Vətənpərvər veteran, Heydər Əliyev dövrünün böyük ziyalısı Şəddat Cəfərov: "Heydər Əliyev Azərbaycanın xilaskarıdır".

Azərbaycan tarixi boyu bir çox görkəmli şəxsiyyətlər yetirmişdir. Bu şəxsiyyətlər xalqın mənəvi dayağına, dövlətin ideoloji təməlinə çevrilmişlər. Lakin xalqın ağır günlərində, ölüm-dirim anında xilaskar obrazına çevrilmək hər insana nəsib olmur. Bu taleyi öz çiyinlərində daşıyan nadir şəxsiyyətlərdən biri də ulu öndər Heydər Əliyev olmuşdur. Məhz bu səbəbdəndir ki, xalqın ləyaqətli övladları, elm və təhsil sahəsində dərin iz buraxmış şəxslər, müharibə və əmək veteranları onu hər zaman minnətdarlıqla yad edirlər. Bu şəxsiyyətlərdən biri də müasir Azərbaycanın ictimai-siyasi mühitində fəal mövqe sərgiləmiş, milli dəyərlərə və dövlətçilik prinsiplərinə sadiqliyi ilə seçilən Şəddat Cəfərovdur.

Şəddat müəllim həm bir vətənpərvər veteran, həm də Heydər Əliyev dövrünün yetişdirdiyi ziyalı olaraq öz həyat və fəaliyyətini Azərbaycan xalqına, milli ideologiyamıza və dövlətçiliyimizin inkişafına həsr etmiş şəxsiyyətdir. Onun fikrincə, Heydər Əliyev yalnız bir siyasətçi və lider deyil, eyni zamanda Azərbaycanın xilaskarı, millətin varlığını qoruyub saxlayan müqəddəs simadır.

Şəddat Cəfərovun həyat yolu başdan-başa xalqına xidmətlə yoğrulmuşdur. O, sovet dövründə formalaşaraq elm, mədəniyyət və cəmiyyətin müxtəlif sahələrində fəaliyyət göstərmiş, Azərbaycanın müstəqillik illərində də fəal ictimai mövqeyini qoruyub saxlamışdır. Elmin, təhsilin və milli mənəviyyatın təbliğində, cəmiyyətin maariflənməsində mühüm rol oynamışdır.

Bir ziyalı kimi o, hər zaman dövlətə sadiq olub, milli ideyaları müdafiə etmişdir. Onun həyat fəlsəfəsində dövlətçilik ideologiyası, vətənə sevgi, xalqa bağlılıq əsas prinsiplər kimi çıxış edir. Və bütün bu dəyərlərin təməlində duran şəxsiyyətin Heydər Əliyev olduğunu qürurla vurğulayır.

1990-cı illərin əvvəlləri Azərbaycanın tarixi üçün son dərəcə gərgin və ağır illər idi. Dövlət müstəqilliyini təzə qazanan Azərbaycan daxildən zəifləmiş, siyasi hakimiyyətin tez-tez dəyişməsi ölkəni uçuruma sürükləmişdi. Qarabağda müharibə, erməni təcavüzü, məcburi köçkün problemi, iqtisadi və sosial böhran ölkəni xaosa sürükləmişdi. Bu çətin dövrdə xalqın gözü yalnız bir şəxsə – Heydər Əliyevə dikilmişdi.

Şəddat Cəfərov həmin dövrü xatırlayaraq deyir: "Əgər Heydər Əliyev 1993-cü ildə hakimiyyətə qayıtmasaydı, Azərbaycan adlı dövlətin varlığından bu gün danışmaq mümkün olmazdı. O, millətin içindən çıxan, xalqın dərdinə yanan, əsl xilaskar idi."

Ulu öndər 1993-cü ildə xalqın təkidli tələbi ilə siyasi hakimiyyətə qayıtdıqdan sonra ölkədə sabitlik bərqərar oldu, hüquqi islahatlar başladı, dövlət idarəetməsi formalaşdı. Qısa müddətdə iqtisadiyyat dirçəlməyə, xarici siyasətdə tərəfdaşlıqlar qurulmağa başlandı.

