İş adamı Cəbrayıl Cəbrayılov: Heydər Əliyev – Müstəqil Azərbaycanın şərəfli yolunu işıqlandıran DAHİ LİDER

12 dekabr Azərbaycan xalqının ümummilli kədər və ehtiram günüdür. Bu tarix Ulu Öndər Heydər Əliyevin anım günüdür və hər bir azərbaycanlı bu günü dərin minnətdarlıq hissi ilə yad edir. Onun həyat yolu, dövlətçilik irsi, ölkəmizin inkişafı naminə göstərdiyi qətiyyət və fədakarlıq təkcə bir şəxsiyyətin deyil, bütöv bir millətin taleyini dəyişdirdi. Heydər Əliyevin fəaliyyəti ilə Azərbaycan tarixində yeni bir mərhələ başlandı – müstəqil, güclü və sabit Azərbaycan dövləti formalaşdı.

Heydər Əliyev XX əsrin və XXI əsrin əvvəllərinin ən böyük siyasi liderlərindən biri kimi tanınır. Onun fəaliyyəti sadəcə dövrünün çətinliklərini aradan qaldırmaq deyil, həm də gələcəyin inkişaf modelini yaratmaq idi. Bu baxımdan Ulu Öndərin gördüyü işlər bir neçə onilliyi əhatə edən strateji inkişaf proqramı kimi dəyərləndirilir. Xalqın ona olan böyük sevgisi və inamı da məhz bu uzaqgörənlikdən qaynaqlanır.

Heydər Əliyevin dövlətçilik fəaliyyətinə diqqət yetirdikdə, onun Azərbaycana iki mühüm mərhələdə rəhbərlik etdiyini görürük. 1969-cu ildə Azərbaycana rəhbər gətirilməsi ilə respublikanın sosial-iqtisadi həyatında böyük canlanma yarandı. Energetika, maşınqayırma, kimya sənayesi, kənd təsərrüfatı, tikinti və digər sahələr sürətlə inkişaf etməyə başladı. O illərdə Azərbaycan Sovet İttifaqında ən qabaqcıl respublikalardan birinə çevrildi. Bu, Heydər Əliyevin idarəçilik qabiliyyətinin, xalqın problemlərini dərindən bilməsinin və inkişaf strategiyasını dəqiq müəyyənləşdirməsinin nəticəsi idi.

Ulu Öndər yalnız Azərbaycan daxilində deyil, ittifaq səviyyəsində də böyük nüfuz sahibi olmuşdu. SSRİ rəhbərliyində yüksək vəzifələrdə işləyərkən də milli maraqları daim müdafiə edir, Azərbaycanın inkişafını diqqət mərkəzində saxlayırdı. O, istedadlı azərbaycanlıların yüksək vəzifələrə irəli çəkilməsinə, elm və təhsilin inkişafına, milli-mənəvi dəyərlərimizin qorunmasına böyük töhfələr verirdi.

Müstəqilliyin ilk illərində ölkə çox çətin durumda idi. 1991–1993-cü illərdə Azərbaycan faktiki olaraq parçalanma həddində idi. Ermənistanın hərbi təcavüzü, ölkədaxili siyasi qarşıdurmalar, hakimiyyətsizlik, iqtisadi tənəzzül ölkəni böyük uçuruma sürükləyirdi. Belə ağır bir zamanda xalqın nicat yolu yenidən Heydər Əliyevə üz tutmaq oldu. 1993-cü ildə Naxçıvandan Bakıya dəvət olunan Ulu Öndər ölkəni qısa müddətdə sabitləşdirdi. Onun hakimiyyətə qayıdışı Azərbaycan üçün qurtuluş, xalq üçün əminlik və dövlətçilik üçün yeni başlanğıc oldu.

Heydər Əliyevin ikinci hakimiyyət dövrü müasir Azərbaycan dövlətinin əsaslarının qoyulması ilə yadda qaldı. Dövlət idarəçiliyində köklü islahatlar aparıldı, iqtisadiyyatın liberallaşdırılması, bazar iqtisadiyyatına keçid, beynəlxalq əlaqələrin genişləndirilməsi istiqamətində mühüm addımlar atıldı. 1994-cü ildə imzalanmış “Əsrin müqaviləsi” Azərbaycanın enerji strategiyasının təməlini qoydu, ölkəni beynəlxalq enerji xəritəsində mühüm aktora çevirdi. Bu müqavilə təkcə iqtisadi deyil, həm də siyasi uğur olaraq Azərbaycanın müstəqilliyinin möhkəmlənməsinə xidmət etdi.

