Sadə məşğuliyyət yaşlıların psixoloji sağlamlığını yaxşılaşdırır

Mütəmadi olaraq bağbanlıqla məşğul olmaq yaşlı insanların psixoloji vəziyyətini əhəmiyyətli dərəcədə yaxşılaşdıra və depressiya simptomlarını azalda bilər. Bu nəticəyə qocalar evlərində təsadüfi sınaqlar aparan türkiyəli tədqiqatçılar gəliblər.

Oxu.Az xəbər verir ki, tədqiqatın nəticələri "Public Health Nursing" jurnalında dərc edilib.

Tədqiqatda 46 nəfər yaşlı insan iştirak edib. İştirakçılar iki qrupa bölünüblər: bir qrup üç ay ərzində həftədə bir dəfə bağbanlıqla məşğul olub, digər qrup isə əlavə aktivlik olmadan normal rejimdə həyatına davam edib. Psixoloji vəziyyət təcrübədən əvvəl və sonra yaşlılar üçün depressiya şkalası və "PERMA" psixoloji rifah şkalasından istifadə edilməklə qiymətləndirilib.

Nəticələr qruplar arasında əhəmiyyətli fərqlər göstərib. Bağbanlıqla məşğul olan iştirakçılarda depressiya göstəriciləri əhəmiyyətli dərəcədə azalıb və psixoloji rifah səviyyəsi artıb. Effekt həm statistik cəhətdən əhəmiyyətli olub, həm də təsir dərəcəsi yüksək qiymətləndirilib.

Müəlliflər bildiriblər ki, bitkilərlə hətta orta dərəcədə müntəzəm məşğul olmaq yaşlı insanların emosional vəziyyətinə müsbət təsir göstərə bilər. Onların fikrincə, uzunmüddətli qayğı müəssisələrində bu cür proqramların tətbiqi psixi sağlamlığın dəstəklənməsi üçün sadə və əlçatan üsuldur.