Heydər Əliyev cəmiyyətin ziyalı təbəqəsinə hər zaman xüsusi önəm verirdi. Onun üçün ziyalı – xalqla dövlət arasında körpü rolunu oynayan mənəvi dayaq idi. Bu mənada Şəddat Cəfərov kimi ziyalıların fəaliyyəti dövlət başçısı tərəfindən hər zaman yüksək qiymətləndirilmişdir. O, öz çıxışlarında, məqalələrində, elmi və publisistik əsərlərində Heydər Əliyev ideologiyasının mahiyyətini xalqa çatdırmağa çalışmışdır.

Şəddat müəllim qeyd edir ki: "Heydər Əliyev yalnız siyasətçi deyildi, o, həm də düşünən beyinləri, aydınları, alimləri ölkənin gələcəyi üçün səfərbər edən rəhbər idi. Biz ziyalılar özümüzü onun siyasi məktəbinin davamçıları hesab edirik."

Bu düşüncə və sədaqət sayəsində Şəddat Cəfərov Heydər Əliyev ideyalarını təkcə sözlə deyil, əməli fəaliyyəti ilə də yaşatmağa nail olmuşdur.

Şəddat Cəfərov təkcə ziyalı deyil, həm də bir vətən müharibəsi veteranıdır. Ölkənin azadlığı və bütövlüyü uğrunda silaha sarılmış, ön cəbhədə düşmənə qarşı döyüşmüşdür. Onun fikrincə, hər bir ziyalı yalnız yazı masası arxasında deyil, gərəkən anda döyüş meydanında da xalqı ilə birlikdə olmalıdır.

Müharibənin acı nəticələrini görən, torpaqların itkisinin ağrısını yaşayan bu insan üçün Heydər Əliyevin atəşkəs siyasəti, ordu quruculuğu və diplomatik mübarizəsi real qələbənin zəmini kimi dəyərləndirilir.

"Biz müharibənin içindən keçmiş insanlarıq. Bilirdik ki, yalnız güclü dövlət, güclü ordu ilə torpaqlarımızı azad edə bilərik. Heydər Əliyev o ordunun təməlini qoydu, biz isə onun ideyasını 2020-ci ildə reallığa çevirdik." – deyə Şəddat müəllim qürurla qeyd edir.

Şəddat Cəfərov həm də müasir Azərbaycan rəhbərliyinə – Prezident İlham Əliyevə də dərin inamla yanaşır. Onun fikrincə, Heydər Əliyev məktəbinin layiqli davamçısı olan İlham Əliyev milli liderlik modelini müasir çağırışlara uyğun olaraq inkişaf etdirir. Zəfərlə nəticələnən 44 günlük Vətən müharibəsi və ardıcıl aparılan diplomatik uğurlar bu liderlik məktəbinin məntiqi davamıdır.

"Prezident İlham Əliyev atası Heydər Əliyevin ideyalarını yaşadaraq Azərbaycanın müstəqilliyini daha da möhkəmləndirdi. 2020-ci ildəki Qələbə təkcə hərbi deyil, həm də siyasi və ideoloji zəfər idi."

Şəddat Cəfərov Heydər Əliyevi təkcə siyasətçi və rəhbər yox, xalqın ruhunda yaşayan ölməz lider kimi qəbul edir. Onun şəxsiyyəti Azərbaycançılıq ideyasının, milli mənəvi dəyərlərin, tarixə və mədəniyyətə bağlılığın simvoludur.

"Heydər Əliyev bizim tariximizin diri yaddaşıdır. Bu xalq onun xidmətlərini heç zaman unutmayacaq. Heydər Əliyev təkcə bir dövrün lideri deyil, bütöv bir xalqın tale yoldaşıdır."

Şəddat Cəfərovun bütün həyat fəlsəfəsi, yazıları, çıxışları və fəaliyyəti bir amal ətrafında cəmlənir – Vətənə sədaqət, dövlətə inam, liderə etibar. Bu amalın ideoloji mənbəyi isə Heydər Əliyevin siyasi irsi, milli liderlik məktəbi və dövlətçilik təlimidir.

Vətənpərvər veteran və dəyərli ziyalı Şəddat Cəfərov bir daha sübut edir ki, Heydər Əliyev dövrünün yetişdirdiyi insanlar bu gün də cəmiyyətin mənəvi sütunlarıdır. Onlar təkcə keçmişin deyil, həm də gələcəyin işığını daşıyanlar – milli yaddaşın canlı daşıyıcılarıdır.

Şəddat müəllimin dili ilə desək: "Heydər Əliyev bizim xilaskarımız idi. Biz onun yolundan dönməyəcəyik. Bu, bizim mənəvi borcumuzdur!"