Tarixdə ən çox istehsal edilən təyyarə o oldu

“Airbus A320” modeli ümumi istehsal sayına görə əsas rəqibi olan “Boeing 737”ni geridə qoyaraq mülki aviasiya tarixində ən çox istehsal edilən sərnişin təyyarəsi statusunu qazanıb.

“Qafqazinfo”nun məlumatına görə, bu barədə “Reuters” agentliyi Böyük Britaniyanın “Cirium” konsaltinq şirkətinin hesabatına istinadən xəbər yayıb.

Məlumata əsasən, rekorda səbəb olan sonuncu “Airbus A320” təyyarəsi Səudiyyə Ərəbistanının “Flynas” aviaşirkətinə təhvil verilib. Bununla da 1988-ci ildən bəri istehsal edilən A320 təyyarələrinin ümumi sayı 12 260 ədədə çatıb.

Qeyd olunur ki, “Airbus” şirkəti bu rekord göstərici ilə bağlı hələlik heç bir rəsmi açıqlama yaymayıb.

Xatırladaq ki, “Airbus A320” dar gövdəli, orta məsafəli təyyarələr ailəsinə aiddir. 1988-ci ildə təqdim edilən bu model uçuş idarəetmə sistemində tətbiq olunan və pilot əmrlərinin kompüter vasitəsilə ötürülməsinə imkan verən texnologiyası ilə aviasiya sənayesində ilk kütləvi tətbiq nümunəsi hesab olunur.