Rasim Nurullayev: Heydər Əliyev – Azərbaycan dövlətçiliyinin möhkəm təmini və xalqın ümid mənbəyi

12 dekabr Azərbaycan xalqının böyük ehtiramla yad etdiyi bir gündür. Bu tarix Ümummilli Lider Heydər Əliyevin anım günüdür. Hər il bu gün ölkəmizin hər yerində Ulu Öndərin xatirəsi dərin hörmətlə anılır, onun dövlətçiliyimizə bəxş etdiyi xidmətlər minnətdarlıqla xatırlanır. Çünki Heydər Əliyev yalnız bir siyasi lider deyil, Azərbaycanın çətin günlərində ona dayaq olan, dövlətçiliyi uçurumdan qurtaran, xalqı gələcəyə aparan böyük tarixi şəxsiyyətdir.

Heydər Əliyevin həyat yolu Azərbaycan adına yazılmış böyük bir tarixdir. Onun fəaliyyəti dövlətə və xalqa xidmət nümunəsi kimi bu gün də dəyərini qoruyur. O, idarəçilik bacarığı, uzaqgörən siyasəti və qətiyyətli mövqeyi ilə Azərbaycanın inkişafına böyük təkan verib, respublikanı həm sovet dövründə, həm də müstəqillik illərində tərəqqi yoluna çıxarıb.

Ulu Öndərin Azərbaycan rəhbərliyinə gətirildiyi 1969-cu ildən etibarən ölkə tamamilə yeni inkişaf mərhələsinə qədəm qoydu. O dövrdə sənaye müəssisələrinin modernləşdirilməsi, yeni istehsal sahələrinin yaradılması, sosial infrastrukturun bərpası və genişləndirilməsi Azərbaycanın iqtisadi və sosial həyatında dönüş yaratdı. Heydər Əliyevin uzaqgörən siyasəti ölkədə intellektual potensialın formalaşmasına, təhsil və mədəniyyətin inkişafına böyük şərait yaratdı. Həmin illər Azərbaycan tarixində yüksəliş dövrü kimi yadda qaldı.

Sovet İttifaqının rəhbərliyində yüksək vəzifədə çalışdığı illərdə də Ulu Öndərin öz xalqına bağlılığı dəyişməz qaldı. O, azərbaycanlıların müxtəlif sahələrdə yüksəlməsi üçün geniş imkanlar açır, milli maraqların qorunmasını daim diqqət mərkəzində saxlayırdı. Onun bu fəaliyyəti Azərbaycan xalqı tərəfindən böyük minnətdarlıqla xatırlanır.

Lakin Heydər Əliyevin xalq qarşısındakı ən böyük xidməti onun müstəqillik illərində göstərdiyi liderlik oldu. 1991–1993-cü illər Azərbaycan üçün ağır sınaq dövrü idi. Ölkə parçalanma ərəfəsinə gəlmiş, qeyri-sabitlik dərinləşmiş, Ermənistanın təcavüzü daha da artmışdı. Xalqın nicat yolu kimi gördüyü yeganə şəxsiyyət Heydər Əliyev idi. 1993-cü ildə onun hakimiyyətə qayıdışı Azərbaycan dövlətçiliyinin xilası oldu.

Heydər Əliyev qısa zamanda ölkədə sabitliyi bərpa etdi, dağılmış dövlət sistemini yenidən qurdu. Onun apardığı düşünülmüş siyasət Azərbaycanı vətəndaş qarşıdurmasından çıxardı və dövləti parçalanmaq təhlükəsindən xilas etdi. Bu, onun tarixi liderliyinin ən böyük göstəricilərindən biri hesab olunur. 

