Daşkəsən Gənclər Təlim və İstirahət Mərkəzi böyük inkşaf yolu keçib.

Daşkəsən Gənclərin Təlim və İstirahət Mərkəzi bu gün regionun ən nümunəvi gənclər məkanlarından biri kimi tanınırsa, bu uğurun arxasında güclü rəhbərlik komandasının dayandığını qeyd etməmək olmaz.

Turkdunyasi.az xəbər verir ki, mərkəzin direktoru Elşən Tağıyev, gənc yaşına baxmayaraq, 2022-ci ildən etibarən rəhbərlik etdiyi bu müəssisəyə yeni nəfəs, innovativ yanaşmalar və dinamik inkişaf gətirməyi bacarıb. Onun rəhbərliyi dövründə mərkəzdə həm infrastruktur baxımından, həm də təlim və təşkilatçılıq sahəsində böyük dəyişikliklər müşahidə olunub. Elşən Tağıyevin əsas hədəfi Daşkəsən kimi möhtəşəm təbiətə sahib bir rayonda yerləşən bu mərkəzi yalnız istirahət yeri deyil, eyni zamanda gənclərin maariflənməsi, sosiallaşması və fərdi inkişafı üçün strateji platformaya çevirmək olub.

Direktorun yaxın əməkdaşları – menecerlər Yasər Tağlı və Firuz Bəşirov da bu inkişaf prosesində mühüm rol oynayırlar. Yasər Tağlı mərkəzin gündəlik fəaliyyətinin operativ və nizamlı şəkildə həyata keçirilməsinə nəzarət etməklə yanaşı, qonaqların rahatlığını təmin edən təşkilati məsələlərə xüsusi diqqət ayırır. Onun təcrübəsi və məsuliyyətli yanaşması mərkəzin səmərəli idarə olunmasında özünü aydın göstərir.

Digər menecer – Firuz Bəşirov isə daha çox təlim, tədbir və proqramların planlaşdırılması, icrası və gənclərlə birbaşa ünsiyyət sahəsində fərqlənir. Onun təşəbbüsü ilə mərkəzdə bir çox maarifləndirici layihələr, sosial kampaniyalar və yaradıcı təlimlər həyata keçirilib. Firuz Bəşirovun enerjili və motivasiyaedici yanaşması gənclər arasında xüsusi rəğbət qazanıb.

Bu komanda sayəsində Daşkəsən Gənclərin Təlim və İstirahət Mərkəzi təkcə təbiətin gözəllikləri ilə deyil, həm də peşəkar idarəçilik modeli və yenilikçi yanaşmaları ilə seçilərək regionun gənclər üçün cazibədar məkanına çevrilib.

Daşkəsən rayonunun füsunkar təbiət qoynunda yerləşən Gənclərin Təlim və İstirahət Mərkəzi həm istirahət, həm də inkişaf üçün ideal məkandır. Mərkəz, ilboyu ölkənin müxtəlif bölgələrindən gələn qonaqları qonaqpərvərliklə qarşılayaraq onların həm rahatlığını, həm də maariflənməsini təmin edir.

Mərkəzin əsas üstünlüklərindən biri innovativ yanaşmalarla təşkil olunmuş təlim proqramlarıdır. Burada gənclərin şəxsi inkişafı, komandada işləmə bacarığı və sosial məsuliyyət mövzularında təlimlər müasir formatda keçirilir. İnteraktiv metodlardan istifadə olunması gənclərin prosesə aktiv qatılmasını və öyrəndiklərini real həyatla əlaqələndirməsini təmin edir.

Sərin dağ havası, ətrafı əhatə edən yaşıllıqlar və gözoxşayan mənzərələr, mərkəzin yerləşdiyi ərazini əsl istirahət məkanına çevirir. Təbiətlə təmasda olmaq istəyənlər üçün yürüş marşrutları, açıq hava tədbirləri və sakit guşələr yaradılıb.

Bir sözlə bura gələn hər bir qonaq, Elşən Tağıyevin rəhbərliyi altında o cümlədən səmimi və peşəkar personalın xidmətindən razı qalır.