Xırdalanda müəllim direktoru məhkəməyə verdi - Foto+Yenilənib

Xırdalan şəhər 2 saylı tam orta məktəbin riyaziyyat müəllimi Vəfa Həziyeva məktəbin direktoru Gülnaz Kərimovanı və tədris hissə müdirini xüsusi ittiham qaydasında məhkəməyə verib.

“Qafqazinfo” xəbər verir ki, Abşeron Rayon Məhkəməsinə müraciət edən müəllim direktorun və tədris hissə müdirinin Cinayət Məcəlləsinin 148-ci (Təhqir) maddəsinə əsasən cəzalandırılmasını tələb edib.

V.Həziyeva direktorun onu şagirdlərin və məktəb işçilərinin yanında təhqir etdiyini, ləyaqətini alçaltdığını deyib.

Həmçinin məlum olub ki, müəllimlə direktor arasında bir müddətdir narazılıq var və V.Həziyeva məktəb rəhbəri barəsində mətbuatda da tənqidi fikirlər səsləndirib.

Abşeron Rayon Məhkəməsi V.Həziyevanın müraciətində Cinayət Prosessual Məcəlləsinin bəzi tələblərinin pozulması, təqdim edilmiş sənəd və sübutların tam olmaması qənaətinə gəlib. Bu səbəbdən ərizə icraata qəbul edilməyib.

***

Abşeron-Xızı Regional Təhsil İdarəsi​ bildirilib ki, Vəfa Həziyevanın çalışdığı dövrdə məktəbdaxili davranış qaydalarına zidd hərəkətlər etməsi ilə bağlı İdarəyə daxil olan müraciətə əsasən məsələ ilə bağlı araşdırma aparılıb:

“Aparılan araşdırma nəticəsində Təhsilverənlərin etik davranış qaydalarını pozduğuna görə qanunvericiliyin tələblərinə uyğun olaraq onunla bağlanmış əmək müqaviləsinə 4 noyabr 2024-cü il tarixində xitam verilib. 

Qeyd edirik ki, təhsilverənlərin etik davranış qaydalarına əməl edilməsi əsas prioritetlərdəndir, prosesə nəzarət edilməsi regional təhsil idarəsi tərəfindən diqqətdə saxlanılır”.

Fotoda: Vəfa Həziyeva