ADAU 5 il müddətinə institusional akkreditasiyadan uğurla keçib

Zəfər Qurbanov

Azərbaycan Dövlət Aqrar Universitetinin rektoru

Böyük məmnunluq hissi ilə paylaşmaq istəyirəm ki, Azərbaycan Dövlət Aqrar Universiteti (ADAU) Təhsildə Keyfiyyət Təminatı Agentliyi tərəfindən həyata keçirilən qiymətləndirmənin nəticələrinə əsasən 5 il müddətinə institusional akkreditasiyadan uğurla keçib.

Bu mühüm nailiyyət universitetimizdə təhsilin keyfiyyətinin təmin olunması, müasir idarəetmə prinsiplərinin tətbiqi, elmi-tədqiqat fəaliyyətinin inkişafı, beynəlxalq əməkdaşlığın genişləndirilməsi və tələbəyönümlü ali təhsil mühitinin formalaşdırılması istiqamətində görülən sistemli işlərin yüksək qiymətləndirilməsinin bariz göstəricisidir.

Əldə olunan bu nəticə Azərbaycan Dövlət Aqrar Universitetinin dayanıqlı inkişaf strategiyasına, beynəlxalq standartlara uyğun fəaliyyətinə və keyfiyyət mədəniyyətinin universitet həyatının ayrılmaz hissəsinə çevrilməsinə verilən etimadın ifadəsidir. Bu uğur, eyni zamanda, qarşımızda duran daha böyük hədəflərə doğru inamla irəliləməyimiz üçün mühüm stimul yaradır.

Bu əlamətdar uğur münasibətilə universitetimizin professor-müəllim heyətini, əməkdaşlarını, tələbələrini, məzunlarını və tərəfdaşlarımızı ürəkdən təbrik edir, bu nailiyyətin əldə olunmasına töhfə vermiş hər kəsə səmimi təşəkkürümü bildirirəm.

İnanıram ki, Azərbaycan Dövlət Aqrar Universiteti bundan sonra da milli aqrar təhsilin inkişafına, elmin və innovasiyaların gücləndirilməsinə, yüksəkixtisaslı kadrların hazırlanmasına öz töhfəsini verməyə davam edəcək və yeni uğurlara imza atacaq.