Kung-Fu Federasiyasında yeni təyinatlar və klub lisenziyalarının təqdimatı keçirilib

Dünən Azərbaycan Kung-Fu Federasiyasının növbəti geniştərkibli iclası keçirilib. Federasiyanın rəhbər heyəti, məşqçi korpusu və regional nümayəndələrin iştirak etdiyi toplantıda həm təşkilati, həm də idmançı hazırlığı ilə bağlı mühüm qərarlar qəbul olunub.

İclasın əsas gündəm mövzularından biri böyüklərdən ibarət Kung-Fu Sanda üzrə yığma komandanın baş məşqçi postuna yeni təyinat olub. Qərara əsasən, bu vəzifəyə Etiqad Atakişiyev gətirilib. O, bundan əvvəl həmin postda fəaliyyət göstərən Ramin Allahverdiyevi əvəz edib. Federasiya rəsmiləri yeni baş məşqçinin təcrübəsinin və idman sahəsindəki fəaliyyətinin komandanın gələcək nəticələrinə müsbət təsir göstərəcəyini vurğulayıblar.

Toplantıda Çin döyüş sənətlərinin müxtəlif istiqamətləri üzrə də yeni baş məşqçi təyinatları elan edilib. Belə ki, Tao-Lu və Ci-Qun üzrə baş məşqçi vəzifəsinə Rafət Əsədov, Taijiquan və Taijishan üzrə baş məşqçi vəzifəsinə isə Fatimə Məmmədova təyin olunublar. Qeyd olunub ki, bu istiqamətlər üzrə sistemli hazırlıq prosesinin gücləndirilməsi, beynəlxalq standartlara uyğun məşq proqramlarının tətbiqi federasiyanın əsas prioritetlərindən biri olacaq.

Federasiya rəhbərliyi regionlarda Kung-Fu idman növünün daha geniş yayılması və kütləviliyinin artırılması məqsədilə də yeni qərarlar qəbul edib. Bu çərçivədə bir sıra bölgələr üzrə nümayəndələr və klub rəhbərləri təsdiqlənib. Yeni təqdimat zamanı Muhammədəli İmişli üzrə Elşən Əhmədova, Biləsuvar üzrə Ramil Əsgərova, Şirvan “Nato Şampion” klubu üzrə Rəşad Quliyevə və İsmayıllı Kung-Fu İdman Klubunun prezidenti vəzifəsinə Anar Həsənov təyin olunub. Onlara müvafiq sənədlər təqdim edilib və qarşıdakı dövr üçün fəaliyyət istiqamətləri barədə məlumat verilib.

İclasda çıxış edən Azərbaycan Kung-Fu Federasiyasının prezidenti Nurlan Aslanov ölkədə idmanın inkişafına göstərilən dövlət qayğısını xüsusi vurğulayıb. O bildirib ki, Azərbaycan Respublikasının Prezidenti İlham Əliyevin idmana göstərdiyi diqqət və dəstək, həmçinin Gənclər və İdman Nazirliyinin federasiyalarla sıx əməkdaşlığı ölkədə döyüş sənətlərinin inkişafı üçün geniş imkanlar yaradır.

Nurlan Aslanov qeyd edib ki, federasiyanın əsas strateji məqsədi ölkədə Kung-Fu idman növünün daha da inkişaf etdirilməsi, gənclərin bu sahəyə cəlb olunması və onların sağlam ruhda formalaşmasına töhfə verməkdir. Onun sözlərinə görə, idman təkcə fiziki hazırlıq deyil, həm də gənclərin mənəvi tərbiyəsində mühüm rol oynayır və bu istiqamətdə görülən işlər davamlı xarakter daşıyır.

Federasiya prezidenti əlavə edib ki, regionlarda yeni idman klublarının yaradılması və mövcud klubların fəaliyyətinin gücləndirilməsi qarşıdakı dövrdə əsas prioritetlərdən biri olacaq. O, təyin olunan yeni məşqçilərə və klub rəhbərlərinə uğurlar arzulayaraq, onların üzərinə düşən məsuliyyətin böyük olduğunu bildirib.

İclas zamanı çıxış edən vitse-prezident Babək Əliyev də federasiyanın qarşısında duran vəzifələrdən danışıb. O, yeni təyinatların idman mühitinə müsbət dinamika gətirəcəyini və komanda işinin daha da güclənəcəyini qeyd edib.

Digər vitse-prezident Ehram Məcidov çıxışında Kung-Fu idman növünün beynəlxalq arenada tanıdılması istiqamətində görülən işlərdən bəhs edib. O bildirib ki, gələcəkdə Azərbaycan idmançılarının beynəlxalq yarışlarda daha yüksək nəticələr əldə etməsi üçün sistemli hazırlıq proqramları həyata keçiriləcək.

Hakimlər Kollegiyasının sədri Güloğlan Cabbarov isə ədalətli hakimlik prinsiplərinin qorunmasının vacibliyini vurğulayıb. O, federasiya daxilində şəffaflıq və peşəkarlığın artırılması üçün davamlı iş aparıldığını bildirib.

Federasiyanın hüquq eksperti İsmayıl Zalov isə çıxışında təşkilati məsələlər və normativ-hüquqi bazanın təkmilləşdirilməsi ilə bağlı fikirlərini bölüşüb. O, federasiyanın fəaliyyətinin qanunvericiliyə uyğun şəkildə daha da gücləndirilməsinin vacibliyini qeyd edib.

İclasın sonunda yeni təyinat alan məşqçilər və klub rəhbərləri çıxış edərək onlara göstərilən etimada görə təşəkkürlərini bildiriblər və qarşıdakı dövrdə üzərlərinə düşən vəzifələri məsuliyyətlə yerinə yetirəcəklərini vurğulayıblar.

Beləliklə, Azərbaycan Kung-Fu Federasiyasının növbəti iclası həm struktur yenilənməsi, həm də inkişaf strategiyalarının müəyyənləşdirilməsi baxımından əhəmiyyətli qərarlarla yadda qalıb. Federasiya rəhbərliyi yaxın dövrdə daha genişmiqyaslı layihələrin həyata keçiriləcəyini və idmanın bu növünün ölkədə daha da populyarlaşacağını bəyan edib.

ARHD.MEDİA

#kungfuaze #kungfuazerbaijan #idman

https://www.instagram.com/p/DX4iCPGjApB/?igsh=em5nNGJpdXRhN3Q0