Teymur Hacıyev: Heydər Əliyevin əbədi xatirəsi – Müstəqil Azərbaycanın parlaq yolunu nurlandıran DAHİ ŞƏXSİYYƏT

12 dekabr Azərbaycan xalqının tarixində sadəcə bir anım günü deyil, həm də milli yaddaşımızda dərin iz qoymuş bir şəxsiyyətə ehtiram günüdür. Bu gün Ümummilli Lider Heydər Əliyevin anım günüdür. Xalqımız bu günü böyük sayğı və minnətdarlıqla qeyd edir, çünki Heydər Əliyev təkcə bir dövlət başçısı deyil, Azərbaycan xalqının xilaskarı, müdrik rəhbəri və dövlətçiliyimizin memarıdır. Onun həyat yolu Azərbaycan tarixinin ən şanlı və məsuliyyətli səhifələrindən birini təşkil edir.

Ulu Öndər Heydər Əliyevin yüksəliş yolu xalqına və dövlətinə xidmətlə səciyyələnir. Onun fəaliyyəti hələ sovet dövründən başlayaraq milli dövlətçilik düşüncəsinin formalaşmasına təkan verirdi. 1969-cu ildə Azərbaycana rəhbərlik etməyə başladığı ilk gündən o, respublikanın inkişafı üçün böyük islahatlara imza atdı. Qısa müddətdə Azərbaycan SSR-də sənaye və kənd təsərrüfatı sahəsində geniş canlanma yarandı. Heydər Əliyev idarəçilikdə müdrikliyi, qətiyyəti və prinsipiallığı ilə seçilir, xalqın ehtiyaclarını dərindən bilirdi. Bu illərdə təhsil, mədəniyyət və elm sahələrində də böyük nailiyyətlər əldə olundu, Azərbaycanda güclü intellektual potensial formalaşdı.

Sovet İttifaqının rəhbər strukturlarında işlədiyi illərdə də o, Azərbaycanın maraqlarını daim diqqət mərkəzində saxlamış, respublikanın inkişafına böyük töhfə verən kadr siyasəti yürütmüşdü. Həmin dövrdə yüzlərlə azərbaycanlı gəncin müxtəlif yüksək təhsil müəssisələrinə göndərilməsi, onların gələcəkdə ölkənin aparıcı mütəxəssisləri kimi yetişməsi Heydər Əliyevin uzaqgörən siyasətinin nəticəsi idi. Milli mədəniyyətimizin qorunması və təbliği istiqamətində görülən işlər də onun fəaliyyətinin mühüm səhifələrindən biridir.

1990-cı illərin əvvəlləri Azərbaycan üçün ən ağır dövr idi. Müstəqilliyini yenicə əldə edən ölkə daxili çəkişmələr, siyasi böhran, iqtisadi tənəzzül və Ermənistanın hərbi təxribatları ilə üz-üzə qalmışdı. Dövlət birliyimiz, müstəqilliyimiz və təhlükəsizliyimiz ciddi şəkildə təhdid altında idi. Belə bir dövrdə xalqın tək ümid yeri yenə Heydər Əliyev oldu. 1993-cü ildə onun hakimiyyətə qayıdışı Azərbaycan tarixində dönüş nöqtəsi kimi qəbul edilir.

Heydər Əliyev böyük qətiyyətlə və müdrikliklə ölkədə sabitliyi bərpa etdi, dağılmış dövlət strukturlarını yenidən qurdu və Azərbaycanı uçurumdan xilas etdi. Onun həyata keçirdiyi islahatlar qısa zamanda öz bəhrəsini verdi. Ölkədə vahid dövlət idarəçiliyi sistemi formalaşdı, siyasi sabitlik təmin olundu və iqtisadi dirçəlişin əsası qoyuldu.

