Vətənpərvər xeyriyyəçi xanım Zərniyar Kərimova: “8 Noyabr – Şanlı tariximizin, milli birliyimizin və qürurumuzun zirvəsidir”

Azərbaycanın müasir tarixində elə günlər var ki, onlar xalqın yaddaşına əbədi həkk olunur, nəsillərdən-nəsillərə qürurla ötürülür. Bu günlərdən biri, bəlkə də ən müqəddəsi 8 Noyabr – Zəfər Günüdür. Bu tarix, Azərbaycan xalqının yenilməzliyinin, Vətən sevgisinin və dövlətinə sədaqətinin simvoluna çevrilib. Həmin gün Müzəffər Ali Baş Komandan cənab İlham Əliyevin rəhbərliyi ilə Azərbaycan Ordusu 30 ilə yaxın işğal altında olan torpaqlarımızı azad edərək, ədaləti və tarixi haqqı bərpa etdi.

Xeyriyyəçi xanım Zərniyar Kərimova bu möhtəşəm qələbəni dərin duyğularla xatırlayır və qeyd edir ki, 8 Noyabr təkcə bir qələbə tarixi deyil, həm də milli həmrəyliyin, xalq–ordu–dövlət birliyinin təntənəsidir:

“8 Noyabr Zəfər Günü şanlı tariximizdir. Prezident cənab İlham Əliyevin başçılığı ilə 44 günlük haqq savaşımızda qalib gəldik. Allah şəhidlərimizə rəhmət eləsin, qazilərimizə şəfa versin. Bu Zəfər, Azərbaycan xalqının igidliyinin və sarsılmaz ruhunun parlaq göstəricisidir.”

Zərniyar Kərimova uzun illərdir xeyriyyəçilik fəaliyyəti ilə tanınır. O, xüsusilə şəhid ailələri, qazilər və sosial qayğıya ehtiyacı olan insanlara göstərdiyi dəstək və qayğı ilə cəmiyyətin dərin rəğbətini qazanıb. Onun fəaliyyəti sadəcə maddi köməkdən ibarət deyil — o, həm də mənəvi dayaqdır, insanlara ümid və sevinc bəxş edir. Zərniyar xanım hesab edir ki, şəhid ailələrinə və qazilərə hörmət göstərmək hər bir vətəndaşın müqəddəs borcudur:“Biz bu torpaqlarda azad, başıuca yaşaya biliriksə, bu, şəhidlərimizin canı, qazilərimizin qəhrəmanlığı sayəsindədir. Onlara olan borcumuzu heç vaxt unutmamalıyıq.”

44 günlük Vətən müharibəsi təkcə hərbi qələbə deyil, həm də mənəvi dirçəlişin simvolu oldu. Bu dövrdə Azərbaycan xalqı bir yumruq kimi birləşdi, Ali Baş Komandanın ətrafında səfərbər oldu. Zərniyar Kərimova bu birliyin əsasını xalqın dövlətə inamında və Prezident İlham Əliyevin uzaqgörən siyasətində görür:

“Cənab İlham Əliyev hər zaman xalqının lideri olub. Onun əzmkarlığı, müdrik siyasəti, diplomatik qətiyyəti və güclü ordu quruculuğu siyasəti bizi Zəfərə apardı. Biz bu gün Qələbə sevincini onun rəhbərliyi sayəsində yaşayırıq.”

Zərniyar xanım həmçinin qeyd edir ki, bu gün Azərbaycanın hər bir bölgəsində aparılan bərpa və quruculuq işləri, azad edilmiş torpaqların yenidən dirçəlməsi də Zəfərin davamıdır. Qarabağ və Şərqi Zəngəzurda həyata keçirilən layihələr, şəhərlərin və kəndlərin yenidən bərpası, məktəblərin, xəstəxanaların, yolların tikilməsi — bütün bunlar müstəqil Azərbaycanın gücünü və qüdrətini göstərir.

Zərniyar Kərimova, eyni zamanda, gənc nəslin vətənpərvərlik ruhunda tərbiyə edilməsinin vacibliyini vurğulayır. Onun fikrincə, hər bir azərbaycanlı uşaq Vətən, şəhidlik və qəhrəmanlıq anlayışlarını kiçik yaşlardan dərk etməlidir:“Şəhidlərimizin xatirəsini yaşatmaq, onların qəhrəmanlığını gələcək nəsillərə çatdırmaq bizim mənəvi borcumuzdur. Bu torpaq uğrunda canından keçən hər bir şəhidin adı müqəddəsdir.”

Zərniyar xanımın xeyriyyə fəaliyyəti yalnız Azərbaycanda deyil, ölkə xaricində də nümunə kimi göstərilir. O, müxtəlif sosial layihələrə dəstək verir, imkansız ailələrə yardım edir, təhsil alan gənclərə təqaüdlər ayırır. Bu addımları onun həm insani, həm də vətənpərvər dəyərlərə sadiqliyini nümayiş etdirir.

Sonda xeyriyyəçi Zərniyar Kərimova xalqımızı bu möhtəşəm bayram münasibətilə təbrik edərək belə bir arzu səsləndirir:“Zəfər Günümüz mübarək olsun! Qoy Azərbaycanımız daim qalib, dövlətimiz isə əbədi möhkəm və qüdrətli olsun. Ali Baş Komandanımız cənab İlham Əliyevə möhkəm can sağlığı, dövlətimizin sarsılmazlığı üçün uğurlar arzulayıram. Qarabağ Azərbaycandır – bu, əbədi həqiqətdir!”

Bu səmimi sözlər bir daha göstərir ki, Zərniyar Kərimova kimi fədakar, mərhəmətli və vətənpərvər xanımlar Azərbaycan cəmiyyətinin mənəvi sütunlarını möhkəmləndirir, xalqımızın birliyinə və dövlətimizin əbədiliyinə öz töhfəsini verir.

Fərid Faiqoğlu

Azərbaycan Jurnalistlər Birliyinin üzvü