Fransada aktyorlar süni intellektdən istifadəni məhdudlaşdırmağa çağırdılar

Fransada təxminən dörd min aktyor və kino xadimi süni intellektin (Sİ) onların səs və obrazlarından icazəsiz istifadəsinə qarşı çıxaraq açıq məktub imzalayıb.

Oxu.Az-ın TASS-a istinadən verdiyi xəbərə görə, məktubun mətni "Le Parisien" qəzetinin saytında dərc olunub.

Məktubda bildirilir ki, Sİ tərəfindən aktyorların səslərinin klonlanması və obrazlarının reklamlarda istifadəsi geniş yayılıb və bu, sənətçilər üçün ciddi rəqabət yaradır. Qeyd olunur ki, Sİ ilə hazırlanmış reklam təkliflərində qonorarlar daha aşağıdır və bu cür təkliflər təkcə tanınmış ulduzlara deyil, aztanınan yüzlərlə aktyora da ünvanlanır.

Mədəniyyət xadimləri hökuməti təcili şəkildə hüquqi mexanizmlər yaratmağa çağıraraq, Sİ-nin yaradıcı fəaliyyətlə yanaşı mövcud ola bilməsi və müəllif hüquqlarının qorunmasının vacibliyini vurğulayıblar.