Bir sıra ölkələrdə quş qripi və blutanq xəstəlikləri ilə bağlı məhdudiyyətlər aradan qaldırılıb

Qida Təhlükəsizliyi Agentliyi Ümumdünya Heyvan Sağlamlığı Təşkilatından daxil olan məlumatlar əsasında dünyadakı epizootik vəziyyətə uyğun olaraq müvafiq tədbirlər həyata keçirir.

Agentliyin İnformasiya təminatı və innovativ həllər şöbəsindən AZƏRTAC-a bildiriblər ki, Ümumdünya Heyvan Sağlamlığı Təşkilatının rəsmi məlumatına əsasən, Amerika Birləşmiş Ştatlarının Nyu-York, Kentukki, Arkansas ştatlarında və Toqonun Maritaym vilayətində qeydə alınmış yüksək patogen quş qripi, Rusiyanın Primorsk diyarında qeydə alınmış Nyukasl, Serbiyanın Raşka və Rasina əyalətlərində qeydə alınmış blutanq xəstəliyi aradan qaldırılıb.

Həmin ərazi vahidlərində Ümumdünya Heyvan Sağlamlığı Təşkilatının “Quruda yaşayan heyvanların sağlamlıq Məcəlləsi”nə əsasən, həmin xəstəliklərin ləğv edilməsindən sonra gözləmə müddəti başa çatıb və xəstəliklərə görə epizootik sağlamlıq statusu bərpa olunub.

Bununla əlaqədar, respublika ərazisinin həmin yoluxucu xəstəliklərdən qorunması məqsədilə Amerika Birləşmiş Ştatlarının, Toqo, Rusiya və Serbiyanın həmin inzibati ərazi vahidlərinə tətbiq edilmiş məhdudiyyətlər aradan qaldırılıb.