III Çarlz qardaşının titullarını ləğv edir

Britaniya Kralı III Çarlz qardaşı Şahzadə Endryunun “Şahzadə” titulunu və bütün fəxri adlarını rəsmi şəkildə ləğv etmək prosesinə başlayıb.

“Qafqazinfo” xəbər verir ki, bu barədə məlumatı Bukingem Sarayı yayıb.

Bildirilib ki, Endryuya Vindzordakı “Royal Lodge” malikanəsini tərk etməsi üçün rəsmi bildiriş göndərilib.

Kral ailəsindən verilən açıqlamada qeyd olunub ki, fəxri adların ləğvi ilə bağlı rəsmi prosedur bu gündən etibarən qüvvəyə minib və bundan sonra o, Endryu Mauntbatten-Vindzor adı ilə tanınacaq.

Bəyanatda vurğulanıb ki, qərar Şahzadə Endryunun ona qarşı irəli sürülən ittihamları inkar etməsinə baxmayaraq, zəruri hesab edilib.

“Kral və Kraliça hər cür zorakılıq və istismar qurbanlarına dərin simpatiyalarını bildirirlər”, – deyə açıqlamada qeyd olunub.

Məlumata görə, Endryu yaxın günlərdə Kral ailəsinə məxsus Sandrinham ərazisindəki bir mülkiyyətə köçəcək. Onun yaşayış xərclərinin Kral III Çarlz tərəfindən şəxsi vəsaiti hesabına qarşılanacağı bildirilib.

Qeyd edək ki, Şahzadə Endryu uzun müddətdir cinsi istismar cinayətlərində təqsirli bilinən amerikalı iş adamı Cefri Epsteynlə əlaqələri səbəbilə ictimai və media təzyiqi altındadır.