Ulu Öndərin ən böyük nailiyyətlərindən biri də Azərbaycanın enerji təhlükəsizliyinin təmin edilməsidir. 1994-cü ildə imzalanan “Əsrin müqaviləsi” ölkənin iqtisadi gələcəyini müəyyən etdi. Bu sənəd Azərbaycanın dünya enerji xəritəsində mühüm mövqe qazanmasına, ölkəyə böyük xarici sərmayələrin axınına və iqtisadi inkişafın sürətlənməsinə səbəb oldu. Heydər Əliyevin qurduğu enerji strategiyası bu gün də Azərbaycanın inkişafının əsas dayaqlarından biridir.

Ulu Öndər siyasi, iqtisadi və sosial sahələrlə yanaşı, mənəvi sferada da böyük işlər gördü. Onun formalaşdırdığı Azərbaycançılıq ideologiyası dünya azərbaycanlılarını vahid milli dəyər ətrafında birləşdirdi. Bu ideya həm ölkə daxilində milli birlik və həmrəyliyi möhkəmləndirdi, həm də xaricdə yaşayan milyonlarla soydaşımız arasında əlaqələri gücləndirdi. Dünya Azərbaycanlılarının Qurultayları məhz bu ideyanın həyata keçməsinin bariz nümunəsidir.

Heydər Əliyevin xarici siyasət kursu da müasir Azərbaycanın möhkəmlənməsində mühüm rol oynadı. O, balanslaşdırılmış, milli maraqlara söykənən, çoxşaxəli diplomatiya xətti yürüdərək Azərbaycanı regionda və beynəlxalq aləmdə etibarlı tərəfdaş kimi tanıtdı. Onun apardığı siyasət nəticəsində Azərbaycan müxtəlif beynəlxalq təşkilatlarda öz mövqeyini gücləndirdi, diplomatik əlaqələr genişləndi və ölkənin nüfuzu artdı.

Ulu Öndərin xalqa olan sevgisi, insanlara qayğısı və səmimiyyəti xalqın yaddaşında silinməz izlər buraxıb. O, hər zaman xalqın içində olub, sadə insanlarla ünsiyyətdən xüsusi zövq alıb, onların dərdlərinə şərik çıxıb. Heydər Əliyevin insani keyfiyyətləri onu sadəcə böyük lider deyil, həm də örnək alınacaq şəxsiyyətə çevirib.

Bu gün Heydər Əliyevin siyasi kursu onun layiqli davamçısı, Prezident İlham Əliyev tərəfindən uğurla həyata keçirilir. Ulu Öndərin müəyyən etdiyi strategiya Azərbaycanı sürətli inkişaf yoluna çıxarıb. 2020-ci ildə əldə edilən tarixi Zəfər, torpaqlarımızın azad olunması, ölkəmizin regionda güc mərkəzinə çevrilməsi — bütün bunlar Heydər Əliyevin yaratdığı möhkəm dövlətçilik təməlinin bəhrəsidir. Bu gün Qarabağda və Şərqi Zəngəzurda aparılan geniş quruculuq işləri də Ulu Öndərin böyük arzularının gerçəkləşməsidir.

12 dekabr Azərbaycanın ən dəyərli övladlarından biri olan Heydər Əliyevin xatirəsini anma günüdür. Xalqımız bu günü həm kədər, həm də qürur hissi ilə qeyd edir. Çünki Heydər Əliyevin ömrü Azərbaycan naminə fədakarlıqla keçib və onun qurduğu müstəqil dövlət bu gün də uğurla inkişaf edir. O, xalqın yaddaşında əbədiyaşar lider, milli qürur simvolu kimi yaşayır.

Heydər Əliyev öz əməlləri ilə sübut etdi ki, xalqına bağlılıq, dövlətə sədaqət və milli maraqlara xidmət edən lider hər zaman tarixdə əbədi qalır. Ulu Öndərin ideyaları, dövlətçilik yolu və vətənpərvərlik amalına sadiq ruhu Azərbaycan var olduqca yaşayacaq.

Allah rəhmət eləsin!

Teymur Hacıyev

Gəncə Şəhər Baş Polis İdarəsinin rəisi