Nərimanov Rayon MKTB-nin rəisi Manaf Manafov: “31 Mart – Azərbaycanlıların Soyqırımı Günü. Tarixin qan yaddaşı və milli birliyin sarsılmaz ruhu”

Tarix hər bir xalqın yaddaşı, kimliyi və gələcək yol xəritəsidir. Azərbaycan xalqının tarixində isə elə faciəli səhifələr var ki, onlar əsrlər keçsə belə unudulmur, daim xatırlanır və gələcək nəsillərə ötürülür. Bu baxımdan 31 Mart – Azərbaycanlıların Soyqırımı Günü xalqımızın qan yaddaşına yazılmış ən dəhşətli hadisələrdən biridir. Bu gün təkcə bir tarix deyil, həm də milli kədərin, faciənin və eyni zamanda milli həmrəyliyin simvoludur.

1918-ci ilin mart-aprel aylarında baş verən hadisələr Azərbaycan xalqına qarşı məqsədyönlü şəkildə həyata keçirilmiş soyqırımı siyasətinin bariz nümunəsidir. Həmin dövrdə Bakı şəhərində və Azərbaycanın müxtəlif bölgələrində – Şamaxı, Quba, Qarabağ, Lənkəran, Salyan və digər ərazilərdə minlərlə günahsız insan amansızcasına qətlə yetirilmiş, yaşayış məntəqələri yerlə-yeksan edilmişdir. Bu qanlı hadisələr zamanı qadınlar, uşaqlar və qocalar xüsusi qəddarlıqla öldürülmüş, məscidlər, tarixi abidələr dağıdılmışdır. Quba bölgəsində aşkar edilən kütləvi məzarlıqlar isə bu vəhşiliyin canlı sübutudur.

Bu hadisələrin əsas məqsədi Azərbaycan xalqını öz tarixi torpaqlarından sıxışdırmaq, milli varlığını məhv etmək və bölgədə etnik təmizləmə siyasəti aparmaq idi. Lakin xalqımız bütün bu faciələrə baxmayaraq, öz iradəsini itirməmiş, milli kimliyini qoruyaraq bu çətin sınaqlardan üzüağ çıxmışdır.

Uzun illər sovet ideologiyası bu həqiqətlərin üzərinə pərdə çəkməyə çalışmış, 1918-ci il hadisələri haqqında danışmaq qadağan olunmuşdur. Lakin müstəqillik əldə etdikdən sonra Azərbaycan xalqı öz tarixi həqiqətlərini dünyaya çatdırmaq imkanı qazandı. Bu istiqamətdə ən mühüm addımlardan biri Ulu Öndər Heydər Əliyev tərəfindən atılmışdır. 1998-ci ildə onun imzaladığı fərmanla 31 Mart – Azərbaycanlıların Soyqırımı Günü elan edilmişdir. Bu qərar təkcə tarixə verilən qiymət deyil, həm də milli yaddaşın bərpası və gələcək nəsillərin düzgün məlumatlandırılması baxımından mühüm əhəmiyyət kəsb edir.

Ulu Öndər Heydər Əliyev bu faciələrin unudulmaması, beynəlxalq aləmdə tanıdılması üçün ardıcıl siyasət həyata keçirmişdir. Onun təşəbbüsü ilə aparılan araşdırmalar nəticəsində tarixi sənədlər toplanmış, arxiv materialları üzə çıxarılmış və soyqırımı faktları sistemli şəkildə öyrənilmişdir. Bu siyasət nəticəsində Azərbaycan xalqına qarşı törədilmiş cinayətlərin dünya ictimaiyyətinə çatdırılması istiqamətində mühüm addımlar atılmışdır.

Bu gün Ulu Öndərin siyasi kursu uğurla davam etdirilir. Azərbaycan Respublikasının Prezidenti İlham Əliyev tərəfindən 31 Mart soyqırımı ilə bağlı həqiqətlərin beynəlxalq səviyyədə tanıdılması istiqamətində genişmiqyaslı işlər görülür. Prezident İlham Əliyevin rəhbərliyi ilə həyata keçirilən siyasət nəticəsində Azərbaycan həqiqətləri artıq bir çox ölkələrdə tanınır, bu faciələrə hüquqi-siyasi qiymət verilməsi istiqamətində mühüm nailiyyətlər əldə olunur.

Xüsusilə son illərdə aparılan diplomatik fəaliyyət, beynəlxalq təşkilatlarla əməkdaşlıq və informasiya müharibəsində əldə olunan uğurlar bu istiqamətdə mühüm rol oynayır. Dünyanın müxtəlif ölkələrində keçirilən tədbirlər, konfranslar, sərgilər və anım mərasimləri 31 Mart soyqırımı haqqında həqiqətlərin geniş auditoriyaya çatdırılmasına xidmət edir.

31 Mart soyqırımı yalnız Azərbaycan xalqına qarşı törədilmiş cinayət deyil, həm də insanlığa qarşı yönəlmiş ağır bir faciədir. Bu hadisələr beynəlxalq hüquq normalarına zidd olmaqla yanaşı, insan haqlarının kobud şəkildə pozulması kimi qiymətləndirilməlidir. Bu səbəbdən də bu faciənin dünya ictimaiyyəti tərəfindən tanınması və ona adekvat hüquqi qiymətin verilməsi böyük əhəmiyyət daşıyır.

Bu gün Azərbaycan xalqı 31 Mart soyqırımı qurbanlarının xatirəsini dərin ehtiramla yad edir. Şəhidlərin ruhuna dualar oxunur, onların xatirəsi ürəklərdə yaşadılır. Bu anım mərasimləri təkcə keçmişə ehtiram deyil, həm də gələcək nəsillərə bir mesajdır: tarix unudulmamalıdır, həqiqətlər daim yaşadılmalıdır.

Eyni zamanda, bu gün milli birliyimizin və həmrəyliyimizin də təcəssümüdür. Azərbaycan xalqı bu faciələrdən nəticə çıxararaq daha da güclənmiş, dövlətçiliyini möhkəmləndirmiş və müstəqil inkişaf yolunda inamla irəliləmişdir. Bu gün güclü Azərbaycan dövləti məhz bu tarixdən alınan dərslərin nəticəsidir.

31 Mart – Azərbaycanlıların Soyqırımı Günü xalqımızın tarixində silinməz iz buraxmış faciə olmaqla yanaşı, həm də milli kimliyimizin, birliyimizin və mübarizə ruhumuzun simvoludur. Bu gün hər bir azərbaycanlının borcudur ki, bu tarixi unutmasın, onu gələcək nəsillərə çatdırsın və şəhidlərimizin xatirəsini daim uca tutsun. Tarixi yaddaşımızı qorumaq isə milli varlığımızı qorumaq deməkdir.

Fərid Faiqoğlu

AJB-nin üzvü