Ulu Öndərin rəhbərliyi ilə Azərbaycanda hüquqi dövlət quruculuğunun təməli atıldı. 1995-ci ildə qəbul olunan Konstitusiya xalqın iradəsinin ifadəsi olmaqla yanaşı, ölkənin müstəqilliyinin qorunmasında, hakimiyyət bölgüsünün formalaşmasında böyük rol oynadı. Azərbaycan insan hüquqlarının müdafiəsi, azad iqtisadi münasibətlər, siyasi plüralizm və demokratik institutların yaradılması sahəsində mühüm irəliləyişlər əldə etdi.

Heydər Əliyev Azərbaycançılıq ideologiyasını formalaşdıraraq milli birlik və həmrəyliyin inkişafına mühüm töhfə verdi. Bu ideya ölkə daxilində və xaricdə yaşayan bütün azərbaycanlıları bir araya gətirən, dövlətin inkişafına xidmət edən mənəvi-siyasi platformaya çevrildi. Heydər Əliyevin təşəbbüsü ilə Dünya Azərbaycanlılarının Qurultaylarının keçirilməsi də milli həmrəyliyin möhkəmlənməsində mühüm rol oynadı.

Onun xarici siyasət xətti Azərbaycanı beynəlxalq aləmdə etibarlı tərəfdaş kimi tanıtdı. Ulu Öndər balanslaşdırılmış siyasət aparmaqla ölkənin milli maraqlarını qorumağı bacardı. Azərbaycanın BMT, ATƏT, Avropa Şurası kimi beynəlxalq təşkilatlarla əməkdaşlığının güclənməsi, bir çox qlobal layihələrə qoşulması məhz onun uğurlu diplomatiyasının nəticəsidir.

Heydər Əliyevin irsinin ən mühüm hissələrindən biri də onun Azərbaycan gəncliyinə göstərdiyi diqqət idi. O, ölkənin gələcəyini gənclər üzərində qururdu və dəfələrlə vurğulayırdı ki, müstəqil Azərbaycanın sabahı sağlam düşüncəli, savadlı və vətənpərvər gənclərdən asılıdır. Bu gün ölkəmizdə gənclər siyasətinin güclü inkişaf etməsi, təhsilin beynəlxalq səviyyədə inteqrasiya olunması məhz Ulu Öndərin müəyyən etdiyi xətt üzrə davam edir.

Heydər Əliyev xalqın sevgisini qazanmış nadir liderlərdəndir. Onun sadəliyi, humanistliyi, insanlara göstərdiyi qayğı, dövlətçilik naminə fədakarlığı xalq tərəfindən böyük hörmətlə qarşılanırdı. O, Azərbaycan üçün yaşadı, onun bütövlüyü, təhlükəsizliyi və inkişafı naminə gecə-gündüz çalışdı.

Bu gün Ulu Öndərin siyasi kursu onun layiqli davamçısı Prezident İlham Əliyev tərəfindən uğurla həyata keçirilir. Heydər Əliyevin müəyyən etdiyi strateji xətt Azərbaycanın ən çətin mərhələlərdə belə sabitlik və inkişaf yolunu qoruyub saxlayır. 2020-ci ildə tarixi Qələbəmiz, Qarabağ və Şərqi Zəngəzurun azad olunması, ölkəmizin regional liderə çevrilməsi bu böyük siyasətin davamının nəticəsidir.

12 dekabr Ulu Öndər Heydər Əliyevin xatirəsinə ehtiram günüdür. Bu gün bütün Azərbaycan xalqı onun xidmətlərini minnətdarlıqla yad edir. Heydər Əliyevin adı müasir Azərbaycan dövlətinin hər bir uğurunun arxasında dayanır. O, xalqın yaddaşında əbədi yaşayan, zaman keçdikcə dəyəri daha da artan dahi liderdir.

Heydər Əliyev yalnız tariximizdə deyil, həm də qəlbimizdə yaşayır. Onun yaratdığı dövlətçilik sistemi, siyasi irsi və müdrik kəlamları gələcək nəsillər üçün də yol göstəricisi olacaq. Xalqımız Ulu Öndərin xatirəsini hər zaman ehtiramla anacaq, onun ideyalarına və irsinə daim sadiq qalacaq.

Allah rəhmət eləsin!

Cəbrayıl Cəbrayılov

İş adamı