Ukrayna XİN: Heç bir ölkədən döyüş təyyarələrinin tədarükü ilə bağlı vəd almamışıq

Kiyev indiyədək heç bir ölkədən döyüş təyyarələrinin tədarükü ilə bağlı vəd almayıb.

AZƏRTAC xəbər verir ki, bunu Ukraynanın xarici işlər naziri Dmitri Kuleba deyib.

"Bununla belə, bəzi ölkələr Ukrayna hərbçilərinə qırıcı təyyarələri idarə etməyi öyrətməyə hazır olduqlarını bildiriblər, digərləri isə bunu tezliklə edəcəklər", - deyə nazir qeyd edib.

Ukraynalı nazir bir daha vurğulayıb ki, ərazi bütövlüyü Rusiya ilə danışıqlara başlamaq üçün zəruri şərtdir.

Bir neçə gün əvvəl Almaniyanın vitse-kansleri, iqtisadiyyat və iqlim mühafizəsi naziri Robert Habek Kiyevə qırıcı təyyarələrin verilməsi məsələsinin indi gündəmdə olmadığını bildirib.

Keçən həftə Polşanın Baş naziri Mateuş Moravietski demişdi ki, Ukraynaya mümkün döyüş təyyarələrinin tədarükü ilə bağlı istənilən addım NATO-dan gəlməlidir.