İran hava məkanını bağlayıb

İran hakimiyyəti İraqla sərhəd boyunca yerləşən regionda hava məkanını bağlamaq barədə sərəncam verib.

Oxu.Az-ın məlumatına görə, bu barədə "Al Hadath" televiziya kanalı məlumat yayıb.

Bildirilib ki, İran İraqdan gələn təyyarələr üçün səmanı bağlayıb.

Bir gün əvvəl "Al Arabiya" televiziya kanalının bildirdiyinə görə, Tehran Bağdada müraciət edərək İranla əvvəlcədən razılaşdırmadan İslam Respublikasına uçuşları planlaşdırılan mülki hava gəmilərini göndərməməyi xahiş edib.

Xatırladaq ki, 2025-ci il dekabrın 29-da Tehranda İran rialının kəskin düşməsi səbəbindən ticarətçilərin etiraz aksiyaları başlayıb. Bir gün sonra etirazlara tələbələr də qoşulublar. Narazılıqlar qısa müddətdə İranın əksər iri şəhərlərinə yayılıb. 2026-cı il yanvarın 2-də vəziyyət daha da gərginləşib - şəhər küçələrində naməlum silahlı qruplar peyda olub. Etirazçılarla hüquq-mühafizə orqanları arasında silahlı toqquşma halları artıb.

İğtişaşların zirvəsi 8 yanvar axşamına təsadüf edib, bu zaman ən azı 12 mülki vətəndaş, o cümlədən bir uşaq həlak olub. Hakimiyyət orqanları 25 hüquq-mühafizə əməkdaşının həlak olduğunu bildirib. Tehran meri Əlirza Zakani deyib ki, etirazçılar paytaxtda 25 məscidi yandırıb, 26 bank, üç tibb mərkəzi, 10 dövlət müəssisəsi, 48 yanğınsöndürən maşın, 42 avtobus və təcili yardım maşını, həmçinin 24 mənzilə ziyan vurublar. İran hakimiyyəti iğtişaşçıları terrorist adlandırıb və hadisələrin təşkilində İsrail və ABŞ-ni təqsirləndirib.