15 İyun – Milli Qurtuluş Günü: Sabitliyin zəfəri, gələcəyə doğru inamlı addım

Rəfail Hüseynov

Bakı şəhəri 14 nömrəli tam orta əktəbin direktoru

Azərbaycanın müasir dövlətçilik tarixində elə günlər var ki, bu tarixlər yalnız bir siyasi dönüş nöqtəsi kimi deyil, həm də xalqın taleyinin dəyişdiyi, milli birliyin bərpa olunduğu, dövlətçiliyin yenidən formalaşdığı məqamlar kimi yadda qalır. 15 İyun – Milli Qurtuluş Günü də məhz belə günlərdən biridir. Bu tarix təkcə bir siyasi liderin hakimiyyətə dönüşü deyil, Azərbaycan xalqının xaosdan sabitliyə, parçalanmadan birlik və bərabərliyə doğru atdığı tarixi addımdır.

1991-ci ildə müstəqilliyini bərpa edən Azərbaycan xalqı bu azadlığa böyük ümidlər və arzularla qədəm qoymuşdu. Lakin çox keçmədən daxili siyasi böhranlar, vətəndaş qarşıdurması, idarəetmədə təcrübəsizlik və Ermənistanın silahlı təcavüzü xalqın sabaha olan inamını sarsıtdı. Cəbhədəki məğlubiyyətlər, iqtisadi tənəzzül, sosial narazılıqlar və Gəncə qiyamı artıq ölkəni parçalanma və vətəndaş müharibəsi təhlükəsi ilə üz-üzə qoymuşdu.

Bu böhranlı dövrdə xalqın içindən yüksələn ümumi çağırış isə bir idi: “Xilaskar lazımdır!” Bu xilaskar Azərbaycan xalqının böyük oğluna – Heydər Əliyevə ünvanlanmışdı.

1993-cü ilin iyununda xalqın və ölkə rəhbərliyinin dəvəti ilə Heydər Əliyev Bakıya gəldi. 15 iyun tarixində isə o, Azərbaycan Respublikası Ali Sovetinin sədri seçildi. Bu gün xalqın siyasi iradəsinin rəsmi təzahürü idi. Heydər Əliyevin yenidən rəhbərliyə qayıdışı təkcə böhran vəziyyətində bir lider dəyişikliyi deyil, həm də milli dövlətin varlığının qorunması, sabitliyin bərpası və gələcəyə olan ümidin yenidən doğulması idi.

Ulu Öndərin hakimiyyətə gəlişi ilə ölkədə dövlət idarəçiliyinin əsasları bərpa olundu. Silahlı qarşıdurmalar dayandırıldı, qanunsuz hərbi birləşmələr ləğv edildi, Konstitusiyaya uyğun qanunvericilik bazası yaradıldı.

Milli Qurtuluş Günü ilə başlayan yeni mərhələ Azərbaycanın müstəqil və hüquqi dövlət kimi inkişafına zəmin yaratdı. 1995-ci ildə qəbul olunan Konstitusiya demokratik və dünyəvi dövlətin hüquqi bazasını formalaşdırdı. Prezidentlik institutu möhkəmləndi, parlament və məhkəmə sistemləri təkmilləşdirildi, vətəndaşların hüquqları və azadlıqları təminat altına alındı.

Ən önəmlisi isə dövlət-vətəndaş münasibətləri qarşılıqlı inam üzərində quruldu. Bu da siyasi sabitliyin möhkəmlənməsinə və ardıcıl inkişaf strategiyasının tətbiqinə imkan verdi.

15 İyun tarixinin daha bir əhəmiyyəti də məhz Azərbaycanın iqtisadi müstəqilliyə doğru atdığı addımların bünövrəsinin bu tarixlə başlanmasıdır. 1994-cü ildə imzalanmış “Əsrin müqaviləsi” və sonrakı neft layihələri ölkəyə milyardlarla sərmayənin axmasına səbəb oldu. Bu sərmayələr vasitəsilə yeni zavodlar, yollar, sosial obyektlər tikildi, minlərlə insan işlə təmin olundu.

Azərbaycan təkcə iqtisadiyyatda deyil, beynəlxalq münasibətlərdə də sabit və etibarlı tərəfdaş kimi çıxış etməyə başladı. Regionda enerji təhlükəsizliyinin əsas təminatçılarından biri olan ölkəmiz həm də qlobal siyasi proseslərdə söz sahibi kimi tanındı.

Ulu Öndər Heydər Əliyevin rəhbərliyi ilə formalaşan əsas dəyərlərdən biri də xalq-lider birliyidir. 15 İyun bu birliyin rəmzinə çevrildi. Azərbaycan vətəndaşı liderinə inandı, lider də öz növbəsində xalqın rifahı naminə gecə-gündüz çalışdı. Bu qarşılıqlı münasibət ölkənin inkişafını stimullaşdırdı, vətəndaş cəmiyyətinin formalaşmasına təkan verdi.

Heydər Əliyev hər zaman deyirdi: “Mən həyatımı Azərbaycan xalqına həsr etmişəm.” Bu sözlər populist deyil, real siyasi fəaliyyətin və dövlətçiliyin fəlsəfəsi idi. Bu fəlsəfə bu gün Prezident İlham Əliyev tərəfindən uğurla davam etdirilir.

15 İyun – Milli Qurtuluş Günü yalnız 1993-cü ilin sabitlik dövrünü başlamadı, həm də 2020-ci ilin şanlı Zəfərinə gedən yolun ilk addımı oldu. Güclü və sabit dövlətin bünövrəsi məhz o dövrdə qoyuldu. Ordu quruculuğu, iqtisadi və diplomatik mövqelərin möhkəmləndirilməsi, xalqın vətənpərvərlik ruhunun gücləndirilməsi 44 günlük Vətən müharibəsində tarixi Qələbəni mümkün etdi.

Bu gün Azərbaycan beynəlxalq aləmdə qalib ölkə, torpaqlarını işğaldan azad etmiş güclü dövlət kimi tanınır. Bu reallığın əsasında isə məhz 15 iyun 1993-cü ildə atılmış müdrik addım dayanır.

15 İyun – Milli Qurtuluş Günü təkcə tarix kitablarında yer alan bir gün deyil. Bu tarix xalqın yaddaşında xilaskarlıq, sabitlik, birlik və inkişaf rəmzi kimi yaşayır. Hər il bu günü qeyd etməklə Azərbaycan vətəndaşları öz dövlətçiliyinə, müstəqilliyinə və liderinə olan ehtiramını bir daha nümayiş etdirir.

Bu gün sabit və güclü bir dövlətin vətəndaşıyıqsa, gələcəyə inamla baxırıqsa, bunu 15 İyunun yaratdığı imkanlara borcluyuq.

Milli Qurtuluş ideyası bu gün də yaşayır və yaşamaqdadır — xalqın iradəsində, Prezidentin siyasi fəaliyyətində və Azərbaycanın müasir inkişaf yolunda.