Baş məşqçiyə görə hər oyunda 25 min avro cərimə ödəyirlər

Fransa Birinci Futbol Liqası (Ligue 1) klublarından “Monako” oktyabr ayında işə gətirdiyi Sebastiyen Pokoqnolinin diplomu olmadığı üçün hər matçda cərimə ödəyir.

“Qafqazinfo” xəbər verir ki, bu barədə “L’Equipe” qəzeti məlumat yayıb.

Bildirilib ki, Adi Hütterin yerinə baş məşqçi təyin olunan 38 yaşlı Pokoqnoli BEPF (Peşəkar Futbol Təlimçisi Diplomu) və ya ona bərabər diplom sahibi olmadığı üçün klubu hər matç üçün 25 min avro cərimə ödəməli olur.

İndiyədək 17 matçda (14 liqa, 3 kubok) komandaya rəhbərlik edən belçikalı məşqçi üçün “Monako” 425 min avro cərimə ödəyib. Klub UEFA Çempionlar Liqasında isə hər hansı bir sanksiya ilə qarşılaşmır.

Qeyd edilib ki, “Monako” rəhbərliyi cərimədən yayınmaq üçün bir matçda Pokoqnolinin köməkçisi Damien Perrineli baş məşqçi kimi heyət siyahısına yazıb, amma onun da təhsili davam etdiyi üçün yenə cərimə ödənib. Perrinel bu vəziyyətdən istifadə edərək, maaşının artırılmasını təmin edib.

Klub Perrinelin adını siyahıya yazmaqla da problemi həll edə bilməyincə, heyət siyahısında baş məşqçi bölməsini boş qoymağa başlayıb.

Belçikalı məşqçi mövsümü tamamlayarsa, “Monako” ümumilikdə 750 min avro cərimə ödəyəcək. Klubdan verilən açıqlamada qeyd olunub ki, oktyabr ayında 38 yaşlı məşqçi ilə danışıqlar zamanı bu qayda nəzərə alınıb və maaş buna uyğun tənzimlənib.

Ligue 1-də 21 matçdan sonra 8 qələbə, 4 heç-heçə və 9 məğlubiyyət nəticəsi ilə 28 xal toplayan “Monako” 10-cu pillədə qərarlaşıb. UEFA Çempionlar Liqasında isə 21-ci yeri tutaraq son 16 mərhələyə yüksələn Fransa təmsilçisi bu mərhələdə digər Fransa klubu PSJ ilə qarşılaşacaq. “Monako” Fransa Kubokunda isə mübarizəni dayandırmışdı.