İlham Əliyevin uğurlu siyasəti qalib Azərbaycanın gücü

Azərbaycan Respublikasının Prezidenti, Müzəffər Ali Baş Komandan İlham Əliyevin 63 yaşı tamam olması Azərbaycan xalqı üçün əlamətdar bir hadisədir. Bu gün ölkəmiz yalnız bir liderin doğum gününü qeyd etmir, eyni zamanda onun rəhbərliyi ilə qazanılmış möhtəşəm uğurların bir daha dəyərləndirildiyi bir gündür. Prezident İlham Əliyev illər ərzində öz uzaqgörən siyasəti, qətiyyətli addımları və xalqına olan sevgisi ilə bütün azərbaycanlıların qəlbində xüsusi yer tutmuşdur.
Onun rəhbərliyi altında Azərbaycan regionun lider dövlətinə çevrilmiş, iqtisadi inkişafın yeni mərhələsinə qədəm qoymuşdur. Enerji sektorundakı irimiqyaslı layihələr, Azərbaycanın dünya enerji bazarında mövqeyini möhkəmləndirməklə yanaşı, qeyri-neft sektorunun inkişafına da zəmin yaratmışdır. Prezident İlham Əliyevin məqsədyönlü siyasəti nəticəsində kənd təsərrüfatı, turizm, sənaye və innovasiya sahələrində mühüm irəliləyişlər əldə olunmuşdur. Bu gün Azərbaycan iqtisadiyyatı sabit və dayanıqlıdır ki, bu da Prezidentin liderlik bacarığının bariz göstəricisidir.
Xalqın rifahı Prezident İlham Əliyevin daim diqqət mərkəzində olmuşdur. Onun rəhbərliyi ilə reallaşdırılan sosial proqramlar, xüsusilə şəhid ailələrinə, qazilərə və aztəminatlı ailələrə göstərilən dəstək, dövlətin vətəndaşlara qayğısının aydın təcəssümüdür. "ASAN xidmət" modeli dünyanın bir çox ölkələri üçün nümunə olaraq göstərilir və Azərbaycan vətəndaşlarına dövlət xidmətlərinin daha sürətli və şəffaf şəkildə göstərilməsini təmin edir. Bu yenilikçi yanaşma, Prezident İlham Əliyevin idarəetmədə müasir yanaşmalara üstünlük verdiyini göstərir.
2020-ci ildə Azərbaycan xalqı tarixində ən şanlı səhifələrdən birini yaşadı. Prezident İlham Əliyevin qətiyyəti, uzaqgörən siyasəti və Müzəffər Ali Baş Komandan kimi liderliyi sayəsində Azərbaycan Ordusu 44 günlük Vətən müharibəsində parlaq qələbə qazandı. Torpaqlarımızın işğaldan azad edilməsi ilə xalqımız tarixi ədaləti bərpa etdi və Qarabağın mədəni, sosial və iqtisadi bərpasına doğru inamla irəliləməyə başladı. Bu tarixi zəfər Prezident İlham Əliyevin sarsılmaz iradəsinin və xalqına olan dərin sevgisinin təzahürü idi.
Prezident İlham Əliyevin xarici siyasətdəki uğurları da böyük əhəmiyyət kəsb edir. Azərbaycan dünya arenasında etibarlı tərəfdaş kimi tanınır və regionda sabitliyin təmin edilməsində mühüm rol oynayır. Qoşulmama Hərəkatına sədrliyi, beynəlxalq təşkilatlarda apardığı uğurlu diplomatiya Azərbaycanın milli maraqlarının qorunmasında mühüm əhəmiyyət daşıyır. Prezidentin balanslı və praqmatik xarici siyasəti ölkəmizin beynəlxalq mövqeyini daha da gücləndirmişdir.
Mədəniyyətin inkişafı və Azərbaycanın zəngin mədəni irsinin qorunması da Prezident İlham Əliyevin fəaliyyətində xüsusi yer tutur. Şuşanın azad edilməsi ilə Qarabağın mədəniyyət paytaxtı elan olunması və bu istiqamətdə atılan addımlar milli dəyərlərin yaşadılmasına xidmət edir. Heydər Əliyev Fondunun dəstəyi ilə təşkil edilən beynəlxalq festivallar, konfranslar və mədəni tədbirlər Azərbaycanın dünyadakı nüfuzunu daha da artırmışdır.
Azərbaycan xalqı Prezident İlham Əliyevin fəaliyyətini yüksək qiymətləndirir və onun rəhbərliyi altında ölkəmizin gələcəyinə böyük ümidlə baxır. Prezidentin hər bir addımı xalqın rifahının yüksəlməsinə və dövlətimizin daha da güclənməsinə yönəlmişdir. İlham Əliyev təkcə ölkənin lideri deyil, həm də xalqının xidmətçisi olduğunu öz fəaliyyəti ilə sübut etmişdir.
Bu əlamətdar gündə Prezident İlham Əliyevi 63 yaşı münasibətilə ürəkdən təbrik edirik. Ona möhkəm cansağlığı, uzun ömür və yorulmaz fəaliyyətində yeni uğurlar arzulayırıq. Xalqımız Sizin ətrafınızda sıx birləşmişdir və Azərbaycanın uğurlu gələcəyi naminə Sizin liderliyinizə tam etibar edir. Sizinlə qürur duyuruq, cənab Prezident! Doğum gününüz mübarək olsun!

Vüsalə Qurbanova
Sumqayıt şəhər Heydər Əliyev Mərkəzinin direktoru