ABŞ ordusu İranın raket məntəqələrinə zərbələr endirib

Qaynarinfo-nun BBC-yə istinadla verdiyi xəbərə görə, ABŞ Mərkəzi Komandanlığı açıqlamasında bu hücumların "özünümüdafiə” məqsədilə həyata keçirildiyini və "İran qüvvələrinin yaratdığı təhdidlərdən əsgərlərimizi qorumağa” yönəldiyini bildirib.

Mərkəzi Komandanlığın sözçüsü, kapitan Tim Hokins (Tim Hawkins) bildirib ki, ABŞ ordusu "davam edən atəşkəs dövründə təmkinlə hərəkət edərək qüvvələrimizi müdafiə etməyə davam edir”.

Hücumlar İran Xarici İşlər Nazirliyinin sözçüsü İsmayıl Bəqainin  ABŞ-la aparılan danışıqlarda müəyyən irəliləyiş əldə edildiyini, lakin münaqişəni sona çatdıracaq yekun razılaşmanın hələ əldə edilmədiyini bildirdiyi vaxta təsadüf edir.

Hokinsin sözlərinə görə, hücumlar Bəndər-Abbas yaxınlığındakı əraziyə yönəlib. 

"New York Times”ın məlumatına görə, Bəndər-Abbas limanı  Hörmüz boğazında yerləşən İran donanmasının bazasına ev sahibliyi edir.

İran dövlət mediası daha əvvəl Bəndər-Abbasda partlayış səsləri eşidildikdən sonra yerli rəsmilərin araşdırma apardığını xəbər verib.

Rəsmi Tehran son ABŞ hücumlarına hələlik reaksiya verməyib. Bu hücumların ABŞ və İran arasında mümkün sülh sazişinə nə dərəcədə təsir edəcəyi məlum deyil.