Sui-qəsd cəhdində onu qoruyan şəxsə yüksək vəzifə verdi

ABŞ Prezidenti Donald Tramp Şon Kurranı ölkənin Məxfi Xidmətinin yeni direktoru təyin edib. 

“Qafqazinfo” xəbər verir ki, Tramp bu barədə məlumatı “The Truth” sosial şəbəkə hesabında açıqlayıb. 

Kurran ötən ilin iyulunda Pensilvaniyada Trampa qarşı sui-qəsd zamanı onu müdafiə edən cangüdənlər qrupuna rəhbərlik edirdi. 

“O, Pensilvaniyada öz həyatını riskə ataraq mənim həyatımı güllədən qorumağa kömək edib və bununla qorxmaz igidlik nümayiş etdirib. Tamamilə əminəm ki, Şon ABŞ-nin Məxfi Xidmətini əvvəllər olduğundan daha güclü edəcək”, - deyə Tramp qeyd edib. 

Qeyd edək ki, Şon Kurran 2001-ci ildən Məxfi Xidmətdə işləməyə başlayıb və 23 il hüquq-mühafizə orqanlarında çalışıb. O bu vəzifədə Ron Rouvu əvəz edəcək.