“Parlamentdə Ziyad Səmədzadə kimi ziyalılara, ağsaqqallara ehtiyac var”-SEÇİCİLƏR – DEPUTATLIĞA NAMİZƏD ZİYAD SƏMƏDZADƏNİN SEÇİCİLƏRLƏ NÖVBƏTİ GÖRÜŞÜ DƏ İZDİHAMLIĞI VƏ MÖHTƏŞƏMLİYİ İLƏ YADDA QALDI – FOTOLAR – YENİLƏNİB

23 saylı Nəsimi-Səbail Seçki Dairəsindən deputatlığa namizəd, akademik, tanınmış ictimai-siyasi xadim Ziyad Səmədzadənin növbədənkənar parlament seçkiləri ilə bağlı təbliğat-təşviqat mərhələsi çərçivəsində seçicilərlə növbəti-sonuncu böyük görüşü keçirilib.

Görüş yenə Azərbaycan Milli Konservatoriyası nəzdində Musiqi Kollecində (Asəf Zeynallı adına Musiqi Məktəbində) baş tutub.

300-dən çox seçicinin, o cümlədən tanınmış elm, mədəniyyət, əbədiyyat, incəsənət xadimlərinin, ziyalıların, Şəhid atası və İkinci Vətən Müharibəsi Qazisinin iştirak etdiyi görüş izdihamlığı və möhtəşəmliyi ilə yadda qalıb.

Etikxeber.az xəbər verir ki, görüşdə öncə Şəhidlərin xatirəsi bir dəqiqəlik sükutla yad edilib, Dövlət himni səsləndirilib.

Sonra çıxışlar başlayıb.

Vahid ƏZİZ: “Ziyad müəllim də, mən də Heydər Əliyev siyasi məktəbinin yetirmələriyik. İkimiz də Heydər Əliyev siyasi məktəbində oxumuşuq, dərs almışıq”

Görüşün aparıcısı Xalq şairi Vahid Əziz Ziyad Səmədzadənin zəngin həyat, ömür yolundan, elmi yaradıcılığından, ictimai-siyasi fəaliyyətindən danışaraq, deputatlığa namizədə seçkilərdə uğurlar arzulayıb.

“Ziyad müəllim də, mən də Heydər Əliyev siyasi məktəbinin yetirmələriyik. İkimiz də Heydər Əliyev siyasi məktəbində oxumuşuq, dərs almışıq. O məktəbin yetirmələri, o dövrün insanları bir-biri ilə üz-üzə gələndə yenə də çox mehribancasına, çox səmimi şəkildə görüşürlər. Çünki böyük bir məktəb keçiblər, böyük bir məktəb keçmişik”-deyə, V. Əziz əlavə edib.

“Azərbaycanda onun kimi gözəl rəqs edən ikinci bir kişi yoxdur”

V. Əziz həmçinin Z. Səmədzadə ilə qonşu, ailəvi dost olduğunu deyib.

“Biz tez-tez ad günlərində, digər önəmli günlərdə bir araya gəlir, bir yerə yığışır, bir masa ətrafında əyləşirik. Ziyad müəllim gözəl musiqi bilicisidir. Gözəl tar çalmağı var. Gözəl rəqs etməyi var. Azərbaycanda onun kimi gözəl rəqs edən ikinci bir kişi yoxdur”-deyə, V. Əziz bildirib.

Əmir PƏHLƏVAN: “Bugünə kimi cəmi iki şəxsin sözcüsü olmuşam-onlardan biri müstəqil Azərbaycan dövlətinin qurucusu Heydər Əliyev, biri də canlı klassikimiz, böyük ziyalımız Ziyad müəllimdir…”

Tanınmış yazıçı-dramaturq Əmir Pəhləvan çıxışında qeyd edib ki, parlamentin Ziyad Səmədzadə kimi insanlara ehtiyacı var.

“Parlamentdə təsadüfi insanlar ola bilməz. Parlament peşəkarların, Ziyad müəllim kimi təcrübəli, bilikli, savadlı insanların yeridir. Parlamentdə belə insanlara ehtiyac var. Eyni zamanda məni tanıyanlar bilir ki, hər tədbirdə, hər məclisdə iştirak və çıxış etmirəm. Mən bugünə kimi cəmi iki şəxsin sözcüsü olmuşam. Onlardan biri müstəqil Azərbaycan dövlətinin qurucusu Heydər Əliyev, biri də canlı klassikimiz, böyük ziyalımız Ziyad müəllimdir. Çünki hər ikisi də böyük şəxsiyyətdir, hər ikisi də bu millətin ən layiq övladlarından biridir”-deyən Ə.Pəhləvan seçiciləri 1 sentyabrda Z. Səmədzadəyə səs verməyə dəvət edib.

