“Özü cavab vermədi, müavini də rəisini çox az gördüyünü dedi” - Yenilənib

“Məlumdur ki, təkcə Bakıda 500 mindən çox sənədsiz ev var, digər regionlarımızda da çoxdur. Sənədsiz evlər təbii ki, sığortalana da bilmirlər. Ötən ilin payızında subasma nəticəsində Sabunçu rayonunun Sabunçu qəsəbəsində çox sayda mənzillərə, yaşayış sahələrinə zərər dəydi”.

“Qafqazinfo” xəbər verir ki, bunu deputat Arzuxan Əlizadə Milli Məclisin Regional məsələlər komitəsinin bu gün keçirilən iclasında bildirib.

Millət vəkilinin sözlərinə görə, həmin vaxt təxminən 30-dan artıq zərərçəkmişin mənzilində olub: “Məlum oldu ki, onların heç birinin sənədi yoxdur. Evlərdəki məişət əşyaları da sıradan çıxmışdı. Məsələ odur ki, evlər neftli sahədə yerləşdiyinə görə, problem təkcə subasma deyildi. Neftli suyun həmin evlərə dolması ilə acınacaqlı vəziyyət yaranmışdı. Nəticə etibarilə həmin vətəndaşlara dəstək olmaq imkanlarından məhrumuq, çünki evlərin sənədi yoxdur.

Mən həmin vaxt “Balaxanıneft”in rəhbəri ilə əlaqə saxlamağa çalışsam da, təəssüf ki, nə zənglərimizə, nə mesajlarımıza cavab verildi. Müavini ilə danışdım, bildirdi ki, mən öz rəisimi çox az görürəm. Belə bir acınacaqlı durum yarandı. Qrunt sularının axdığı kanalların üzərində evlər tikilib. Həmin kanalların təmizlənməsi lazım idi. “Balaxanıneft”in rəhbərliyi bu məsələyə tam diqqətsiz yanaşdı, o insanlar da çarəsiz vəziyyətdə qaldılar”.

***

Milli Məclisin Regional məsələlər komitəsinin sədri Siyavuş Novruzov həmkarının fikirlərinə münasibət bildirib. O qeyd edib ki, sənədsiz evlərin sənədləşdirilməsi ilə bağlı Prezidentin göstərişi olub, burada obyektiv və subyektiv səbəblər var: “Hazırda sənədsiz evlərin obyektiv səbəblərindən biri odur ki, bu evlərin bir çoxu kənd təsərrüfatlı təyinatlı torpaqlarda tikilib.

Təbii ki, bundan ən çox ziyan çəkən bələdiyyələrdir. Çünki onlar bələdiyyələrə, əmlak, torpaq vergisi vermirlər və bələdiyyələrin büdcəsinin formalaşmasında rol oynamırlar. Bu torpaqlarda tikilən evlərin sənədləşdirilməsi üçün torpağın kateqoriyası dəyişməlidir.  Amma bunun üçün 5-6 nazirlikdən icazə alınmalıdır. Bu, çox uzun prosesdir. 

Digər tərəfdən bu evlərin bir hissəsi neft ərazisində tikilib və bu ərazilər SOCAR-a aiddir. SOCAR gərək bunlar üçün xüsusi məktub versin ki, bunun əsasında sakinlər öz evlərini sənədləşdirsinlər. Digərləri var ki, evlərini yüksək qaz xəttlərinin altında, dəmiryolu kənarında tikiblər. Torpaqların kateqoriyaları dəyişməlidir, yenilənməlidir. Artıq sənədsiz evdə yaşayanları qeydiyyatdan da çıxarırlar.

Nuranə Daxilqızı