“Müharibə İranın düşüncə tərzini dəyişdirməyi hədəfləyir”

“Vaşinqtonun həyata keçirdiyi hərbi əməliyyatların əsas məqsədi İranın nüvə silahı əldə etmək niyyətindən birdəfəlik imtina etməsinə nail olmaqdır”.

“Qafqazinfo” xəbər verir ki, bunu ABŞ-nin Vitse-prezidenti Ceyms Devid Vens “Fox News” telekanalına müsahibəsində deyib.

O qeyd edib ki, əməliyyatlar İranın düşüncə tərzini dəyişdirməyə hesablanıb.

Vensin sözlərinə görə, ABŞ Prezidenti Donald Tramp ötən il həyata keçirilən “Gecəyarısı Çəkic” əməliyyatı ilə Tehranın üç əsas nüvə obyektini hədəfə alaraq, İranın nüvə silahı yaratmaq imkanlarını məhdudlaşdırmağa nail olub.

Vitse-prezident vurğulayıb ki, Vaşinqton sonradan təxminən bir il ərzində Tehranla diplomatik danışıqlar aparmağa çalışıb, lakin İranın mövqeyində ciddi dəyişiklik müşahidə olunmayıb.

Onun sözlərinə görə, Tramp administrasiyası nəticədə belə qənaətə gəlib ki, məqsədə çatmaq üçün “İran rejimində fundamental düşüncə dəyişikliyi” zəruridir:

“Prezident İran rejiminin zəiflədiyini və onların nüvə silahı astanasına çatmağa sadiq qaldıqlarını gördü. ABŞ-nin və müttəfiqlərinin təhlükəsizliyini qorumaq üçün tədbir görməyin vacib olduğunu hesab etdi”, – deyə Vens vurğulayıb.

O əlavə edib ki, “Epik Qəzəb” əməliyyatının konkret, aydın məqsədi var və bu səbəbdən uzunmüddətli, illərlə davam edən münaqişəyə çevrilməyəcək.

Vensin sözlərinə görə, əsas hədəf İranın nüvə silahına sahib ola bilməyəcəyi və gələcəkdə bu potensialı bərpa etməmək üçün uzunmüddətli öhdəlik götürməsidir.

O bildirib ki, Tramp administrasiyası aydın sonluq və konkret strategiya olmadan çoxillik münaqişəyə girməyəcək.