O, eyni zamanda yazdığı “Seçim Sizinkidir, düzə səs verin!” şeirini səsləndirib və görüş iştirakçıları tərəfindən alqışlanıb.

Biz yenə görüşdük, ay əzizlərim,

Yenə görüşdürdü istəklər bizi,

O dəfə çin oldu, vədim, sözlərim,

Bu dəfə göstərin iradənizi.

Həmişə mən Sizə arxalanmışam,

Gərək səsinizi cahana yayam,

Həmişə yolumda olubsunuz şam,

O nuru mən geri qaytarmalıyam.

“Millət”-deyənləri, “bal” yeyənləri,

Hamınız, hamınız tanımalısız,

Sizlərə “gəl”-deyib, “can” deyənləri

– Özünüz birəbir sınamalısız.

Siz ey sevənlərim, səs verənlərim,

Sizlərə Göy qədər məhəbbətim var,

Qayadan möhkəməm, bulaqdan həlim,

Mənim də bax belə təbiətim var.

Mən sizin adamam – sadə, işgüzar,

Həmişə yaratmaq diləyindəyəm,

Xoşbəxtəm- sizlər tək tərəfdarım var,

Xoşbəxtəm – sizlərin ürəyindəyəm.

Biz yenə görüşdük, ay əzizlərim,

Yenə görüşdürdü istəklər bizi,

O dəfə çin oldu vədim, sözlərim,

Bu dəfə – göstərin iradənizi.

Həmişə mən sizə arxalanmışam,

Gərək səsinizi aləmə yayam,

Həmişə yolumda olubsunuz şam,

O nuru mən geri qaytarmalıyam.

İndi söz də sizin, meydan da sizin,

Ən doğru, ən dürüst sözə səs verin,

İşığı var olsun ürəyinizin,

Haqqa, ədalətə, düzə səs verin.

Bəyalı ATAŞOV: “Parlamentdə cavanlar da, gənclər də, eləcə də təcrübəli insanlar, ağsaqqallar olmalıdır”

Əməkdar elm xadimi Bəyalı Ataşov çıxışında Ziyad Səməzdadə ilə 35 ildən artıq bir müddət ərzində dostluq, tanışlıq, əməkdaşlıq münasibətlərinə malik olduğunu bildirib.

Eyni zamanda özünü Ziyad Səmədzadə məktəbinin yetişdirməsi adlandırıb.

“35 ildən artıqır ki, Ziyad müəllimi tanıyıram, onunla bir yerdəyəm. Özümü şəxsən onun köməkçisi sayıram və bundan qürur duyuram. Çünki Ziyad müəllim böyük insan, böyük ziyalı, əsl ağsaqqaldır. Parlamentdə də belə ziyalılara, müdrik insanlara, elm xadimlərinə, ağsaqqallara ehtiyac var. Bəzən görürsən ki, opponentlərimiz yaşlı adamlara ağızlarını büzürlər, deyirlər ki, onların parlamentdə nə işi var. Bu, çox yanlış və ədalətsiz yanaşmadır. Bununla heç cür razılaşmaq mümkün deyil. Parlamentdə cavanlar da, gənclər də, eləcə də təcrübəli insanlar, ağsaqqallar olmalıdır. Məsələ var ki, cavanın biləyi, yaşlının biliyi. Odur ki, parlamentdə məhz Ziyad müəllim kimi insanlar olmalıdır”-deyə, B. Ataşov sözlərinə əlavə edib.

Məhiş ƏHMƏDOV: “Bu insan özünü də, ömrünü də Azərbaycan elminə, Azərbaycan dövləti və xalqına həsr edib”

“Şöhrət” ordenli iqtisad elmləri doktoru Məhiş Əhmədov da çıxışında Ziyad Səmədzadənin insani-şəxsi keyfiyyətlərindən, həm də Azərbaycan iqtisad elminə, Azərbaycan ziyalılığına, Azərbaycan ictimai-siyasi həyatına verdiyi töhfələrdən danışıb.

1970-ci ildən bu yana 54 il ərzində yaxından tanıdığı deputatlığa namizədi Azərbaycan iqtisad elminin korifeyi adlandırıb.

“Ziyad müəllimin Azərbaycan iqtidad elminə, iqtisadiyyatımızın inkişafına verdiyi töhfələri saymaqla qurtarmaq olmaz. Çünki bir deyil, beş deyil, on deyil. Bu insan özünü də, ömrünü də Azərbaycan elminə, Azərbaycan dövləti və xalqına həsr edib. Ona görə hər birimiz Ziyad müəllimin namizədliyini ürəkdən dəstəkləyirik və bir nəfər kimi də 1 sentyabrda ona səs verəcəyik”-deyə, M. Əhmədov fikirlərini tamamlayıb.

