Bakı şəhəri 335 nömrəli məktəbdə “Beynəlxalq Ana Dili Günü” qeyd olundu

Bakı şəhəri 335 nömrəli tam orta məktəbdə "Ana dili və Ədəbiyyat" müəllimi Zümrüd müəllimin təşkilatçılığı ilə 21 fevral – Beynəlxalq Ana Dili Gününə həsr olunmuş tədbir keçirildi. Tədbirdə məktəbin şagirdləri, müəllimləri və digər qonaqlar iştirak etdilər.
Tədbirin əsas məqsədi şagirdlərə ana dilimizin gözəlliyini, onun qorunmasının və inkişaf etdirilməsinin vacibliyini aşılamaq idi. Şagirdlər çıxış edərək ana dili haqqında maraqlı məlumatlar verdilər, görkəmli Azərbaycan şairlərinin dilimizə həsr etdiyi şeirləri səsləndirdilər. Onların ifasında səslənən şeirlər və nitqlər tədbir iştirakçıları tərəfindən maraqla dinlənildi.
Zümrüd müəllim çıxışında ana dilinin hər bir xalqın milli kimliyinin ən mühüm göstəricilərindən biri olduğunu vurğuladı. O, Azərbaycan dilinin dövlət dili kimi qorunmasının və zənginləşdirilməsinin hər bir vətəndaşın borcu olduğunu qeyd etdi. Tədbirin sonunda məktəb rəhbərliyi və müəllimlər şagirdlərə təşəkkür edərək, onların bu kimi maarifləndirici tədbirlərdə fəal iştirak etmələrinin vacibliyini vurğuladılar.
Bu cür tədbirlər ana dilinə sevgi və hörmət hissini daha da gücləndirir, gənc nəslin milli-mənəvi dəyərlərə bağlılığını artırır.

Fərid Faiqoğlu
AJB-nin üzvü