Teymur Rəcəbov FIDE reytinqində irəliləyib

FIDE şahmatçıların fevral reytinqini açıqlayıb.

İdman.biz xəbər verir ki, siyahıda Azərbaycan yığmasının üzvlərindən ən yaxşı göstərici Teymur Rəcəbova məxsusdur.

İki pillə irəliləyən şahmatçımız 2723 xalla 25-cidir. Şəhriyar Məmmədyarov iki pillə geriləyərək, 26-cı yerə enib. Onun aktivində 2722 xalı var.

Bir pillə geriləyən Rauf Məmmədov (2651) 88-ci yerə enib. Nicat Abbasov bir aylıq fasilədən sonra yenidən “100-lüy”ə qayıdaraq 2641 xalla 96-cıdır.

Azərbaycan yığmasının sabiq üzvü, hələ də ölkəmizin təmsilçisi kimi göstərilən Arkadi Naydiç 2661 xalla 74-cüdür.

Reytinq cədvəlinə norveçli Maqnus Karlsen (2830) başçılıq edir. Onu ABŞ-nin şərəfini qoruyan Fabiano Karuana (2804) və Hikaru Nakamura (2788) izləyirlər.

Qadın şahmatçılarımızdan ən yaxşı göstəriciyə yenə Günay Məmmədzadə malikdir. O, mövqeyini qoruyub. 26-cı yerdə olan yığma üzvünün aktivində 2449 xalı var. Ülviyyə Fətəliyeva (2384) 65-ci, Gövhər Beydullayeva (2374) 76-cı, Gülnar Məmmədova (2351) 100-cü pillədə qərarlaşıblar. Gövhərin bir addım irəlilədiyi siyahıda Ülviyyə bir, Gülnar üç pillə geriləyib, ötən ay 99-cu olan Xanım Balacayeva “100-lüy”ü tərk edib.

Siyahıya çinli Yifan Hou (2632) başçılıq edir. İkinci pillədə Venjun Ju (Çin, 2559), üçüncü sırada Hampi Koneru (Hindistan, 2554) qərarlaşıblar.