Ölkə başçısının qızları şəhid evinə belə getmişdilər, Mingəçevirin icra başçısı isə….-Fotolar

Dekabrın 30-da Mingəçevir şəhər İcra Hakimiyyətinin başçısı İlham İsmayılov şəhid Rzayev Əli Nəsib oğlunun anası Kamilə Rzayevaya M.Rəsulzadə küçəsində yerləşən 6/102 saylı binanın 1 nömrəli mənzilinin açarını təqdim edib. Rəsmi təqdimat mərasimi ictimaiyyətə sosial dəstək və qayğı nümunəsi kimi təqdim olunsa da, mərasim zamanı baş verən bir məqam cəmiyyətdə ciddi narazılıq və müzakirələrə səbəb olub.

Belə ki, şəhid ailəsinin mənzilinə daxil olan icra başçısı İlham İsmaylov  evə ayaqqabısını çıxarmadan daxil olub. Bu hal sadəcə məişət qaydalarının pozulması deyil, həm də şəhid ailəsinə, xüsusilə də şəhid anasına qarşı açıq hörmətsizlik kimi dəyərləndirilir. Azərbaycan cəmiyyətində evə ayaqqabı ilə daxil olmamaq təkcə adət deyil, hörmət və ehtiramın ifadəsidir.

(Fotolar Mingəçevir İcra hakimiyyətinin rəsmi saytından götürülüb)

Şəhid anasının evi müqəddəs bir ocaqdır. O evdə həm kədər, həm qürur, həm də Vətən üçün verilmiş canın izi var. Belə bir məkanda göstərilən hər bir davranış ölçülü-biçili, etik və mənəvi dəyərlərə uyğun olmalıdır. Dövlət məmurunun bu cür məsuliyyətsiz davranışı isə onun tutduğu vəzifənin ağırlığı ilə tam ziddiyyət təşkil edir.

Məsələ mənzil açarının təqdim olunması ilə bitmir. Əsas məsələ şəhid ailəsinə münasibətin necə formalaşmasıdır. Kameralar önündə verilən açar real hörmətlə, səmimi davranışla və ən xırda detallara diqqətlə tamamlanmadıqda, bu addım formal xarakter daşıyır.

Bu hadisə bir daha göstərdi ki, vəzifə sahibi olmaq hər zaman yüksək mədəniyyət və mənəvi səviyyə demək deyil. Şəhidlər bu xalqın ən ali dəyəridir, onların ailələri isə xüsusi ehtiramla qorunmalı olan ünvanlardır. Bu həssaslıq göstərilmədikdə, cəmiyyətin haqlı etirazı qaçılmaz olur.

(Fotolar Mingəçevir İcra hakimiyyətinin rəsmi saytından götürülüb)

Ortaya çıxan əsas sual isə budur:Şəhid ailəsinə hörmət yalnız rəsmi mərasimlərləmi ölçülür, yoxsa bu hörmət davranışda, münasibətdə və mənəvi dəyərlərə sadiqlikdə özünü göstərməlidir?

Qeyd edək ki, Ölkə başçısı və ailə üzvləri şəhid ailələrinə daim diqqətlə yanaşıb,onların qayğıları ilə maraqlanıb və hər zaman hörmətlə yanaşılan münasibət sərgiləyiblər. Xəbər verdiyimiz kimi noyabr ayında  Heydər Əliyev Fondunun vitse-prezidenti Leyla Əliyeva və Arzu Əliyeva Astarada Azərbaycanın Milli Qəhrəmanı Pəncəli Teymurovun ailəsini ziyarət edən zaman davranışları ilə hər kəsin növbəti dəfə sevgisini və hörmətini qazanıblar. Belə ki, Prezidentin qızları şəhid evində ayaqqabısız olublar bu da fotolarda öz əksini tapıb.

Lakin göründüyü kimi Mingəçevirin İcra Hakimiyyətinin başçısı İlham İsmayılov heç bir etik qaydalara riayət etməyərək belə davranışı müzakirəyə səbəb olub.  Xaırladaq ki, Ölkə başçısı İlham Əliyevin ən prioritet məsələlərindən biri şəhid və qazi ailələrinə diqqət və qayğıdır. Şəhid və qazilərə verilən mənzillər, avtomobillər və yaxud yardımlar birbaşa Prezident İlham Əliyevin diqqət və qayğısının nəticəsidir.

Hər hansısa bir məmur belə hallardan sui istifadə edib özünə divident qazanması yolverilməzdir.   Bakunews.az