“Mən əbədiyyət üfüqlərində doğan günəşəm” — Şəhid Vidadi Nizami oğlu Zalovun əziz xatirəsinə...

Bu Vətən elə oğullar yetişdirib ki, onların adı yalnız ailələrinin yox, bütöv bir xalqın yaddaşına həkk olunub. Torpağın hər qarışına sevgisini qanı ilə yazan belə qəhrəmanlardan biri də şəhid Vidadi Nizami oğlu Zalovdur. O, qısa, lakin mənalı ömrü ilə sübut etdi ki, Vətən sevgisi sadəcə söz deyil — bu, bir amal, bir inam, bir ömür yoludur. Vidadi Zalovun həyatı qəhrəmanlıq dastanı, şəhidliyi isə əbədiyyətə açılan müqəddəs bir qapıdır.

Bəzən insanlar dünyaya yaşamaq üçün gəlirlər, bəzən isə tarix yazmaq üçün... Vidadi Zalov məhz tarix yazmaq üçün doğulan igidlərdən idi. O, hələ uşaqlıq illərindən vətənpərvərliyi, mərdliyi və dürüstlüyü ilə seçilirdi. Doğmalarının, dostlarının və onu tanıyanların xatirələrində Vidadi həmişə gülərüz, qayğıkeş və qətiyyətli insan kimi yaşayır. Onun üçün Vətən anlayışı müqəddəs idi. Azərbaycan torpağının bütövlüyü, dövlətin şərəfi və xalqın ləyaqəti onun həyatının əsas mənası olmuşdu.

Vətən müharibəsinin alovlu günlərində minlərlə Azərbaycan oğlu kimi Vidadi Zalov da ön cəbhəyə yollandı. O bilirdi ki, qarşıda ölüm təhlükəsi var. Amma qorxmadı. Çünki qəhrəmanlar ölümə yox, şərəfsiz həyata nifrət edirlər. O, düşmən qarşısında sipər olub torpağımızın azadlığı uğrunda son nəfəsinə qədər mübarizə apardı. Azərbaycanın üçrəngli bayrağının işğaldan azad olunmuş torpaqlarda dalğalanması uğrunda canından keçən Vidadi Zalov, əslində, ölümsüzlüyə qovuşdu.

Şəhidlik zirvəsi hər kəsə nəsib olmur. Bu zirvəyə yalnız Vətənə sonsuz məhəbbəti olanlar yüksələ bilir. Vidadi Zalov da həmin müqəddəs zirvənin sakinlərindəndir. Onun adı indi qəhrəmanlıq, igidlik və vətənpərvərlik nümunəsi kimi çəkilir. Şəhidin müqəddəs ruhu xalqımızın qürur mənbəyinə çevrilib.

Bu gün şəhid analarının göz yaşında bir ağrı olduğu qədər, böyük bir qürur da var. Çünki onlar Vətən üçün oğul böyüdüblər. Vidadi Zalovun ailəsi də belə müqəddəs ailələrdəndir. Onlar qəhrəman bir oğul yetişdirərək Azərbaycan tarixinə adlarını yazdırıblar. Şəhid ailələrinin qarşısında baş əymək hər bir vətəndaşın mənəvi borcudur. Çünki bu torpağın azadlığı, bu xalqın sabahı məhz belə igidlərin qanı bahasına qorunub.

Vidadi Zalovun həyat yolu gənclər üçün əsl örnəkdir. Müasir dövrdə vətənpərvərlik hissinin daha da gücləndirilməsi üçün şəhidlərin qəhrəmanlığı daim təbliğ olunmalıdır. Çünki şəhidlər xalqın milli ruhudur. Onların xatirəsi yaşadıqca Vətən də yaşayacaq. Vidadi kimi oğullar Azərbaycan xalqının yenilməzliyinin sübutudur.

Şəhidlərin adı daşlara yox, ürəklərə yazılır. Vidadi Zalov da milyonların qəlbində yaşayan qəhrəmandır. O, fiziki olaraq aramızda olmasa da, ruhu daim bizimlədir. Qarabağın dağlarında əsən küləkdə, azad torpaqlarda dalğalanan bayraqda, hərbi marşların ritmində onun nəfəsi duyulur. O, şəhidliyi ilə əsl ölümsüzlük qazandı.

“Mən əbədiyyət üfüqlərində doğan günəşəm” — bu sözlər sanki Vidadi Zalovun müqəddəs ruhunun hayqırtısıdır. Çünki şəhidlər batmayan günəşdir. Onlar zaman keçdikcə unudulmurlar, əksinə, xalqın yaddaşında daha da ucalırlar. Hər yeni nəsil onların qəhrəmanlığını öyrənir, onların adına ehtiram göstərir. Bu, şəhidlərin mənəvi qələbəsidir.

Azərbaycan xalqı öz qəhrəman oğullarını heç vaxt unutmur. Bu gün ölkəmizin hər guşəsində şəhidlərin əziz xatirəsi ehtiramla yad edilir. Məktəblərdə, tədbirlərdə, anım mərasimlərində onların adı qürurla çəkilir. Çünki şəhidlər xalqın vicdanıdır. Vidadi Zalov da bu vicdanın, bu müqəddəsliyin bir parçasıdır.

Torpaq uğrunda ölən varsa, Vətəndir! Bu müqəddəs kəlam Vidadi Zalovun həyatının və qəhrəmanlığının ən böyük mənasını ifadə edir. O, canını Vətənə qurban verdi, amma adı əbədiyyət qazandı. Bu gün azad Qarabağın səmasında dalğalanan bayraq şəhidlərin ruhuna verilən ən böyük dəyərdir.

Şəhid Vidadi Nizami oğlu Zalovun əziz xatirəsi daim xalqımızın qəlbində yaşayacaq. Onun qəhrəmanlığı gələcək nəsillərə örnək olacaq, adı isə hər zaman hörmət və ehtiramla anılacaq. Çünki Vətən üçün canından keçənlər heç vaxt ölmürlər. Onlar əbədiyyət üfüqlərində doğan günəş kimi daim parlayırlar...

Hürü Hacızadə

Yazıçı-publisist

“Qızıl qələm” mükafatçısı

Fərid Faiqoğlu

“AVMVİB”-nin fəxri üzvü

AJB-nin üzvü