“Baharın rəngləri” adlı rəsm müsabiqəsi davam edir

Mədəniyyət Nazirliyi, Təhsil Nazirliyi, “Azərbaycan Televiziya və Radio Verilişləri” Qapalı Səhmdar Cəmiyyəti, Xətai Rayon İcra Hakimiyyəti, Azərbaycan Rəssamlar İttifaqı, Azərbaycan Dövlət Rəsm Qalereyası və Xətai Sənət Mərkəzinin təşkilatçılığı ilə elan olunan “Baharın rəngləri” adlı respublika uşaq rəsm müsabiqəsinə əsər qəbulu davam edir.

Xətai Sənət Mərkəzindən AZƏRTAC-a bildirilib ki, müsabiqənin məqsədi uşaqlara təbiəti sevdirmək və təbiətin qoruyucusu olan bir gəncliyin formalaşmasına xidmətdən ibarətdir.

21 yaşa qədər uşaq və yeniyetmələr Bakı Xətai Sənət Mərkəzi feysbuk qrupuna daxil olub, (https://www.facebook.com/groups/144172178999749/?ref=share) təqdim edəcəyi əsərin fotosu ilə bərabər, əsərin adı, texnikası, müəllifin soyadı, adı, təvəllüdü, təhsil aldığı məktəb və əlaqə nömrəsini martın 2-dək yerləşdirməklə müsabiqəyə qatıla bilərlər.

Bahar mövzusunda olacaq əsərlər tək-tək yerləşdirilməli, məlumatlar dolğun olmalı, 2-dən çox əsər göndərilməməlidir.

Seçim zamanı müəllifin yaşı nəzərə alınmaqla, düzgün kompozisiya, rəng seçimi və ideya əsas götürüləcək.

Müsabiqədə xarici ölkə vətəndaşları da iştirak edə bilərlər.

Seçim 3 yaş kateqoriyası üzrə - 11 yaşa qədər, 11-16 və 16-21 yaşarası aparılacaq.

Əsəri sərgilənəcək müəlliflər və sərgilənən əsərlər Xətai Sənət Mərkəzi və Azərbaycan Dövlət Rəsm Qalereyasının media hesablarında elan olunacaq.

Əsəri sərgidə nümayiş olunan müəlliflər sertifikatla və fəal tədris mərkəzləri (dərnək, incəsənət məktəbi və s.) təşəkkürnamə ilə təltif olunacaqlar.