Şəhid atasından Ziyad Səmədzadəyə-DƏSTƏK

İkinci Vətən Müharibəsi Şəhidi Cəbrayıl Mikayılovun atası Valeh Mikayılov çıxışı zamana Ziyad Səmədzadəyə böyük hörmət və ehtiramı olduğunu bildirib.

Qeyd edib ki, seçkilərdə ailəlikcə Ziyad Səmədzadəyə səs verəcəklər.

“Mənim övladım cəmi 10 ayın Əsgəri idi və Vətən yolunda qəhrəmancasına Şəhid oldu. Övlad, oğul itkisi nə qədər çətin, ağır olsa da, Cəbrayılımla fəxr edir, qürur duyuram. Fəxr edir, qürur duyuram ki, belə bir igid, qəhrəman oğulun atasıyam. Allah Qalib Azərbaycanımızı, Rəşadətli Ordumuzu qorusun! Ziyad müəllim, Sizə də böyük hörmətimiz var və seçkilərdə də Sizə səs verəcəyik”-deyə, Şəhid atası bildirib.

Qazi Aqil İSLAMOV: “Bir gün Milli Məclisin önündə Ziyad müəllimlə qarşılaşdım, məni axıracan, səbrlə dinlədi, bir ata, valideyn kimi can yandırdı…”

İkinci Vətən Müharibəsi Qazisi, ali təhsilli-peşəkar hərbçi, Kapitan Aqil İslamov da öz növbəsində seçkilərdə Ziyad Səmədzadəyə səs verəcəyini, ona alternativ görmədiyini deyib.

“Mənim bir ziyalı, bir ağsaqqal kimi Ziyad müəllimə çox böyük hörmətim var. Bir gün Milli Məclisin önündə Ziyad müəllimlə qarşılaşdım və bir Qazi kimi ürəyimi ona açdım, problemlərimi söylədim. Məni axıracan, səbrlə dinlədi, bir ağsaqqal kimi məsləhətlərini verdi, bir ata, valideyn kimi can yandırdı. Mənim qaldırdığım problemlərin həllinə kömək etdi. Ona görə Ziyad müəllimi yenidən parlamentdə görmək istəyirəm. Parlamentdə Ziyad müəllim kimi insanlar, ağsaqqallar olmalıdır”-deyə, Qazi bildirib.

Görüş iştirakçılarından-araşdırmaçı Xəyalə Məmmədova, şəhər sakini Sürəyya xanım, UNEC-in dekanı Mirağa müəllim də çıxışlarında Ziyad Səmədzadəyə seçkilərdə uğurlar arzulayıb və seçiciləri ona səs verməyə dəvət ediblər.

Nəsimi sakinlərindən Ziyad Səmədzadəyə-TƏŞƏKKÜR

Şəhər sakini-seçici Sürəyya xanım eyni zamanda yaşadığı həyətin-Süleyman Rəhimov küçəsi 129-un sakinləri adından Ziyad Səmədzadəyə təşəkkür edib.

“Ziyad müəllim bugünlərdə bizim həyətdə oldu və sakinlərlə görüşdü. Bəzi məsələlər var idi ki, onları dilə gətirdik. Ziyad müəllim dərhal operativ reaksiya göstərdi, aidiyyatı qurumlarla əlaqə saxladı və qaldırdığımız məsələləri həll etdi. Odur ki, həyətimizin sakinləri adından Ziyad müəllimə öz təşəkkürümü bildirir və ona seçkilərdə uğurlar arzulayıram. Hər birimiz Ziyad müəllimə səs verəcəyik”-deyə, o, əlavə edib.

ZİYAD SƏMƏDZADƏ: “Hər zaman qapım da, telefonum da insanların üzünə açıq olacaq”

Sonda Z. Səmədzadə çıxış edib.

Görüş iştirakçılarına minnətdarlığını ifadə edib, yenidən etimad göstəriləcəyi təqdirdə, bir daha insanlarla, 23 saylı Seçki Dairəsinin sakinləri ilə sıx təmasda, əlaqədə olacağını, onların qaldırdığı hər bir məsələyə diqqətlə, həssaslıqla yanaşacağını və həmin məsələlərin həlli istiqamətində əlindən gələni əsirgəməyəcəyini bildirib.

“Mən ömrümü Azərbaycan elminə, müstəqil Azərbaycan dövlətinə və Azərbaycan xalqıma həsr etmişəm. Bundan da böyük qürur hissi keçirirəm. Bundan sonra da belə olacaq, Azərbaycan dövlətinə və Azərbaycan xalqına xidmət edəcəyəm. Hər bir kəsin, hər bir seçiçinin yanında olacağam, hər zaman qapım da, telefonum da insanların üzünə açıq olacaq”-deyə, Z. Səmədzadə sonda qeyd edib.

***

FOTOLAR:

Kamil HƏMZƏOĞLU (HƏMİDOV)

Etikxeber.az