Ulu Öndərin həyata keçirdiyi iqtisadi islahatlar Azərbaycanın gələcəyini müəyyən edən əsas amillərdən oldu. 1994-cü ilin sentyabrında imzalanmış “Əsrin müqaviləsi” iqtisadiyyatın dirçəlməsinin təməlini qoydu, Azərbaycanı beynəlxalq enerji arenalarına çıxardı. Bu müqavilə ölkəyə böyük sərmayələrin cəlb olunmasına, iqtisadiyyatın sürətli inkişafına, yeni iş yerlərinin açılmasına və dövlətin maliyyə imkanlarının genişlənməsinə səbəb oldu. Bu gün Azərbaycanın enerji siyasətinin uğuru məhz Heydər Əliyevin yaratdığı möhkəm təməllərə dayanır.

Ulu Öndərin dövlət quruculuğu sahəsində həyata keçirdiyi mühüm işlər Azərbaycan dövlətinin demokratik və hüquqi prinsiplər üzərində qurulmasını təmin etdi. 1995-ci ildə qəbul edilən Konstitusiya ölkədə insan hüquqlarının, azadlıqların, siyasi plüralizmin və müasir dövlət idarəçiliyinin əsaslarını formalaşdırdı. Bu sənəd bu gün də Azərbaycan Respublikasının hüquqi dayağı kimi əhəmiyyətini qoruyur.

Heydər Əliyevin siyasətinin mühüm hissəsini Azərbaycançılıq ideologiyası təşkil edir. Bu ideologiya həm ölkə daxilində milli birliyə nail olmağı, həm də dünya azərbaycanlılarının əlaqələrinin möhkəmlənməsini hədəfləyirdi. Onun təşəbbüsü ilə keçirilən Dünya Azərbaycanlılarının Qurultayları milli həmrəyliyin inkişafında mühüm rol oynadı və bu gün də bu siyasət uğurla davam etdirilir.

Ulu Öndərin xarici siyasəti də Azərbaycan dövlətçiliyinin möhkəmlənməsində xüsusi rol oynadı. O, Azərbaycanı beynəlxalq aləmdə etibarlı tərəfdaş kimi tanıtdı, ölkənin bölgədə və dünyada nüfuzunu artırdı. Onun balanslaşdırılmış diplomatiyası Azərbaycanın milli maraqlarının qorunmasını təmin etdi və ölkəni regionun strateji mərkəzlərindən birinə çevirdi.

Heydər Əliyev həmçinin insanlara olan böyük qayğısı ilə yadda qalıb. O, daim xalqın içində olub, sadə insanların problemini dinləyib, hər kəsə diqqət və mərhəmətlə yanaşıb. Bu xüsusiyyətlər onu xalqın qəlbində daha da ucaldıb və ona olan etimadı gücləndirib. Ulu Öndər üçün xalqın rifahı, dövlətin inkişafı və torpaqların bütövlüyü həmişə əsas prioritet olub.

Bu gün Heydər Əliyevin dövlətçilik yolu onun layiqli davamçısı, Prezident İlham Əliyev tərəfindən böyük uğurla davam etdirilir. Ulu Öndərin yaratdığı möhkəm təməl üzərində müasir Azərbaycan daha güclü, daha nüfuzlu və daha qətiyyətli bir dövlətə çevrilib. 2020-ci ildə Qarabağ zəfəri, ölkəmizin suverenliyinin tam təmin edilməsi Heydər Əliyevin qurduğu dövlətin gücünün bariz göstəricisidir.

12 dekabr – Heydər Əliyevin anım günü, Azərbaycan xalqının qürur və ehtiram günüdür. Xalqımız bu böyük şəxsiyyətin xidmətlərini heç zaman unutmayacaq. Onun ideyaları, millətə bağışladığı müstəqil dövlət və qurduğu siyasi irs əsrlər boyu yaşayacaq. Heydər Əliyev Azərbaycan üçün yalnız lider deyil, həm də milli qürur simvoludur.

Allah rəhmət eləsin!

Rasim Nurullayev

ATİAHİ Masallı Rayon Komitəsinin sədri