Azərbaycanın seçki hüququ ilə Avropa İnsan Hüquqları Məhkəməsində uduzduğu işlərin sayı AÇIQLANDI

“Azərbaycan Avropa İnsan Hüquqları Məhkəməsində indiyə qədər seçki hüququ ilə bağlı 24 iş uduzub və 700 min avrodan çox cərimə ödənilib”.

Oxu.Az xəbər verir ki, bununla bağlı Hüquq və İnsan haqları İnstitutunun İdarə Heyətinin sədri Məhəmməd Quluzadə seçki hüququ ilə bağlı müraciətlərə baxılmasına həsr olunan seminarda məlumat verib.

O qeyd edib ki, bu işlər qərarlarda olan texniki yanlışlıqlarla bağlıdır:

“Təəssüf ki, Avropa Məhkəməsi bəzən ölkəmizə qarşı qərarlar çıxaranda siyasi mövqedən çıxış edir. Ona görə də hər hansı pozuntunu sənədləşdirəndə çox diqqətli olmaq lazımdır. Biz Avropa Məhkəməsinə əsas verməməliyik ki, ölkəmizə qarşı belə qərar çıxarsın”.