Səni xatırladıqca ürəyim fəxarətlə döyünür, Vətən oğlu...

“Bu dünya bir igid gördü” sənədli povestindən səhifələr...

Şəhid Vidadi Zalov haqqında

Mən, Ələkbərov Zaur Zakir oğlu, 20 ildən çox Azərbaycan Silahlı Qüvvələrinin xüsusi təyinatlı bölmələrində kəşfiyyat sahəsində xidmət etmiş, müxtəlif döyüş əməliyyatlarının və müharibələrin iştirakçısı olmuşam. Xidmətlərimə görə dəfələrlə Azərbaycan Respublikasının Prezidenti və Müdafiə Nazirliyi tərəfindən medallarla təltif olunmuşam. Hazırda təqaüddəyəm. Özümə mənəvi borc bilirəm ki, şəhid qardaşımız Vidadi Zalov haqqında qısa da olsa fikirlərimi bölüşüm.

Vidadi Zalov vətənini, xalqını və dövlətini hər şeydən üstün tutan, yüksək mənəvi keyfiyyətlərə malik olan hərbçi idi. O, milli-mənəvi dəyərlərimizə bağlı, bayrağımızı uca tutan, xalqının rifahını öz şəxsi mənafeyindən üstün sayan vətənpərvər bir insan kimi tanınırdı. Onun haqqında eşitdikcə və həyat yolunu araşdırdıqca bir daha əmin oluruq ki, Vidadi öz Vətənini canından da çox sevən qəhrəman oğullarımızdan biri olub.

Vətən müharibəsinin və çətin döyüş günlərinin başladığı vaxtlarda o, arxa cəbhədə xidmət etməyi özünə yaraşdırmayıb. Könüllü olaraq ön xəttə yollanıb. Çünki Vətən onu səsləyirdi, torpaqlarımızın azadlığı onu döyüş meydanına çağırırdı. O, bu çağırışa laqeyd qala bilmədi və silahdaşları ilə birlikdə ön sıralarda yer aldı.

Döyüş yoldaşlarının xatirələrindən məlum olur ki, Vidadi Zalov düşmənin hər bir təxribatına qarşı böyük cəsarətlə mübarizə aparırdı. Təhlükə qarşısında geri çəkilməyi düşünmür, əksinə, sinəsini qabağa verərək düşmənin üzərinə ildırım sürəti ilə irəliləyirdi. Onun üçün ən vacib olan məsələ Vətənin müdafiəsi, xalqımızın təhlükəsizliyi və dövlətimizin ərazi bütövlüyü idi.

Döyüşlərin birində o, əsl qəhrəmanlıq nümunəsi göstərərək komandirinin və döyüş yoldaşlarının həyatını qorumaq üçün özünü təhlükənin qarşısına verdi. Düşmənin atəşi altında belə geri çəkilmədi, son nəfəsinə qədər döyüşərək Vətənə olan sədaqətini sübut etdi. Məhz belə igid oğulların sayəsində Azərbaycan xalqı başıuca yaşayır, dövlətimiz daha da güclənir.

Şəhid Vidadi Zalovun həyat yolu hər bir Azərbaycan gənci üçün vətənpərvərlik məktəbidir. Onun göstərdiyi şücaət, mərdlik və fədakarlıq gələcək nəsillərə örnək olacaq. Şəhidlər ölmürlər, onlar xalqın qəlbində yaşayırlar. Vidadi Zalov da öz qəhrəmanlığı ilə Azərbaycan tarixində və xalqımızın yaddaşında əbədi yaşayacaqdır.

Allah bütün şəhidlərimizə rəhmət eləsin. Vidadi Zalovun əziz xatirəsi qarşısında baş əyir, onun ailəsinə və yaxınlarına dərin hüznlə başsağlığı verirəm. Ruhun şad olsun, qəhrəman Vətən oğlu. Sənin adın və qəhrəmanlığın Azərbaycan xalqının yaddaşında daim yaşayacaqdır.

Ruhuna ehtiramla əqidədaşın,

Vətən müharibəsi qəhrəmanı,

XTQ-nin baş giziri Zaur Ələkbərov