27 Sentyabr – Tariximizin qanla yazılmış şərəf səhifəsi

Taleh Qaraşov

Lənkəran Şəhər İcra Hakimiyyətinin başçısı

Bəzi tarixlər var ki, onları sadəcə xatırlamaq kifayət etmir. Həmin tarixlərin mənasını dərk etmək, o günlərdə yaşananları gələcək nəsillərə çatdırmaq və Vətən naminə canından keçənlərin qarşısında mənəvi borcumuzu unutmamaq lazımdır. 27 Sentyabr Azərbaycan xalqı üçün məhz belə tarixlərdəndir.

Bu tarix 2020-ci ilin payızında Azərbaycanın taleyində yeni bir səhifə açdı. Uzun illər ərzində torpaqlarımızın işğaldan azad olunacağına inamını qoruyan xalq həmin gün Vətənin müdafiəsi naminə bir yumruq kimi birləşdi. Azərbaycan əsgəri döyüş meydanında, xalqımız isə mənəvi cəbhədə öz sözünü dedi.

27 Sentyabrın tariximizdəki yeri yalnız 44 günlük müharibənin başlanğıcı olması ilə ölçülmür. Bu gün Azərbaycan xalqının öz dövlətinə, ordusuna və Vətəninə bağlılığının ən parlaq nümunələrindən biridir. Həmin günlərdə cəmiyyətin müxtəlif təbəqələrindən olan insanların eyni amal ətrafında birləşməsi milli həmrəyliyin gücünü ortaya qoydu.

Bu böyük tarixi yolun təməlində isə güclü Azərbaycan dövlətinin formalaşdırılması dayanır. Ulu Öndər Heydər Əliyevin Azərbaycan dövlətçiliyinin inkişafı naminə həyata keçirdiyi siyasət ölkəmizin gələcək uğurları üçün möhkəm zəmin yaratdı. Ulu Öndərin hakimiyyəti dövründə dövlətçilik ideyası möhkəmləndirildi, milli ordunun formalaşmasına və Azərbaycanın iqtisadi potensialının artırılmasına xüsusi diqqət yetirildi.

Heydər Əliyevin siyasi irsi Azərbaycan xalqı üçün yalnız keçmişin qiymətli mirası deyil, həm də müasir dövlətçilik tariximizin mühüm dayaqlarından biridir. Məhz güclü dövlət ideyası sonrakı illərdə Azərbaycanın qarşısında duran mühüm milli məsələlərin həlli istiqamətində imkanları genişləndirdi.

Bu siyasi kurs Prezident, Müzəffər Ali Baş Komandan cənab İlham Əliyevin rəhbərliyi ilə ardıcıl şəkildə davam etdirildi. Azərbaycan Ordusunun gücləndirilməsi, hərbi potensialın artırılması, müdafiə sənayesinin inkişaf etdirilməsi və ölkənin beynəlxalq mövqelərinin möhkəmləndirilməsi dövlət siyasətinin əsas istiqamətlərindən birinə çevrildi.  

2020-ci il sentyabrın 27-də isə Azərbaycan Ordusu öz qarşısında dayanan tarixi vəzifəni yerinə yetirməyə başladı. Döyüşlərin ilk günlərindən etibarən Azərbaycan əsgəri böyük iradə və qəhrəmanlıq nümayiş etdirdi. Hər qarış torpaq uğrunda ağır döyüşlər getdi. Bu mübarizənin ən ağır yükünü isə Vətən qarşısında borcunu canı ilə ödəyən şəhidlərimiz daşıdı.

Onların hər biri bir ailənin övladı, bir ananın ümidi, bir atanın fəxri, bir övladın atası idi. Onlar öz həyatlarını Azərbaycanın ərazi bütövlüyü naminə fəda etdilər. Bu səbəbdən şəhidlərimizin adı yalnız ailələrinin deyil, bütövlükdə Azərbaycan xalqının müqəddəs yaddaşına həkk olunub.

27 Sentyabr Anım Günü olaraq məhz bu böyük fədakarlığın qarşısında baş əymək üçün mühüm mənəvi gündür. Həmin gün şəhidlərimizin xatirəsi yad edilir, onların ailələrinə ehtiram göstərilir, qazilərimizin qəhrəmanlığı bir daha xatırlanır.

Vətən müharibəsi Azərbaycan xalqına birlik və həmrəyliyin nə qədər böyük gücə malik olduğunu bir daha göstərdi. Müharibə günlərində ölkənin müxtəlif bölgələrindən olan insanlar bir məqsəd ətrafında birləşdi. Kiminin övladı cəbhədə idi, kimi yaralı əsgərlər üçün yardım göstərirdi, kimi mənəvi dəstək verirdi. Amma hamının ürəyində eyni duyğu vardı – Vətən sevgisi.

Bu gün həmin tarixi günlər artıq keçmişin bir hissəsinə çevrilib. Lakin şəhidlərimizin xatirəsi bizim üçün keçmiş deyil. Onların adı məktəblərdə, küçələrdə, abidələrdə, ailələrin yaddaşında və xalqın qəlbində yaşayır.

İşğaldan azad edilmiş ərazilərdə bu gün aparılan genişmiqyaslı quruculuq işləri də həmin tarixi qələbənin nəticələrinin davamıdır. Vaxtilə dağıdılmış şəhər və kəndlər yenidən qurulur, insanlar doğma torpaqlarına qayıdır, yeni həyat canlanır. Bu mənzərə şəhidlərimizin uğrunda mübarizə apardığı Vətənin bu gün necə dirçəldiyini göstərir.

27 Sentyabr bizə bir daha xatırladır ki, müstəqillik və suverenlik böyük məsuliyyət tələb edir. Bu dəyərləri qorumaq hər bir vətəndaşın borcudur. Dövlətə sədaqət, Vətənə bağlılıq, milli-mənəvi dəyərlərə hörmət və şəhidlərin xatirəsinə ehtiram cəmiyyətimizin mənəvi dayaqlarıdır.

Bu gün Azərbaycan xalqı 27 Sentyabrı dərin ehtiram və qürur hissi ilə yad edir. Biz Vətən müharibəsində həyatını itirən qəhrəmanlarımızın qarşısında baş əyir, onların əziz xatirəsini daim yaşatmağı özümüzə borc bilirik.

Ulu Öndər Heydər Əliyevin qurduğu dövlətçilik məktəbi, Prezident, Müzəffər Ali Baş Komandan cənab İlham Əliyevin rəhbərliyi ilə həyata keçirilən dövlət siyasəti, Azərbaycan Ordusunun qəhrəmanlığı və xalqımızın həmrəyliyi tariximizin bu şərəfli səhifəsini formalaşdıran əsas amillərdəndir.

27 Sentyabr – şəhidlərimizin əziz xatirəsinin, Vətən sevgisinin və milli birliyimizin yaşadığı gündür. Bu tarix Azərbaycan xalqının yaddaşında daim ehtiramla anılacaq.