Kürdəmir Suvarma Sistemləri İdarəsinin rəisi Mobil Aşurov: “Mehriban Əliyeva-Zəka, Zəriflik və Ziyalılığın Simvolu”

Azərbaycan Respublikasının Birinci Vitse-Prezidenti Mehriban Arif qızı Əliyeva müasir dövlət idarəçiliyində və ölkənin ictimai-siyasi həyatında xüsusi yerə malik olan nüfuzlu şəxsiyyətdir. Onun çoxşaxəli fəaliyyəti, dövlətə və xalqa xidmət mövqeyi, zəngin mənəvi dünyası və humanist dəyərlərə sadiqliyi onu təkcə Azərbaycanda deyil, beynəlxalq aləmdə də tanınan və rəğbətlə qarşılanan bir liderə çevirmişdir.

Mehriban xanım Əliyeva Azərbaycanın sosial, mədəni və siyasi həyatında mühüm dönüşlərin baş verdiyi bir dövrdə fəal ictimai xadim kimi tanınmağa başlamışdır. Onun rəhbərlik etdiyi Heydər Əliyev Fondu cəmiyyətin müxtəlif sahələrində – təhsil, səhiyyə, sosial müdafiə, mədəniyyət və tarixi irsin qorunması istiqamətində həyata keçirdiyi layihələrlə ölkənin inkişafında mühüm rol oynayır. Fondun fəaliyyəti Azərbaycanın regionlarında da böyük dəyişikliklərə səbəb olmuş, əhalinin rifah halının yaxşılaşdırılmasına xidmət etmişdir.

Mehriban xanım Əliyevanın Birinci Vitse-Prezident kimi fəaliyyəti isə onun dövlət idarəçiliyindəki əzmkarlığını, səmərəliliyini və məsuliyyətli mövqeyini bir daha ortaya qoymuşdur. Xalqla birbaşa təmasa üstünlük verməsi, vətəndaşların müraciətlərinə həssas yanaşması, sosial məsələlərin həllində prinsipial mövqe nümayiş etdirməsi onun fəaliyyətini fərqləndirən əsas cəhətlərdəndir. O, dövlətin sosial siyasətində insan amilini mərkəzə çəkərək, xüsusilə şəhid ailələri, qazilər, aztəminatlı və qayğıya ehtiyacı olan təbəqələrlə bağlı mühüm təşəbbüslərə imza atır.

Mehriban xanım Əliyevanın fəaliyyəti, eyni zamanda Azərbaycan qadınının müasir, zəkalı, ziyalı və dövlətə bağlı obrazını formalaşdırır. O, ailə dəyərlərinə sadiqliyi, həyat yoldaşı və ana kimi nümunəvi davranışı ilə cəmiyyətimizdə qadınların roluna dair yeni yanaşmalar yaradır. Onun həm dövlət xadimi, həm də ictimai lider kimi harmonik fəaliyyəti Azərbaycan cəmiyyətində yüksək dəyərləndirilir və xalq tərəfindən dərin rəğbətlə qarşılanır.

Mehriban xanım Azərbaycanın beynəlxalq imicinin möhkəmləndirilməsində də mühüm rol oynayır. Xarici ölkələrdə keçirdiyi görüşlər, mədəniyyətimizin, tariximizin və dəyərlərimizin tanıdılması istiqamətində apardığı işlər, Azərbaycanla digər dövlətlər arasında humanitar körpülərin qurulmasına səbəb olmuşdur. O, dünyada Azərbaycanı mərhəmətli, humanist və tolerant bir ölkə kimi təqdim edən aparıcı simalardan biridir.

26 avqust – Mehriban xanım Əliyevanın doğum günüdür. Bu əlamətdar gün münasibətilə onu ürəkdən təbrik edirik! Mehriban xanımın dövlətə, xalqa və vətənə göstərdiyi misilsiz xidmətlər daim yüksək dəyərləndirilir və onun şəxsiyyəti hər bir Azərbaycan vətəndaşı üçün nümunə sayılır.

Sizə möhkəm can sağlığı, uzun və mənalı ömür, ailə səadəti, ölkəmizin tərəqqisinə və xalqımızın rifahına yönəlmiş ali missiyanızda yeni-yeni uğurlar arzulayırıq!

Doğum gününüz mübarək, Mehriban xanım!

Xalq sizi sevir, sizə inanır və sizinlə qürur duyur!