“Liverpul”u udaraq ÇL-ə vəsiqə qazandılar

İngiltərə Premyer Liqasının 35-ci turunun mərkəzi qarşılaşmasında “Mançester Yunayted” öz meydanında prinsipial rəqibi “Liverpul”u qəbul edib.

“Qafqazinfo” xəbər verir ki, “Old Trafford”da keçirilən dramatik oyun ev sahiblərinin 3:2 hesablı qələbəsi ilə başa çatıb.

Qarşılaşma “qırmızı şeytanlar”ın sürətli hücumları ilə başlayıb. Artıq 6-cı dəqiqədə Mateus Kunya hesabı açıb. Cəmi 6 dəqiqə sonra – 12-ci dəqiqədə isə Benyamin Şeşko fərqi ikiyə çıxararaq azarkeşləri sevindirib.

İkinci hissəyə isə “mersisaydlılar” daha fəal başlayıblar. 47-ci dəqiqədə Dominik Soboslai fərqi azaldıb, 56-cı dəqiqədə isə Kodi Qakpo bərabərlik qoluna imza atıb. Lakin matçın son nöqtəsini 77-ci dəqiqədə Kobi Mainoo qoyaraq komandasına vacib 3 xalı qazandırıb.

Qeyd edək ki, bu qələbə sayəsində xallarını 64-ə çatdıran “Mançester Yunayted” turnir cədvəlində 3-cü pilləyə yüksəlib və növbəti mövsüm üçün UEFA Çempionlar Liqasının liqa mərhələsinə vəsiqəni təmin edib. “Liverpul” 58 xalla 4-cü, “Arsenal” isə 76 xalla liderliyini davam etdirir