Göygöl Rayon İcra Hakimiyyətinin başçısı Elvin Paşayev: “Dahi Liderin Əbədi İrsi”

10 may 2025-ci il – Azərbaycanın görkəmli oğlu, dünyaşöhrətli siyasətçi, Ümummilli Liderimiz Heydər Əliyevin 102-ci doğum günüdür. Bu əlamətdar gün münasibətilə Ulu Öndərimizi dərin ehtiram və böyük minnətdarlıq hissi ilə yad edir, onun əziz xatirəsi qarşısında baş əyirəm. Allah rəhmət eləsin.

Heydər Əliyev Azərbaycan xalqının və dövlətinin taleyində elə bir möhtəşəm iz buraxıb ki, onun adı bu millətin hafizəsindən əsrlərlə silinməyəcək. O, təkcə bir siyasətçi, dövlət başçısı deyil, həm də xalqının ruhunu, kimliyini və gələcəyini formalaşdıran nadir tarixi şəxsiyyət idi. Mən, bir rayon rəhbəri və bu millətin bir övladı olaraq, Heydər Əliyev dühasının hər zaman yolumuzu işıqlandırdığına, siyasi və mənəvi kompasımız olduğuna inanmışam və bu gün də həmin inamla çalışıram.

Heydər Əliyev Azərbaycan xalqının tarixinə xilaskar lider kimi daxil oldu. XX əsrin çətin və mürəkkəb dönəmlərində millətini zülmətdən işıqlı sabahlara çıxarmaq gücü yalnız onun kimi güclü iradəli və uzaqgörən siyasətçidə ola bilərdi. 1969-cu ildə Azərbaycana rəhbərliyə gəlişi ilə ölkəmiz intibah dövrünə qədəm qoydu. Təkcə iqtisadi göstəricilərdə deyil, elmdə, təhsildə, mədəniyyətdə və sosial həyatın bütün sahələrində yüksəliş yaşandı.

Heydər Əliyev xalqını sevirdi, xalqı da onu. Çünki onun siyasətinin mərkəzində insan, onun rifahı və gələcəyi dayanırdı. Bu, heç də hər liderin qismət olmadığı bir bağlılıq idi — qarşılıqlı etimada, xidmətə və vətəndaşa sadiqliyə əsaslanan müqəddəs bağ idi.

1993-cü il. Azərbaycan dövlətçiliyi böyük təhlükə altında idi. Vətəndaş müharibəsi, separatizm meyilləri, daxili çəkişmələr, iqtisadi tənəzzül – ölkə parçalanmaq, müstəqillik itmək üzrə idi. Xalq öz xilaskarına – Heydər Əliyevə üz tutdu. O isə heç vaxt xalqın çağırışına biganə qalmadı. Qayıtdı və müstəqil Azərbaycanın bünövrəsini sarsılmaz təməllər üzərində qurdu. 

Əgər bu gün biz azad və güclü Azərbaycan dövlətində yaşayırıqsa, bunun əsas səbəbkarı məhz Ulu Öndər Heydər Əliyevdir. O, müstəqil Azərbaycan ideyasını real dövlət sisteminə çevirdi, sabitliyi təmin etdi, Konstitusiyanı qəbul etdirdi, ordu quruculuğunu başlatdı, neft strategiyası ilə iqtisadi inkişafın təməlini qoydu.

Ulu Öndərin ən böyük töhfəsi yalnız keçmişlə məhdudlaşmır. Onun ideyaları bu gün də yaşayır və ölkəmizin bütün sahələrdə əldə etdiyi uğurların əsasını təşkil edir. Azərbaycan Respublikasının Prezidenti, Müzəffər Ali Baş Komandan cənab İlham Əliyev bu böyük siyasi irsi uğurla davam etdirir, onu zəmanəmizin çağırışlarına uyğun olaraq inkişaf etdirir.

2020-ci ildə baş vermiş 44 günlük Vətən müharibəsində qazanılan Qələbə – məhz Heydər Əliyevin əsasını qoyduğu güclü dövlətçilik təməllərinin, milli birliyin və güclü ordunun təntənəsidir. Bu Qələbə, Ulu Öndərin “Qarabağ Azərbaycandır!” ideyasının reallığa çevrilməsi deməkdir.

