Rusiyanın Ukraynaya raket hücumları nəticəsində azı 11 nəfər həlak olub

Rusiyanın yanvarın 26-da Ukraynaya qarşı həyata keçirdiyi kamikadze dronu və raket hücumları nəticəsində azı 11 nəfər ölüb, eyni sayda insan isə yaralanıb.

AZƏRTAC xəbər verir ki, bu barədə Ukrayna Fövqəladə Hallar üzrə Dövlət Xidmətinin nümayəndəsi Oleksandr Xorunji telemarafonda məlumat yayıb.

“Bu gün Rusiyanın həm kamikadze dronları, həm də raketləri ilə həyata keçirdiyi terror hücumları nəticəsində 11 bölgədə itkilər olub. Ümumilikdə 2 yanğın baş verib, 35 binaya ziyan dəyib, 11 nəfər xəsarət alıb. Təəssüf ki, 11 nəfər də həlak olub”, - deyə o bildirib.

Hazırda 100-dən çox xilasedici və 25-dən çox texnika dəyən ziyanın nəticələrinin aradan qaldırılmasına cəlb olunub.

"Biz indi 88 elektrik stansiyasını birləşdirmişik ki, ilk növbədə sosial sahə, xəstəxanalar və s. obyektləri elektrik enerjisi ilə təmin edək", - O.Xorunji əlavə edib.

O deyib ki, atəş nəticəsində ən çox Kiyev vilayətində fərdi və çoxmənzilli yaşayış binalarına ziyan dəyib.