İraqda İŞİD komandiri yaxalanıb

İraqın təhlükəsizlik xidmətləri Kərkük vilayətində keçirilən antiterror əməliyyatı nəticəsində İraq Şam İslam Dövləti (İŞİD) qruplaşmasının yüksək rütbəli komandirini saxlayıb.

Bu barədə İraqın müvafiq qurumu “X” (keçmiş “Twitter”) sosial şəbəkəsindəki səhifəsində məlumat yayıb.

“Diqqətli kəşfiyyat işi və daimi monitorinq sayəsində terrorla mübarizə xidmətinin əməkdaşları kürd birləşməsinin əməliyyat şöbəsi ilə birlikdə Kərkük vilayətində terror qruplaşmasının komandiri Əbu Baharini saxlayıblar”, - deyə məlumatda bildirilir.

Vurğulanır ki, Bahari İŞİD qruplaşmasının “xarici batalyon”una rəhbərlik edib.

Məlumatda həmçinin qeyd olunub ki, əməliyyat ölkənin baş naziri, eyni zamanda İraq Silahlı Qüvvələrinin baş komandanı olan Məhəmməd əl-Sudaninin göstərişi ilə həyata keçirilib.

Mənbə: Oxu.Az