tezliklə nəticənin əldə ediləcəyilə bağlı Paşinyanın verdiyi açıqlama Azərbaycanla Ermənistan arasında sülh müqaviləsinin imzalanmasının yaxınlaşdığının da göstəricisi sayıla bilər".

Qeyd edək ki, Ermənistanın baş naziri Nikol Paşinyanın son çıxışı zamanı İrəvanla Ankara arasında aktiv dialoqun aparıldığını bildirib. "Türkiyə ilə dialoqu davam etdirəcəyik və davam etdiririk. Düşünürəm ki, Ermənistan və Türkiyə heç vaxt indiki kimi aktiv dialoqda olmayıblar. Əslində, Türkiyə ilə ünsiyyət üçün heç bir maneə yoxdur və biz davamlı təmasdayıq. Tezliklə nəticə əldə olunacaq", deyə Paşinyan vurğulayıb.