Göygöl rayonunun rəhbəri olaraq fəxrlə qeyd etmək istəyirəm ki, rayonumuzda da Ulu Öndərin ideyalarına böyük ehtiramla yanaşılır. Biz Heydər Əliyev irsinin qorunmasını təkcə siyasi deyil, həm də mənəvi borcumuz hesab edirik. Rayonumuzun sosial-iqtisadi inkişafında, infrastrukturun müasirləşdirilməsində, vətəndaş məmnuniyyətinin təminində məhz bu əvəzsiz irsdən ilham alırıq.

Əhalinin rifah halının yüksəldilməsi, kənd təsərrüfatının inkişafı, yeni istehsal sahələrinin yaradılması, yolların təmiri, məktəb və səhiyyə müəssisələrinin müasirləşdirilməsi — bütün bu işlər Heydər Əliyev siyasətinin bölgə modelidir.

Ulu Öndər deyirdi: “Gənclər bizim gələcəyimizdir.” Biz Göygöldə gənclərin təhsilli, vətənpərvər və dövlətə sadiq ruhda yetişməsinə xüsusi önəm veririk. Təhsil ocaqlarında Heydər Əliyev irsinə dair tədbirlər, inşa və rəsm müsabiqələri, muzey ziyarətləri, seminar və konfranslar keçirilir. Məqsəd – gənc nəsli bu dahi şəxsiyyətin örnəyində tərbiyə etmək, milli kimliyimizi gücləndirməkdir.

Ulu Öndər Heydər Əliyevin daim vurğuladığı bir məqam var idi: “Şəhidlər bizim baş tacımızdır.” Mən bu sözləri rəhbər tutaraq, rayonumuzda şəhid ailələri və qazilərlə işə xüsusi diqqət yetirirəm. Onların mənəvi və maddi problemlərinin həlli, evlə təmin olunmaları, sosial xidmətlərə çıxış imkanları daim nəzarətimizdədir.

Rayonda mütəmadi olaraq şəhid ailələri ilə görüşlər keçirilir, onların qayğıları dinlənilir və imkan daxilində dərhal həll olunur. Bu təkcə vəzifə borcu deyil – bu, mənim vicdani və vətəndaşlıq məsuliyyətimdir.

Hər il 10 may tarixində Göygöl rayonunda Ulu Öndər Heydər Əliyevin doğum günü ilə bağlı silsilə tədbirlər keçirilir. Abidəsi önünə gül qoyma mərasimləri, məktəblərdə dərnəklər, mədəniyyət evlərində təqdimatlar və film nümayişləri təşkil olunur. Bu tədbirlər gənc nəsildə liderə hörmət hissini formalaşdırır, onları tarixə və köklərinə bağlayır.

102 illik yubiley münasibətilə də Göygöldə geniş proqram hazırlanmış, əhalinin bütün təbəqələrinin iştirakı ilə Ulu Öndərin əziz xatirəsi ehtiramla anılmışdır.

Heydər Əliyev adi bir siyasətçi deyildi – o, bir sistem qurdu. O sistem ki, bu gün Prezident İlham Əliyevin rəhbərliyi ilə yeni zirvələri fəth edir. O sistem ki, əsrlərlə Azərbaycan xalqının yolunu işıqlandıracaq.

Mən Elvin Paşayev olaraq qürurla bəyan edirəm: mən Ulu Öndər Heydər Əliyevin siyasi məktəbinin bir davamçısıyam. Onun ideyaları mənim üçün yol xəritəsidir. Bu yoldan bir an belə sapmadan, sadiqliklə və əzmkarcasına çalışmaq, xalqımıza ləyaqətlə xidmət etmək mənim əsas missiyamdır.

Allah Ulu Öndər Heydər Əliyevə rəhmət eləsin. Onun əziz xatirəsi hər zaman qəlbimizdə yaşayacaq. Onun qurduğu dövlət isə daim yüksələcək!