Vaqif Həsənovun növbəti səyyar qəbulu keçirildi
Bu gün əhalinin problemlərinin yerində öyrənilməsi və həll edilməsi məqsədilə Ağdam Rayon İcra Hakimiyyətinin başçısı Vaqif Həsənovun rayonun İmamqulubəyli kəndində səyyar qəbul-görüşü keçirilib.
“Qafqazinfo” xəbər verir ki, qəbuldan əvvəl RİH başçısı Vaqif Həsənov hüquq mühafizə orqanlarının rəhbərləri ilə birlikdə Vətən müharibəsində şəhid olan əkiz qardaşlar Allahverdiyev Nazir Xasay oğlunun və Allahverdiyev Tacir Xasay oğlunun ailə üzvlərini ziyarət edib, onların qayğıları ilə maraqlanıb.
Qeyd edək ki, şəhid qardaşlar Vətən müharibəsi zamanı öz döyüş tapşırıqlarını yerinə yetirən zaman - 24 oktyabr 2020-ci il tarixdə Füzuli rayonunun azadlığı uğrunda gedən döyüşlərdə qəhrəmancasına şəhid olublar.
Şəhid qardaşlar 3-cü dərəcəli “Vətənə xidmətə görə ordeni”, "Vətən uğrunda" və "Xocavəndin azad olunmasına görə" medalları (ölümlərindən sonra) ilə təltif ediliblər.
Səyyar görüşdə əhalini narahat edən problemlərin həlli üçün həyata keçirilən tədbirlərdən, infrastrukturun yaxşılaşdırılması istiqamətində görülən işlərdən danışılıb. Çıxış edən Rayon İcra Hakimiyyətinin başçısı Prezident İlham Əliyevin verdiyi tapşırıqların həyata keçirilməsi, əhalinin problemlərinin öyrənilməsi və operativ həlli üçün keçirilən bu cür görüşlərin önəmli olduğunu qeyd edərək, belə səyyar görüşlərin davamlı olacağını bildirib.
RİH başçısı Azərbaycan Prezidenti tərəfindən qəbul edilən, əhalinin sosial müdafiəsinə və rifah halının yüksəldilməsinə yönəldilmiş son qərarlardan danışaraq bütün bunların vətəndaşlara olan dövlət qayğısının göstəricisi olduğunu bildirmişdir.
V.Həsənov qəbula gələn vətəndaşların qaldırdıqları məsələlərin bir hissəsini yerində həll edib, digər vacib məsələlərin həlli üçün isə müəyyən tapşırıqlar verərək həlli prosesini nəzarətə götürüb.
