Qadın – dünyanın səssiz dayağı

Gözünüzü açırsınız və hər yerdə qadın görürsünüz – evdə, küçədə, işdə… Amma çox vaxt onların hər gün çəkdiyi yükü görmürük. Sabah Beynəlxalq Qadınlar Günüdür– 8 Martdır. Küçələr gül və təbrik dolacaq, sosial şəbəkələrdə saysız-hesabsız sözlər paylaşılacaq. Amma qadınların həqiqi dəyəri sadəcə bir günə sığmaz.

Qadın həyatın ən ağır yükünü səssiz daşıyan insandır. O, çox vaxt yorulduğunu demir. O, bəzən hamını xoşbəxt etmək üçün öz arzularını susdurur. Hər bir qadın bir hekayədir – bəzən görünməyən, amma dərin və təsirli hekayə.

Bir ana gecələr yuxusuz qalaraq övlad böyüdür. O, uşaqlarının sabahını düşünür, öz yorğunluğunu arxa plana atır. Gecənin sakitliyində gözlərindəki qəm və ümid birləşir, amma səhər yuxudan duranda yenə güclə, sevgi ilə uşaqlarını qucaqlayır.

Bir müəllim qadın gələcəyin insanlarını yetişdirir, hər sözündə, hər baxışında onlara həyat üçün möhkəm dayaq verir. Onların səbrini, zəhmətini və qayğısını dərk etməyən hər kəs bilməlidir ki, gələcək bu qadınların əllərində formalaşır.

Bir qadın isə bəzən heç kim bilmədən qəlbində qırılan arzularla yenə də gülümsəməyi bacarır. Onun gülüşü dünyanın gözəlliyinə işıq saçır, amma çox vaxt o gülüşün arxasında görünməyən yaralar, məcburiyyətlər və dözüm dayanır.

Qadın güclüdür – amma bu güc bəzən məcburiyyətdən doğur. Qadın səbirli olur – çünki həyat onu belə olmağa məcbur edir. Onun gücü insanlara qarşı deyil, həyatın özü ilə döyüşmək üçün formalaşır.

Biz çox vaxt dünyanın böyük işlərinə, texnologiyaya, siyasi oyunlara heyran oluruq. Amma əsl möcüzə sadədir: həyatı yaradan qadındır. Həyatın hər anında, hər uşaqda, hər xoşbəxtlik anında onun izi var.

Qadınlar çox zaman səssiz qəhrəmanlardır. Onlar təkcə ailəni, məktəbi, iş yerini deyil, həm də cəmiyyəti yaşadan təməl daşıdır. Hər gün qarşılaşdıqları çətinliklər, məhdudiyyətlər, gözardı edilən zəhmətlər onların gücünü heç azalda bilmir.

Bu gün qadınlara gül vermək gözəldir, təbrik etmək və onları xatırlamaq vacibdir. Amma ən böyük hörmət onları hər gün dəyərləndirməkdir. Hər gün qadının zəhmətini, səbrini, gücünü görmək, ona dəstək olmaq və onu anlamaya çalışmaq – bunun özü ən böyük bayramdır.

Çünki qadın sadəcə bayramın qəhrəmanı deyil. Qadın həyatın özü, dünyanın səssiz dayağıdır. Bəzən dünya qadınların səssiz gücü üzərində dayanır – amma biz bunu görə bilmirik. Qadının hər gülümsəməsi, hər zəhməti, hər səsi eşidib qiymətləndirməyi bacarmalıyıq.

8 Mart bir gündür. Amma qadın hər gün dünyanı yaşadır. Ona görə də qadına dəyər vermək, onu anlamaq və hörmət etmək – yalnız bir bayram işi deyil, həyatın ən vacib öhdəliyidir.

Və unutmayaq: bir qadının gülüşü, səbrli baxışı və səssiz gücü dünyanı döndərir – və biz bunu heç vaxt gözardı etməməliyik.

Şəfəq Ağacan